Read Maltese Bible with DC – IL-BIBBJA IL-KOTBA MQADDSA DEWTERONOMJU 17 Bible Online

DEWTERONOMJU 17 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 17

¹“Toffrix b’sagrifiċċju lill-Mulej, Alla tiegħek, barri jew mogħża, li jkun fiha xi difett jew xi ħsara, għax dan jistkerrhu l-Mulej.

²“Jekk jitfaċċa xi ħadd f’nofsok, f’xi waħda minn blietek, li l-Mulej, Alla tiegħek, se jagħtik, raġel jew mara, li jagħmel xi ħaġa ma togħġobx lill-Mulej, Alla tiegħek, u jikser il-patt tiegħu,

³u jmur iservi allat oħra - ix-xemx, il-qamar, it-tagħmir kollu tas-smewwiet - u jinxteħet quddiemhom, ħaġa li jien ma ordnajtilkomx li tagħmlu;

⁴u jgħidulek u tisma’ bihom, stħarreġ sewwa, u jekk ikun minnu, jiġifieri li tkun saret din il-ħaġa mistkerrha f’nofs Iżrael,

⁵oħroġ lil dan ir-raġel jew mara, li jkunu għamlu din il-ħaġa ħażina, f’bieb beltek, ir-raġel u l-mara, u tħaġġarhom sa ma jmutu.

⁶“Min hu għall-mewt oqtlu fuq ix-xhieda ta’ tnejn jew tlieta; toqtolx fuq il-kelma ta’ xhud wieħed.

⁷L-ewwel ma jmidd idu fuq rasu biex joqtlu jkun ix-xhud stess, imbagħad imidd idu l-poplu kollu, u hekk tkun qridt il-ħażen minn ġo nofsok.

⁸“Jekk il-kawża tkun tqila għalik biex tiddeċiedi bejn qtil u qtil, bejn dritt u dritt, bejn drib u drib, qum u itla’ fil-post li jagħżel il-Mulej, Alla tiegħek, biex iqiegħed ismu fih,

⁹u mur għand il-qassisin Leviti u quddiem l-imħallef li jkun hemm dak iż-żmien, u fittex mingħandhom, u jagħtuk is-sentenza tal-ħaqq.

¹⁰U agħmel skont il-kelma li jgħidulek f’dak il-post li jagħżel il-Mulej biex iqiegħed ismu fih, u qis li tagħmel skont ma juruk hemmhekk.

¹¹Tagħmel skont it-twissijiet li jagħmlulek u skont is-sentenzi li jagħtuk; ma tilwix minn dak li jgħallmuk, la lejn ix-xellug u lanqas lejn il-lemin.

¹²“Min imbagħad jazzarda u ma jismax mill-qassis, li qiegħed hemm biex jaqdi lill-Mulej, Alla tiegħek, jew mill-imħallef, dan il-bniedem ikun ħaqqu l-mewt, u hekk tkun qridt il-ħażen minn Iżrael.

¹³U l-poplu kollu jisma’, u jibża’, u ma jitkabbrux aktar.

¹⁴“Meta int tasal fl-art li l-Mulej, Alla tiegħek, se jagħtik biex teħodha f’idejk u tgħammar fiha, u tgħid: ‘Ħa nagħmel sultan fuqi bħall-ġnus ta’ madwari’; int tista’ tagħmel sultan fuqek, li jkun ħatru l-Mulej, Alla tiegħek.

¹⁵Int tista’ tagħmel sultan fuqek lil wieħed minn fost ħutek; ma tistax tqiegħed fuqek wieħed barrani, li ma jkunx ħuk.

¹⁶Biss m’għandux iżomm għadd kbir ta’ żwiemel[19] u anqas m’għandu jieħu l-poplu lura fl-Eġittu biex iżid iż-żwiemel, għax il-Mulej qalilkom: ‘La taqbdux iżjed din it-triq.’

¹⁷Anqas ma għandu jkollu ħafna nisa, li ma ddurx qalbu; u lanqas ħafna fidda u deheb.

¹⁸Meta joqgħod fuq it-tron ta’ saltnatu, jikteb mill-ġdid din il-liġi fi ktieb minn fuq dik li hemm għand il-qassisin Leviti.

¹⁹U jżommha dejjem għandu u jaqraha l-jiem kollha ta’ ħajtu, biex jitgħallem jibża’ mill-Mulej, Alla tiegħu, u jħares il-kliem kollu ta’ din il-liġi u dawn l-istatuti, biex iħarishom;

²⁰u ma jintrefax f’qalbu ’l fuq minn ħutu, u ma jilwix mill-kmandamenti lejn il-lemin jew lejn ix-xellug; biex idum għal żmien twil fuq saltnatu, hu u wliedu, f’nofs Iżrael.