Read Maltese Bible with DC – IL-BIBBJA IL-KOTBA MQADDSA DEWTERONOMJU 16 Bible Online

DEWTERONOMJU 16 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 16

¹“Ħares ix-xahar ta’ Abib[18], u agħmel il-festa tal-Għid f’ġieħ il-Mulej, Alla tiegħek, għax fix-xahar ta’ Abib ħarġek il-Mulej, Alla tiegħek, mill-art tal-Eġittu billejl.

²Oqtol u offri s-sagrifiċċju tal-Għid, nagħaġ u baqar, lill-Mulej, Alla tiegħek, fil-post li jagħżel il-Mulej li jqiegħed ismu fih.

³Ma tikolx ħobż bil-ħmira miegħu; imma għal sebat ijiem tiekol ħobż ażżmu, ħobż in-niket, għax bl-għaġla ħriġt mill-art tal-Eġittu, biex tiftakar jum ħruġek mill-Eġittu, il-jiem kollha ta’ ħajtek.

⁴M’għandha tidher ebda ħmira fil-pajjiż kollu tiegħek għal sebat ijiem, u m’għandu jibqa’ xejn għal filgħodu mil-laħam li tkun offrejt b’sagrifiċċju filgħaxija l-jum ta’ qabel.

⁵Ma tistax toffri s-sagrifiċċju tal-Għid f’ebda waħda mill-ibliet li se jagħtik il-Mulej, Alla tiegħek,

⁶jekk mhux fil-post li jagħżel il-Mulej, Alla tiegħek, biex iqiegħed ismu fih. Hemm toffri s-sagrifiċċju tal-Għid filgħaxija ma’ nżul ix-xemx, fil-ħin li int ħriġt mill-Eġittu.

⁷Issajru u tieklu, fil-post li jagħżel il-Mulej, Alla tiegħek. L-għada filgħodu int tista’ ddur lura, u tmur fit-tined tiegħek.

⁸Għal sitt ijiem tiekol ħobż ażżmu, u fis-seba’ jum ikollok laqgħa f’ġieħ il-Mulej, Alla tiegħek, u ma tagħmel ebda xogħol.

⁹“Int tgħodd seba’ ġimgħat: tibda tgħodd seba’ ġimgħat minn meta tibda tmidd il-minġel għall-ħsad.

¹⁰U tagħmel il-festa tal-Ġimgħat f’ġieħ il-Mulej, Alla tiegħek, u toffri minn rajk kemm tista’ tagħti idek, skont ma jkun bierkek il-Mulej, Alla tiegħek.

¹¹“U tifraħ quddiem il-Mulej, Alla tiegħek, int u wliedek, subien u bniet, l-ilsir u l-ilsira tiegħek, il-Levita li jkun fi blietek, u l-barrani, l-iltim u l-armla, li jkunu f’nofsok fil-post li jkun għażel il-Mulej biex iqiegħed ismu fih.

¹²U ftakar li lsir kont fl-Eġittu, u qis li tħares dawn il-liġijiet.

¹³“Tagħmel il-festa tal-Għerejjex meta taħżen il-ġabra tal-andar u l-magħsar tiegħek.

¹⁴U fil-festa tiegħek tifraħ int, uliedek, subien u bniet, l-ilsir u l-ilsira tiegħek, il-Levita u l-barrani, l-iltim u l-armla, li jkunu fi blietek.

¹⁵Għal sebat ijiem tagħmel il-festa f’ġieħ il-Mulej, Alla tiegħek, fil-post li jkun għażel il-Mulej; għax il-Mulej, Alla tiegħek, ibierkek fil-ġabra tiegħek kollha, u f’kulma jagħmlu idejk, u tkun tassew ferħan.

¹⁶“Tliet darbiet fis-sena kull raġel f’nofsok għandu jidher quddiem il-Mulej, Alla tiegħek, fil-post li jkun għażel: fil-festa tal-Ażżmi, fil-festa tal-Ġimgħat, u fil-festa tal-Għerejjex; u m’għandux jidher quddiem il-Mulej idu f’idu.

¹⁷Kulħadd jagħti kemm jista’ skont il-barka li jkun tak il-Mulej, Alla tiegħek.

¹⁸“Int tqiegħed imħallfin u uffiċjali f’kull belt tiegħek li l-Mulej, Alla tiegħek, se jagħtik, għal kull tribù tiegħek, biex jagħmlu l-ħaqq mill-poplu bis-sewwa.

¹⁹La tgħawwiġx il-ġustizzja, tħarisx lejn l-uċuħ, u taċċettax rigali, għax ir-rigali jagħmu għajnejn l-għorrief u jgħawġu kliem in-nies sewwa.

²⁰Għandek tfittex il-ġustizzja, u l-ġustizzja biss, biex inti tgħix u żżomm l-art f’idejk, li l-Mulej, Alla tiegħek, se jagħtik.

²¹“Ma għandek twaqqaf ebda xbieha tal-Asera, u ma tħawwel ebda siġra ħdejn l-artal li tibni lill-Mulej, Alla tiegħek;

²²u anqas twaqqaf plieri, għax jobgħodhom il-Mulej, Alla tiegħek.