Read Maltese Bible with DC – IL-BIBBJA IL-KOTBA MQADDSA DEWTERONOMJU 2 Bible Online

DEWTERONOMJU 2 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 2

¹“U dorna lura u tlaqna għad-deżert mat-triq tal-Baħar tal-Qasab, bħalma qalli l-Mulej, u bqajna niġġerrew mal-muntanja ta’ Xegħir għal ħafna żmien.

²“U l-Mulej kellimni u qalli:

³‘Ilkom tiġġerrew biżżejjed ma’ dawn il-muntanji, duru lejn it-Tramuntana.

⁴Agħti lill-poplu din l-ordni: Intom se taqsmu l-art ta’ ħutkom, ulied Għesaw, li jgħammru f’Xegħir. Huma jibżgħu minnkom, iżda intom oqogħdu attenti ħafna.

⁵Taħbtux għalihom, għax ma nagħtikom xejn minn arthom, anqas daqs rifsa ta’ riġel, għax il-muntanja ta’ Xegħir tajtha b’wirt lil Għesaw.

⁶L-ikel li tieklu tixtruh minn għandhom bil-flus, u hekk ukoll l-ilma li tixorbu.

⁷Għax il-Mulej, Alla tiegħek, bierkek f’kull xogħol ta’ idejk; ħa ħsiebek fi triqtek f’dan id-deżert kbir; għal dawn l-aħħar erbgħin sena l-Mulej Alla tiegħek kien miegħek, u f’xejn ma naqsek.’

⁸“U għaddejna għalhekk ’il bogħod minn ħdejn ħutna, ulied Għesaw, li jgħammru f’Xegħir, mit-triq tal-Għaraba, minn Elat, u minn Għesjon-geber, u mbagħad ilwejna u qbadna t-triq li tieħu għad-deżert ta’ Mowab.

⁹“U l-Mulej qalli: ‘La taħbatx għal Mowab; la titqabadx u tiġġelidx magħhom; għax m’iniex se nagħtik b’wirt art minn tagħhom; l-art ta’ Għar tajtha b’wirt lil ulied Lot.’

¹⁰Qabilhom kienu jgħammru hemm l-Emin, poplu kbir u kotran, u twal bħall-Għanakin.

¹¹Kienu jqisuhom bħar-Refajin, li kienu wkoll bħall-Għanakin, imma l-Mowabin isejħulhom Emin.

¹²Qabel f’Xegħir kienu għammru l-Ħorin, imma keċċewhom ulied Għesaw, u qerduhom u daħlu flokhom, bħalma għamel Iżrael, bl-art li għandu f’idejh, l-art li tahom il-Mulej.

¹³‘Issa, qumu u aqsmu l-wied ta’ Żered’, u qsamna l-wied ta’ Żered.

¹⁴“Iż-żmien li ħadna biex imxejna minn Kades-barnigħa sa ma qsamna l-wied ta’ Żered kien ta’ tmienja u tletin sena, sakemm ma ntemmx minn nofs il-kamp in-nisel ta’ dawk in-nies gwerriera, bħalma kien ħalef il-Mulej.

¹⁵U id il-Mulej kienet fuqhom u qerdithom minn nofs il-kamp sa ma ntemmu għalkollox.

¹⁶“Meta l-gwerriera kienu mietu u ntemmu minn fost il-poplu,

¹⁷il-Mulej kellimni u qalli:

¹⁸‘Illum int se taqsam minn Għar, il-fruntiera ta’ Mowab,

¹⁹u toqrob lejn ulied Għammon; taħbatx għalihom u titqabadx magħhom, għax ma tajtek ebda art mill-art ta’ Għammon biex tkun tiegħek, għax tajtha biex jirtuha lil ulied Lot.’

²⁰Din l-art iqisuha wkoll art ir-Refajin, għax qabel kienu jgħammru fiha huma, imma l-Għammonin isejħulhom Żamżummin,

²¹nies kbar u kotrana, twal bħall-Għanakin; il-Mulej iżda qeridhom malli l-Għammonin tfaċċaw quddiemhom; keċċewhom u daħlu flokhom;

²²bħalma għamel għal ulied Għesaw, li jgħammru f’Xegħir, meta qered il-Ħorin minn quddiemhom, u huma keċċewhom, u daħlu flokhom, u għadhom hemm sal-lum.

²³U l-Kaftorin, li ħarġu minn Kaftor[4], qerdu lil Għawwin, li kienu jgħammru fl-irħula sa Gaża, u daħlu flokhom.

²⁴“ ‘Isaw, itilqu, aqsmu l-wied tal-Arnon. Ara, jien tajtek f’idek lil Siħon, is-sultan ta’ Ħesbon l-Amurri, bl-art tiegħu. Idħol fiha u agħmillu gwerra.

²⁵Minn dan il-jum jiena nġiegħel lill-ġnus kollha taħt is-sema jitriegħdu u jitwerwru quddiemek; malli jisimgħu b’aħbarek jitriegħdu, u jinħallu quddiemek.’

²⁶“Jien bgħatt messaġġiera mid-deżert ta’ Kedemot għand Siħon, sultan ta’ Ħesbon, jgħidulu bil-kwiet;

²⁷‘Ħallini ngħaddi minn artek; nibqa’ dejjem miexi dritt mat-triq, bla ma nilwi lejn il-lemin jew lejn ix-xellug.

²⁸Tbegħli bil-flus l-ikel li niekol, u tagħtini l-ilma li nixrob bil-flus, basta tħallini ngħaddi bil-mixi,

²⁹bħalma għamlu miegħi wlied Għesaw li jgħammru f’Xegħir, u l-Mowabin li jgħammru f’Għar, sakemm naqsam il-Ġordan għall-art li l-Mulej, Alla tagħna, se jagħtina.’

³⁰Iżda Siħon, is-sultan ta’ Ħesbon, ma riedx li ngħaddu minn għandu, għax il-Mulej, Alla tiegħek, stinalu rasu u webbislu qalbu, biex jagħtih f’idek bħalma hu llum.

³¹“U l-Mulej qalli: ‘Arani, jien bdejt nerħi f’idejk lil Siħon u ’l artu. Idħol fiha biex tieħu artu f’idek.’

³²U Siħon ħareġ għalina, hu u l-poplu tiegħu kollu, sa Ġaħas biex jitqabad magħna.

³³“U l-Mulej, Alla tagħna, irħieh f’idejna, u qtilna lilu, ’l uliedu u l-poplu tiegħu kollu.

³⁴Ħadna dak iż-żmien l-ibliet kollha tiegħu, u qridna għalkollox in-nies bin-nisa u t-tfal kollha, u ma ħallejna lil ħadd ħaj.

³⁵Żammejna għalina l-bhejjem u l-priża tal-ibliet li ħadna.

³⁶Minn Għarogħer, li qiegħda ma’ xifer il-wied tal-Arnon, u l-belt li qiegħda fil-wied sa Gilgħad, ma kienx hemm belt li ma stajniex negħlbuha; ilkoll erħiehom f’idejna l-Mulej, Alla tagħna.

³⁷Biss ma rsaqtx lejn l-art tal-Għammonin, il-medda kollha tal-wied ta’ Ġabbok, u l-ibliet tal-għolja, kollox skont ma kien ordna l-Mulej, Alla tagħna.