Read Maltese Bible with DC – IL-BIBBJA IL-KOTBA MQADDSA DEWTERONOMJU 19 Bible Online

DEWTERONOMJU 19 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 19

¹“Meta l-Mulej, Alla tiegħek, ikun qered il-ġnus, li l-Mulej, Alla tiegħek, se jagħtik arthom, u int teħodha f’idejk u tgħammar fl-ibliet u d-djar tagħhom,

²agħżel għalik tlitt ibliet[22] f’nofs l-art li l-Mulej, Alla tiegħek, se jagħtik biex tkun tiegħek.

³U inti twitti t-triq għalihom, u tqassam fi tlieta l-medda tal-art li l-Mulej, Alla tiegħek, se jqassamlek, u kull min joqtol ikun jista’ jistkenn fihom.

⁴“Jistkenn hemmhekk, u jibqa’ ħaj il-qattiel, li jkun darab lil għajru bla ma kien jaf u bla ma kien jobogħdu qabel.

⁵Bħal meta wieħed imur ma’ sieħbu fil-bosk biex jaqtal-ħatab, u kif imidd idu bil-mannara biex jaqta’ siġra, itirlu l-ħadid mill-manku, u jolqot lil sieħbu u jmut; dan jaħrab f’waħda minn dawn l-ibliet u jsalva ħajtu;

⁶li ma jmurx jitlaq għal wara l-qattiel qarib il-mejjet bil-jedd tal-vendetta[23] f’saħna ta’ demm, u jilħqu minħabba t-tul tat-triq, u joqtlu, bla ma jkun ħaqqu l-mewt, għax ma kienx jobogħdu fl-imgħoddi.

⁷Għalhekk nordnalek, u ngħidlek, biex twarrab għalik tlitt ibliet.

⁸“Jekk imbagħad il-Mulej, Alla tiegħek, iwessa’ t-truf ta’ artek, bħalma wiegħed lil missirijietek, u jagħtik l-art kollha li wiegħed li jagħti lil missirijietek -

⁹għax tkun ħarist din l-ordni li qiegħed nagħtik illum, u għamiltha u wrejt li tħobb il-Mulej, Alla tiegħek, u li timxi fi triqtu l-jiem kollha ta’ ħajtek - żid tlitt ibliet oħra ma’ dawn it-tlieta,

¹⁰biex ma jixxerridx demm innoċenti f’artek, li se jagħtik il-Mulej, Alla tiegħek, b’wirt, u ma jkollokx fuqek il-ħtija tad-demm.

¹¹“Jekk ikun hemm xi ħadd li jobgħod lil għajru u jgħassislu bil-moħbi, iħebb għalih u jidorbu għall-mewt u jmut, u l-qattiel jaħrab f’xi waħda minn dawn l-ibliet,

¹²ix-xjuħ tal-belt tiegħu jibagħtu jġibuh minn hemm, u jagħtuh f’idejn il-qarib tal-mejjet bil-jedd tal-vendetta biex joqtlu.

¹³Tħarisx b’għajn ħanina lejh; neħħi minn nofs Iżrael il-ħati tad-demm innoċenti, u jkollok ir-risq.

¹⁴“La tħarrikx il-plieri tar-raba’ ta’ għajrek, minn fejn qegħduhom ta’ qablek, fil-qasam li jmissek fl-art li l-Mulej, Alla tiegħek, se jagħtik, u int se tieħu f’idejk.

¹⁵“Xhud wieħed kontra xi ħadd ma jgħodd għall-ebda dnub u għall-ebda ħtija, ikun xi jkun li wieħed ikun għamel; fuq il-kelma ta’ żewġ xhieda jew tlieta tipprova l-fatti.

¹⁶Jekk iqum xi xhud kontra xi ħadd, u jixhed b’fehma ħażina xi ħaġa ħażina kontrih,

¹⁷it-tnejn min-nies li jkollhom xi jgħidu jidhru quddiem il-Mulej, quddiem il-qassisin u quddiem l-imħallfin li jkun hemm dak iż-żmien,

¹⁸u l-imħallfin jistħarrġu sewwa, u jekk isibu li x-xhud kien xhud giddieb, u jkun akkuża u gideb kontra ħuh,

¹⁹tagħmlulu dak li kellu ħsieb jagħmel hu lil ħuh. U hekk teqred il-ħażen minn ġo nofsok.

²⁰U malli jisimgħu l-bqija tal-poplu, jibżgħu, u ma jibqgħux jagħmlu ħażen bħal dan ġo nofsok.

²¹Tħarisx b’għajn ħanina; iżda ħajja b’ħajja, għajn b’għajn, sinna b’sinna, id b’id, riġel b’riġel.