Read Maltese Bible with DC – IL-BIBBJA IL-KOTBA MQADDSA DEWTERONOMJU 13 Bible Online

DEWTERONOMJU 13 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 13

¹“Kulma ordjantilkom, qisu li tagħmluh. Iżżidu xejn miegħu, tnaqqsu xejn minnu.

²“Jekk iqum f’nofsok xi profeta jew ħalliem[17], u jgħidlek li jagħtik sinjal jew għaġeb,

³u mbagħad iseħħ is-sinjal jew l-għaġeb li jkun wiegħed u qallek: ‘Ħa mmorru wara allat oħrajn, li int ma tafx bihom, u nadurawhom,’

⁴la tismax il-kliem ta’ dan il-profeta jew il-ħolm li hu jkun ħolom. Il-Mulej, Alla tiegħek, ikun qiegħed iġarrbek, biex jagħraf jekk intomx nies li tħobbu lill-Mulej, Alla tagħkom, b’qalbkom kollha u b’ruħkom kollha.

⁵“Intom għandkom timxu wara l-Mulej, u minnu tibżgħu, u l-kmandamenti tiegħu tħarsu, u leħnu tisimgħu, u lilu taqdu, u miegħu tingħaqdu.

⁶“Profeta bħal dan, jew ħalliem bħal dan, agħtuh il-mewt, għax ikun xewwixkom bi kliemu kontra l-Mulej, Alla tagħkom, li ħariġkom mill-art tal-Eġittu u fdiekom minn dar il-jasar, biex ibiegħdek mit-triq li wissiek il-Mulej, Alla tiegħek, li tgħaddi minnha. Hekk teqred il-ħażen minn ġo nofsok.

⁷“Jekk ħuk, bin missierek jew bin ommok, jew ibnek jew bintek, jew il-mara li tistrieħ fi ħdanek jew ħabibek, li tqisu bħalek innifsek, jgħawwik bil-moħbi u jgħidlek: ‘Ħa mmorru nservu lil allat oħra’ - allat li ma tafx bihom, la int u lanqas missirijietek,

⁸l-allat tal-ġnus ta’ madwarek, qrib tiegħek jew ’il bogħod minnek, minn tarf għal ieħor tal-art -

⁹toqgħodx għalih u lanqas tisimgħu, lanqas jitħassruh għajnejk, u la taħmlu u lanqas tostru.

¹⁰Imma għandek toqtlu, u l-ewwel ma terfa’ idek int biex toqtlu, u mbagħad il-poplu kollu.

¹¹Int tħaġġru sa ma jmut, għax ikun fittex li jaqtgħek mill-Mulej, Alla tiegħek, li ħarġek mill-art tal-Eġittu, minn dar il-jasar.

¹²U jisma’ Iżrael kollu, u jibża’, u ma jibqax jagħmel ħażen bħal dan f’nofsok.

¹³“Jekk f’xi waħda mill-ibliet, li l-Mulej, Alla tiegħek, se jagħtik biex tgħammar fihom, tismagħhom jgħidu

¹⁴li ħarġu xi nies ħżiena minn nofsok u xewxu lin-nies tal-ibliet u qalulhom: ‘Ħa mmorru nservu allat oħra, li ma nafux bihom,’

¹⁵fittex għarbel u staqsi sewwa. Jekk issib li dan hu minnu, li hekk hu tassew, li saret din il-ħaġa moqżieża f’nofsok,

¹⁶oqtol għalkollox b’xifer ix-xabla n-nies ta’ din il-belt u ixħetha għall-qerda, lilha b’kulma fiha u l-bhejjem tagħha b’xifer ix-xabla.

¹⁷U tiġbor il-ġid kollu tagħha f’nofs il-pjazza, u taħraq bin-nar il-belt u l-ġid tagħha b’offerta sħiħa lill-Mulej, Alla tiegħek, u tibqa’ ħerba għal dejjem u ma tibniha qatt.

¹⁸Xejn ma għandu jeħel ma’ idejk minn dak li jkun għall-qerda, biex il-Mulej jerġa’ lura mill-korla tiegħu, u jagħmel ħniena miegħek, u jħenn għalik u jkattrek, bħalma wiegħed lil missirijietek

¹⁹għax tkun smajt leħen il-Mulej, Alla tiegħek, u ħarist l-ordnijiet kollha li jien qiegħed nordnalek illum, u qiegħed tagħmel dak kollu li jogħġob lill-Mulej, Alla tiegħek.