Read Maltese Bible with DC – IL-BIBBJA IL-KOTBA MQADDSA DEWTERONOMJU 25 Bible Online

DEWTERONOMJU 25 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 25

¹“Jekk ikun hemm xi tilwima bejn tnejn min-nies dawn għandhom jersqu quddiem il-qorti u jagħmlu ħaqq minnhom, u jagħtu raġun lil min ikollu raġun, u tort lil min ikollu tort.

²U jekk il-ħati jkun jistħoqqlu s-swat, l-imħallef imiddu fl-art u jsawtuh quddiemu bl-għadd skont il-ħtija tiegħu.

³Jagħtuh erbgħin daqqa, u mhux aktar[34], li ma jmorrux isawtuh aktar minn hekk, u ħuk jitlef ġieħu quddiemek.

⁴“Ma għandekx tagħmel is-sarima lill-gendus li jkun jidres.

⁵“Jekk aħwa jgħixu flimkien[35], u jmut wieħed minnhom, u ma jkollux tfal, il-mara tal-mejjet m’għandhiex tiżżewweġ barra l-familja lil xi ħadd barrani; ħatinha jersaq lejha, u jeħodha b’martu, u jaqdi dmiru ta’ ħu żewġha li hu.

⁶U hekk jiġri li l-ewwel iben li tiled jieħu isem ħuh il-mejjet u hekk ma jitħassarx ismu minn Iżrael.

⁷“Jekk imbagħad ir-raġel ma jogħġbux jieħu ’l mart ħuh, din tmur għand ix-xjuħ ħdejn il-bieb tal-belt u tgħidilhom: ‘Ħatni ma jridx iqajjem isem ħuh f’Iżrael, u ma jridx jagħmel dmiru miegħi ta’ ħu żewġi li hu.’

⁸U x-xjuħ tal-belt tiegħu jsejħulu u jkellmuh; u jekk jibqa’ jgħid: ‘Ma jogħġobnix neħodha,’

⁹il-kunjata tersaq lejh quddiem ix-xjuħ, taqlagħlu l-qorq minn riġlu, tobżoqlu f’wiċċu, u tgħajjat, u tgħid: ‘Hekk jagħmlulu lir-raġel li ma jridx jibni dar ħuh.’

¹⁰U f’Iżrael jagħtuh il-laqam ta’ ‘Dar il-Moħfi’.

¹¹“Jekk jiġri li żewġt irġiel jissieltu bejniethom, wieħed mal-ieħor, u tersaq il-mara ta’ wieħed minnhom biex teħles lil żewġha minn idejn l-ieħor li ħabat għalih, u tmidd idha u taqbadlu għawaru,

¹²aqtgħalha idha barra u tħarisx lejha b’għajn ħanina.

¹³“M’għandux ikollok fil-ħorġa tiegħek użin u wżin, wieħed kbir u l-ieħor żgħir.

¹⁴“Ma għandux ikollok f’darek kejl u kejl, wieħed kbir u l-ieħor żgħir.

¹⁵Għandu jkollok użin sħiħ u sewwa, kejl sħiħ u sewwa, u hekk itul għomrok fuq l-art li l-Mulej, Alla tiegħek, se jagħtik.

¹⁶Għax jistkerrah il-Mulej, Alla tiegħek, lil kull min jagħmel dawn il-ħwejjeġ, lil kull min jagħmel il-qerq.

¹⁷“Ftakar x’għamillek Għamalek int u ħiereġ mill-Eġittu;

¹⁸kif laqgħek fit-triq, u qatagħlek minn warajk lil dawk kollha li kienu jkarkru warajk, u int kont għajjien u mifni, u hu ma beżax minn Alla.

¹⁹Mela meta l-Mulej, Alla tiegħek, iserrħek mill-għedewwa tiegħek ta’ madwarek fl-art li l-Mulej, Alla tiegħek, se jagħtik b’wirt biex teħodha f’idejk, ħassar it-tifkira ta’ Għamalek minn taħt is-smewwiet. Qis li ma tinsiex.