Read Maltese Bible with DC – IL-BIBBJA IL-KOTBA MQADDSA DEWTERONOMJU 18 Bible Online

DEWTERONOMJU 18 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 18

¹“Il-qassisin Leviti, it-tribù kollha ta’ Levi, ma jkollhomx sehem u wirt mal-poplu ta’ Iżrael; jgħixu mis-sagrifiċċji u l-wirt tal-Mulej.

²Ma jkollhomx sehem f’nofs ħuthom; il-Mulej hu l-wirt tagħhom, kif wegħedhom.

³“Dan hu li jmiss bi dritt lill-qassisin mingħand il-poplu, mingħand min joffri s-sagrifiċċju, mill-baqar jew min-nagħaġ; għandu jagħti lill-qassis l-ispallejn, ix-xdieq u l-kirxa;

⁴tagħtih ukoll il-bikri tal-qmuħ tiegħek, tal-inbid ġdid, u taż-żejt tiegħek, u l-bikri tal-ġeżż tan-nagħaġ tiegħek.

⁵Għax lilu għażel il-Mulej, Alla tiegħek, mit-tribù kollha ta’ Iżrael, biex jaqdi lill-Mulej, Alla tiegħek, u jservi f’isem il-Mulej, hu u wliedu għal dejjem.

⁶“Jekk imbagħad jiġi xi Levita fil-post li jkun għażel il-Mulej minn xi waħda minn blietek, jew minn xi mkien f’Iżrael kollu fejn ikun joqgħod, jekk jiġi minn qalbu u minn rajh,

⁷ħallih iservi f’isem il-Mulej, Alla tiegħu, bħal ħutu l-oħra l-Leviti, li jkunu quddiem il-Mulej.

⁸Ikollu l-istess porzjon ta’ ikel, minbarra dak li jiret mill-ġid ta’ missirijietu.

⁹“Meta inti tidħol fl-art li l-Mulej, Alla tiegħek, se jagħtik, titgħallimx timxi fuq id-drawwiet koroh ta’ dawn il-ġnus.

¹⁰Ma għandu jkun hemm ħadd f’nofsok li jgħaddi min-nar lil ibnu[20] jew lil bintu, lanqas min jeħber, min jitkixxef il-ġejjieni,

¹¹min jagħmel il-magħmul u s-sħarijiet, min isejjaħ l-erwieħ, min jobsor u jistħarreġ il-mejtin.

¹²Għax mistkerrah quddiem il-Mulej kull min jagħmel dawn il-ħwejjeġ; u minħabba dawn id-drawwiet koroħ, il-Mulej, Alla tiegħek, se jkeċċihom minn quddiemek.

¹³Kun perfett quddiem il-Mulej, Alla tiegħek.

¹⁴Għax dawn il-ġnus li int se tkeċċi ’l barra, jisimgħu minn dawk li jobsru u jeħbru, imma lilek il-Mulej, Alla tiegħek, ma jħallikx tagħmel hekk.

¹⁵“Il-Mulej, Alla tiegħek, iqajjimlek profeta[21] bħali minn ġensek, minn fost ħutek; lilu għandkom tisimgħu.

¹⁶Dan kollu skont ma tlabt inti stess lill-Mulej, Alla tiegħek, fil-Ħoreb f’jum il-laqgħa, meta għedt: ‘Jalla ma nismax aktar leħen il-Mulej, Alla tiegħi, u ma narax aktar dan in-nar iħeġġeġ, ħalli ma mmutx.’

¹⁷U l-Mulej qalli: ‘Sewwa għamlu li tkellmu.

¹⁸Jiena nqajmilhom profeta bħalek, minn fost ħuthom; inqiegħed kliemi fuq fommu, u jħabbrilhom kulma nordnalu.

¹⁹Min ma jagħtix widen għal kliemi li huwa jħabbar f’ismi, jiena nitolbu kont talli jkun naqas.

²⁰U jekk xi profeta jfettillu jgħid f’ismi ħwejjeġ li ma nkunx qabbadtu jgħid, jew inkella jħabbar f’isem allat oħra, dan il-profeta jkun ħaqqu l-mewt.’

²¹“Jekk inti tiġi biex tgħid f’qalbek: ‘Kif nagħrfu l-kelma li ma tkunx tal-Mulej?’

²²Dan jiġri meta l-kelma li jgħid il-profeta f’isem il-Mulej ma sseħħx u ma jiġri xejn; din il-kelma ma jkunx qalha l-Mulej; ikun qalha l-profeta bi preżunzjoni; la tibżax minnu.