Read Maltese Bible with DC – IL-BIBBJA IL-KOTBA MQADDSA DEWTERONOMJU 21 Bible Online

DEWTERONOMJU 21 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 21

¹“Jekk fl-art[24] li l-Mulej, Alla tiegħek, se jagħtik biex tiret, issibu fir-raba’ lil xi ħadd maqtul u mixħut fl-art bla ma jkun jaf ħadd min qatlu,

²joħorġu x-xjuħ u l-imħallfin tiegħek u jkejlu l-bogħod tal-ibliet madwar il-mejjet.

³Imbagħad meta jsibu l-eqreb belt, ix-xjuħ ta’ din il-belt jieħdu għoġla, li qatt ma jkunu ħadmu biha u li qatt ma tkun ġarret madmad.

⁴U x-xjuħ ta’ dik il-belt jieħdu l-għoġla f’wied dejjem bl-ilma, fejn ma jinħadimx u ma jinżerax, u hemm jiksru għonq l-għoġla fil-wied.

⁵U jersqu l-qassisin, ulied Levi - għax lilhom għażel il-Mulej, Alla tiegħek, biex jaqduh u jbierku f’isem il-Mulej - u fuq kelmthom tinqata’ kull tilwima u kull ħabta.

⁶U x-xjuħ kollha ta’ dik il-belt, l-eqreb lejn il-maqtul, jaħslu idejhom fuq l-għoġla li jkunu kisrulha għonqha fil-wied,

⁷u mbagħad jistqarru u jgħidu: ‘Idejna ma xerrdux dan id-demm, u għajnejna ma raw xejn.

⁸Aħfer Mulej lill-poplu tiegħek Iżrael, li int fdejt, u tħallix il-ħtija ta’ demm innoċenti f’nofs il-poplu tiegħek Iżrael.’ U hekk tinħafrilhom il-ħtija,

⁹u int tkun neħħejt il-ħtija tad-demm innoċenti minn ġo nofsok, għax tkun għamilt dak li jogħġob il-Mulej.

¹⁰“Meta toħroġ għall-gwerra kontra l-għedewwa tiegħek, u l-Mulej, Alla tiegħek, jerħihom f’idejkom u tieħu minnhom priġunieri,

¹¹jekk fost dawn il-priġunieri tilmaħ xi mara sabiħa f’suritha u titgħaxxaq biha, int tista’ teħodha b’martek.

¹²“Iddaħħalha ġo darek, u hi tqarweż rasha[25], u taqta’ difrejha.

¹³Tneħħi minn fuqha l-ilbies ta’ priġuniera u toqgħod f’darek, tibki lil missierha u lil ommha għal xahar, u mbagħad int tkun tista’ tersaq lejha, u int tkun żewġha u hi martek.

¹⁴U jekk imbagħad ma tibqax togħġbok ħalliha tmur għal rasha, imma ma tistax tbigħha bil-flus, u lanqas taħqarha, għax int tkun telliftilha ġieħha.

¹⁵“Jekk raġel ikollu żewġ nisa, u jħobb lill-waħda u jistmell lill-oħra, u sew il-maħbuba sew il-mistmella jwildulu t-tfal, u l-iben il-kbir ikun tal-mistmella,

¹⁶dakinhar li jiġi biex jaqsam il-ġid li jkollu lil uliedu, ma jistax iqis b’ibnu l-kbir bin il-maħbuba, flok ibnu l-kbir bin il-mistmella.

¹⁷Għandu jagħraf bħala ibnu l-kbir bin il-mistmella, u jagħtih żewġ ishma minn kulma jinsab għandu; għax hu l-bikri ta’ saħħtu, u lilu jmiss id-dritt tal-iben il-kbir.

¹⁸“Jekk xi ħadd ikollu ibnu ma jobdihx u jkun stinat, u ma jismax minn kliem missieru u minn kliem ommu, iwiddbuh u jqum kontra tagħhom u ma jismax minnhom,

¹⁹jaqbduh missieru u ommu, u jeħduh għand ix-xjuħ tal-belt tiegħu, f’bieb il-post fejn joqgħod[26].

²⁰U jgħidu lix-xjuħ tal-belt: ‘Dan minna ma jobdix u stinat, ma jismax minn kliemna, ħali u sakranazz.’

²¹Imbagħad in-nies kollha ta’ beltu jħaġġruh sakemm imut, u hekk int teqred il-ħażen minn ġo nofsok; u Iżrael kollu jisimgħu u jibżgħu.

²²“Jekk xi ħadd ikun ħati u jkun ħaqqu l-mewt, u toqtlu u ddendlu ma’ zokk ta’ siġra[27],

²³tħallix ġismu mdendel maz-zokk, iżda idfnu dak in-nhar stess; għaliex wieħed imdendel hu s-saħta ta’ Alla, u ma għandekx ittabba’ ’l artek, li l-Mulej, Alla tiegħek, se jagħtik b’wirt.