Read Maltese Bible with DC – IL-BIBBJA IL-KOTBA MQADDSA DEWTERONOMJU 26 Bible Online

DEWTERONOMJU 26 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 26

¹“Meta tidħol fl-art, li l-Mulej, Alla tiegħek, se jagħtik b’sehmek, u teħodha f’idejk, u tgħammar fiha,

²ħu l-bikri mill-frott kollu tar-raba’ li int tiġbor mill-art li l-Mulej, Alla tiegħek, se jagħtik, u tqiegħdu f’qoffa u tmur fil-post li l-Mulej, Alla tiegħek, jaħtar biex jgħammar ismu fih.

³U tmur għand il-qassis li jkun hemm dak in-nhar, u tgħidlu: ‘Jien nistqarr illum lill-Mulej, Alla tiegħek, li jien dħalt fl-art li l-Mulej wiegħed b’ħalfa lil missirijietna li jagħtiha lilna.’

⁴Il-qassis imbagħad jilqa’ minn idejk il-qoffa, u jqegħedha quddiem l-artal tal-Mulej, Alla tiegħek.

⁵Inti mbagħad tgħid hekk quddiem il-Mulej, Alla tiegħek: ‘Missieri kien minn Aram[36], jiġġerra minn post għal ieħor; imbagħad niżel l-Eġittu u għammar hemm. Żgħir kien l-għadd ta’ niesu, iżda hemmhekk sar poplu kbir, qawwi u kotran.

⁶L-Eġizzjani ħaqruna, għakksuna, għabbewna b’xogħol iebes;

⁷imma aħna għajjatna lill-Mulej, Alla ta’ missirijietna, u l-Mulej sama’ l-għajta tagħna, ra t-tgħakkis u t-tbatija u d-dwejjaq tagħna,

⁸u ħariġna l-Mulej mill-Eġittu, b’id qawwija, bi driegħ merfugħ, b’biża’ kbir, b’sinjali u b’għeġubijiet,

⁹u daħħalna f’dan il-post, tana din l-art, art tnixxi ħalib u għasel.

¹⁰U issa, ara, jiena ġibt l-ewwel frott tal-art li tajtni int, Mulej.’ U int tqiegħdu quddiem il-Mulej, Alla tiegħek, u tadura lill-Mulej, Alla tiegħek.

¹¹U tifraħ bil-ġid kollu li l-Mulej, Alla tiegħek, ikun ta lilek u lil darek, int u l-Levita, u l-barrani li jkun jgħammar f’nofsok.

¹²“Meta tkun temmejt tiġbor l-għexur tal-uċuħ tiegħek fit-tielet sena, is-sena tal-għexur, u tajthom lil-Levita, lill-barrani, lill-iltim, u lill-armla, u jkunu kiluhom u xebgħu,

¹³int tmur tgħid quddiem il-Mulej, Alla tiegħek: ‘Neħħejt il-ħwejjeġ sagri mid-dar biex tajthom lil-Levita, lill-barrani, lill-iltim u lill-armla, skont l-ordni tiegħek li tajtni; ma ksirt u ma nsejt ebda kmand milli tajtni.

¹⁴Ma kilt xejn minnhom meta kont bil-vistu, ma warrabt xejn waqt li kont imniġġes, ma tajtx minnhom għall-mejjet; smajt mill-kelma tal-Mulej, Alla tiegħi, u għamilt skont kulma ordnajtli.

¹⁵Ittawwal mis-sema, l-għamara mqaddsa tiegħek, u bierek il-poplu tiegħek Iżrael u l-art li tajtna, kif int ħlift lil missirijietna, art tnixxi ħalib u għasel.’

¹⁶“Illum il-Mulej, Alla tiegħek, qiegħed jordnalek li tagħmel dawn il-liġijiet u dawn il-preċetti, u qis li tagħmilhom b’qalbek kollha u b’ruħek kollha.

¹⁷Int ġegħelt lill-Mulej jgħid li jkun Alla tiegħek, u li timxi fit-toroq tiegħu u li tħares il-liġijiet tiegħu u l-kmandamenti u l-preċetti tiegħu, u tisma’ minn kliemu.

¹⁸U l-Mulej ġiegħlek tagħti l-kelma llum li tkun poplu maħtur tiegħu, kif kien qallek, u li tħares l-ordnijiet kollha tiegħu

¹⁹biex hu jgħollik fuq il-ġnus kollha li għamel, fl-isem u fil-ġieħ, u tkun ġens ikkonsagrat lill-Mulej, Alla tiegħek, kif kien wiegħdek.”