Read Maltese Bible with DC – IL-BIBBJA IL-KOTBA MQADDSA DEWTERONOMJU 23 Bible Online

DEWTERONOMJU 23 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 23

¹“Ħadd ma jista’ jiżżewweġ il-mara ta’ missieru[30], lanqas jikxef tarf friex missieru.

²“Ma jidħolx fil-ġemgħa tal-Mulej ir-raġel li jkollu t-testikoli misħuqin jew il-membru virili maqtugħ.

³Ma jidħolx bin iż-żina fil-ġemgħa tal-Mulej, lanqas sal-għaxar nisel, anzi ħadd minn tiegħu ma jista’ qatt jidħol fil-ġemgħa tal-Mulej.

⁴“Ma jidħolx l-Għammoni u l-Mowabi lanqas sal-għaxar nisel, anzi ħadd minnhom ma jista’ qatt jidħol fil-ġemgħa tal-Mulej,

⁵għax dawn ma ġewx jilqgħukom bil-ħobż u l-ilma fit-triq meta ħriġtu mill-Eġittu; anzi xtara kontra tiegħek lil Bagħlam bin Begħor minn Petor f’Aram-naħarajm biex jisħtek.

⁶Il-Mulej, Alla tiegħek, ma riedx jisma’ lil Bagħlam, imma biddel il-Mulej, Alla tiegħek, is-saħta f’barka, għax ħabbek il-Mulej, Alla tiegħek.

⁷Tfittixx is-sliem jew il-ġid tagħhom, qatt f’ħajtek għal dejjem.

⁸“Tumbrax lil wieħed Edomi, għax dan hu ħuk; tistmellx lil wieħed Eġizzjan, għax int kont barrani f’artu.

⁹It-tielet nisel ta’ wliedhom jistgħu jidħlu fil-ġemgħa tal-Mulej.

¹⁰“Meta toħroġ fil-kamp għall-għedewwa tiegħek qis li żżomm ’il bogħod kull ħaġa mhijiex xierqa.

¹¹Jekk ikun hemm xi ħadd li ma jkunx safi, minħabba li jkun ġralu billejl, għandu joħroġ barra mill-kamp,

¹²u ma jidħolx f’nofs il-kamp qabel ma filgħaxija jinħasel bl-ilma, u ma nżul ix-xemx jidħol ġewwa l-kamp.

¹³“Għandu jkollok post barra mill-kamp fejn tista’ tmur meta jkollok bżonn.

¹⁴U żżomm biċċa għuda mal-għodda tiegħek u, meta titbaxxa, tħaffer biha; u meta tqum tgħatti l-ħmieġ tiegħek.

¹⁵Għax il-Mulej, Alla tiegħek, jitlajja fil-kamp tiegħek, biex isalvak u jerħi l-għedewwa tiegħek f’idejk; għalhekk il-kamp tiegħek għandu jkun qaddis, li l-Mulej ma jara xejn fih li ma jixraqx; u jdawwar wiċċu minnek.

¹⁶“L-ilsir li jaħrab lil sidu u jistkenn għandek, titilqux f’idejn sidu.

¹⁷Jibqa’ jgħammar f’nofsok fil-post li tagħżel f’waħda minn blietek, fejn ikun l-aħjar għalih. U la taħqrux.

¹⁸“Ma għandu jkun hemm ebda prostituta sagra mill-bniet ta’ Iżrael[31], anqas prostitut sagru mis-subien ta’ Iżrael.

¹⁹Iġġibx il-ħlas ta’ mara żienja, u lanqas il-qligħ ta’ kelb, fid-dar tal-Mulej, Alla tiegħek, għal ebda wegħda, għax it-tnejn jistkerrahhom il-Mulej, Alla tiegħek.

²⁰“La teħux imgħax mingħand ħuk, la mgħax ta’ flus, la ta’ ikel, ta’ ebda ħaġa li tinsilef bil-flus.

²¹Tista’ tieħu mgħax lill-barrani, imma lil ħuk teħodlux, biex ibierkek il-Mulej, Alla tiegħek, f’kulma tmidd idejk għalih fl-art fejn sejjer biex teħodha f’idejk.

²²“Meta tagħmel wegħda lill-Mulej, Alla tiegħek, tiddawwarx ma troddha; għax il-Mulej, Alla tiegħek, ifittex għaliha, u jkollok ħtija.

²³Imma jekk inti ma tagħmilx wegħdi, ma jkollokx ħtija.

²⁴“Imma kulma jkun ħareġ minn xufftejk qis li tagħmlu, skont ma wegħedt minn rajk lill-Mulej, Alla tiegħek, skont ma tkun għedt bi kliemek.

²⁵“Meta tidħol f’xi qasam dwieli ta’ għajrek, tista’ tiekol għeneb kemm tixtieq, u sa ma tixba’; imma tixħet xejn ġol-ħorġa tiegħek.

²⁶Meta tidħol fiż-żara’ ta’ għajrek tista’ taqta’ s-sbul b’idek, imma m’għandekx tmidd il-minġel fiż-żara’ ta’ għajrek.