Read Maltese Bible with DC – IL-BIBBJA IL-KOTBA MQADDSA DEWTERONOMJU 28 Bible Online

DEWTERONOMJU 28 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 28

¹“Jekk int tassew tisma’ leħen il-Mulej, Alla tiegħek, biex tħares u tagħmel l-ordnijiet kollha tiegħu, li jien illum qiegħed nordnalek, jerfgħek il-Mulej, Alla tiegħek, fl-għoli ’l fuq mill-ġnus kollha tal-art.

²U jiġu fuqek dawn il-barkiet kollha, għax tkun smajt il-leħen tal-Mulej, Alla tiegħek.

³“Imbierek tkun fil-belt u mbierek fir-raba’.

⁴“Imbierek ikun il-frott ta’ ġufek, il-frott ta’ artek, il-frott tal-bhejjem tiegħek; il-frieħ tal-baqar tiegħek, u l-frieħ tal-imrieħel tiegħek.

⁵“Imbierka l-qoffa tal-ħobż tiegħek, u l-imgħaġna tiegħek.

⁶“Imbierek tkun fi dħulek[38], u mbierek fi ħruġek.

⁷Iħarbat il-Mulej l-għedewwa li jqumu għalik; minn triq waħda joħorġu għalik, u minn seba’ toroq jaħarbu minn quddiemek.

⁸“Il-Mulej jagħtik il-barka fl-imħażen tiegħek u f’kulma tmidd idek għalih; u jbierkek fl-art li l-Mulej, Alla tiegħek, se jagħtik.

⁹U l-Mulej jagħmel minnek poplu kkonsagrat għalih, skont ma ħaliflek, jekk int tħares l-ordnijiet tal-Mulej, Alla tiegħek, u timxi fi triqatu.

¹⁰U jaraw il-ġnus kollha tal-art li int iġġib isem il-Mulej[39], u jibżgħu minnek.

¹¹Ifawrek il-Mulej bil-ġid, bil-frott ta’ ġufek, bil-frott tal-bhejjem tiegħek u bil-frott tal-art tiegħek li l-Mulej ħalef lil missirijietek li jagħtik.

¹²“Jiftaħ il-Mulej is-sema, il-maħżen ta’ ġidu, u jagħtik f’waqtha x-xita għal artek u jbierkek f’kulma tmidd idek għalih. Int tislef lil ħafna ġnus, u int ma tissellef mingħand ħadd.

¹³Iqiegħdek il-Mulej fir-ras u mhux fid-denb; u tkun dejjem minn fuq, u qatt minn taħt, jekk tisma’ mill-ordnijiet tal-Mulej, Alla tiegħek, li jien illum qiegħed nordnalek; tħarishom u tagħmilhom,

¹⁴bla ma tilwi lejn il-lemin jew lejn ix-xellug minn dan kollu li qiegħed nordnalek illum, biex tmur wara allat oħra u taqdihom.

¹⁵“Jekk int ma tismax leħen il-Mulej, Alla tiegħek, u ma tħarisx u ma tagħmilx l-ordnijiet u l-liġijiet tiegħu li jiena llum qiegħed nordnalek, dawn is-saħtiet kollha jiġu fuqek u jilħquk:

¹⁶“Misħut tkun fil-belt, u misħut tkun fir-raba’.

¹⁷“Misħuta l-qoffa tal-ħobż tiegħek u l-imgħaġna tiegħek.

¹⁸“Misħut il-frott ta’ ġufek u l-frott tar-raba’ tiegħek, il-frieħ tal-baqar tiegħek u l-frieħ tal-imrieħel tiegħek.

¹⁹“Misħut tkun fi dħulek, u misħut fi ħruġek.

²⁰“Jibgħat il-Mulej is-saħta, it-taħwid, u tehdid, f’kulma tmidd idek għalih, sakemm tinqered u tintemm fi ftit żmien minħabba l-ħażen ta’ għemilek, meta inti tlaqtni.

²¹Il-Mulej iqabbdek il-pesta sakemm jifnik minn fuq l-art li int sejjer fiha biex tiritha.

²²Jolqtok il-Mulej bil-mard irqiq, bid-deni, bir-raxx tal-ġilda, bil-ħruq; bin-nixfa, bir-riħ jaħraq, u s-sadid tas-siġar, li jibqgħu jiġru warajk sakemm jifnuk.

²³Is-sema fuq rasek ikun bronż; u ħadid l-art taħtek.

²⁴“Ix-xita ta’ artek jagħmilha l-Mulej ramel u trab; jinżlu mis-sema fuqek sa ma jeqirduk.

²⁵“Iħarbtek il-Mulej quddiem l-għedewwa tiegħek, minn triq waħda toħroġ għalihom, u minn seba’ triqat taħrab minn quddiemhom, u jitkexkxu s-saltniet kollha tal-art minħabba fik.

²⁶Ġismek mejjet ikun ikel għat-tjur kollha tal-ajru u l-bhejjem tal-art, mingħajr ma ħadd inaffarhom.

²⁷“Jolqtok il-Mulej bl-infafet tal-Eġittu, bil-morliti, bil-ħakk, bix-xwiek f’ġismek, li ma tkunx tista’ tfiq minnhom.

²⁸Jolqtok il-Mulej bil-ġenn, bl-għama u b’thewdin il-moħħ,

²⁹li tmur u timxi tteftef f’nofsinhar bħalma jteftef fid-dlam wieħed agħma; ma jkollokx riżq fix-xogħol tiegħek, imma tkun magħkus u misruq ħajtek kollha, u ħadd ma jgħinek.

³⁰“Titgħarras ma’ mara, u ħaddieħor jitgħaxxaq biha; tibni dar, u ma tgħammarx fiha; tħawwel id-dwieli, u ma teħux frott minnhom.

³¹Il-gendus tiegħek joqtluh quddiemek, u int ma tikolx minnu; il-ħmar tiegħek jisirquh minn quddiem għajnejk, u ma jerġax lura għandek; in-nagħaġ tiegħek jerħuhom f’idejn l-għedewwa tiegħek, u ma jkollokx min isalvak.

³²“Is-subien tiegħek jagħtuhom lil poplu ieħor, u int tarahom b’għajnejk u tinfena għalihom il-jum kollu, imma ma tkun tista’ tagħmel xejn għalihom.

³³Il-frott ta’ artek u tal-għaraq tiegħek jieklu poplu li ma tafux u int tkun biss mgħakkes u mqarraq ħajtek kollha,

³⁴u jagħtik ġenn għal li jaraw għajnejk.

³⁵“Jolqtok il-Mulej bl-infafet qalila f’irkupptejk u f’saqajk, minn qiegħ riġlejk sal-quċċata ta’ rasek, u ma tfiqx minnhom.

³⁶“Jieħu l-Mulej lilek u lis-slaten li int tqiegħed fuqek, għand poplu li ma tafx bih, la int u anqas missirijietek, u hemm taqdi allat oħra tal-ġebel u tal-ħatab.

³⁷“Jitkexkxu l-ġnus kollha li f’nofshom jieħdok il-Mulej, tiġi f’ilsienhom u jiddieħqu bik.

³⁸“Toħroġ bl-abbundanza ż-żerriegħa għar-raba’ tiegħek, imma taħsad ftit, għax jikluha l-ġradijiet.

³⁹Tħawwel id-dwieli u taħdimhom, imma nbid ma tixrobx, u ma tiġbor xejn għax jikolhom id-dud.

⁴⁰“Ikollok iż-żebbuġ fil-medda ta’ artek, imma biż-żejt ma tindilikx, għax iż-żebbuġ tiegħek tobżqu s-siġra.

⁴¹Tiled subien u bniet, iżda ma jkunux tiegħek, għax jittieħdu lsiera.

⁴²“Is-siġar tiegħek u l-frott ta’ artek jeħodhomlok il-ġrad.

⁴³Il-barrani li jkun f’nofsok jitla’ ’l fuq minnek, ’il fuq ’il fuq, bla ma jaqta’ xejn; u int tinżel ’l isfel ’l isfel.

⁴⁴Jisilfek hu, u int lilu ma tisilfux; hu jkun ir-ras, u int tkun id-denb.

⁴⁵“Dawn is-saħtiet kollha jiġu fuqek, u jibqgħu jiġru warajk sa ma jilħquk u jeqirduk, għax ma tkunx smajt mill-kelma tal-Mulej, Alla tiegħek, u ma ħaristx l-ordnijiet u l-liġijiet li tak.

⁴⁶U jkunu fik sinjali u għeġubijiet, fik u f’nislek għal dejjem.

⁴⁷“Talli int ma tkunx qdejt lill-Mulej, Alla tiegħek, bil-ferħ u l-qalb it-tajba, għall-ħafna ġid li tak,

⁴⁸int isservi l-għedewwa tiegħek, li l-Mulej jibgħat kontrik, fil-ġuħ u fl-għatx, fl-għera u fl-għaks, f’kollox. U jgħabbuk b’madmad tal-ħadid fuq għonqok sa ma jeqirduk.

⁴⁹“Iqajjem il-Mulej kontrik ġens mill-bogħod, minn truf l-art, bħalma ttir l-ajkla, ġens li lsienu ma tifhmux.

⁵⁰Ġens ta’ wiċċ kiefer, li ma jħarisx lejn ix-xjuħ, u anqas ma jħenn għat-tfal;

⁵¹jiekol il-frott tal-bhejjem tiegħek u ta’ artek sakemm jeqirdek; u anqas ma jħallilek qmuħ, inbid jew żejt; anqas il-frieħ tal-bhejjem tiegħek u l-ħrief tal-imrieħel tiegħek, sakemm itemmek.

⁵²“Jagħlquk dawramejt fl-ibliet kollha tiegħek sa ma jiġġarrfu l-ħitan għolja u s-swar li int tkun fihom ittamajt f’artek kollha; u jagħlquk fi bliet artek kollha, li l-Mulej, Alla tiegħek, ikun tak.

⁵³U int tiekol il-frott ta’ ġufek, laħam is-subien u l-bniet tiegħek, li l-Mulej, Alla tiegħek, ikun tak, minħabba d-diqa u l-għeluq li jġibek fihom l-għadu meta jassedjak.

⁵⁴Ir-raġel artab u mfissed fostok iħares b’għajn ħażina lejn ħuh u lejn mart ħdanu, u lejn il-bqija ta’ wliedu li jkun baqagħlu;

⁵⁵ma jkun irid jagħti lil ħadd minnhom minn laħam uliedu, jieklu hu għax xejn ma jibqagħlu minħabba d-diqa u l-għeluq li jġibek fihom l-għadu fl-ibliet kollha tiegħek.

⁵⁶Il-mara ratba u mfissda fostok, li tibża’ tmidd qiegħ riġilha fl-art minħabba rtubitha u fsiedha, tħares b’għajn ħażina lejn żewġ ħdanha, lejn binha, u lejn bintha,

⁵⁷lejn il-bxima tagħha li toħroġ minn bejn riġlejha, lejn kull tifel jew tifla li tista’ tiled, għax tikolhom bil-moħbi minħabba d-diqa u l-għeluq li jġibek fihom l-għadu tiegħek fi blietek.

⁵⁸“Jekk int ma tqisx li tħares dan il-kliem ta’ din il-liġi miktuba f’dan il-ktieb, li tibża’ minn dan l-isem imsebbaħ u tal-biża’, il-Mulej, Alla tiegħek,

⁵⁹tal-għaġeb ikun is-swat, għalik u għal nislek, li l-Mulej jagħtik, swat kbir ma jaqta’ xejn, mard twil u kiefer.

⁶⁰U jġib fuqek il-mardiet kollha tal-Eġittu, li int kont titkexkex minnhom, u jaqbdu miegħek;

⁶¹u l-mard u s-swat kollu li mhumiex miktuba fil-ktieb ta’ din il-liġi, iġibhom il-Mulej fuqek sakemm tinqered;

⁶²u tibqgħu ftit nies, minflok il-ħafna nies li kontu bħall-kwiekeb tas-sema, għax ma tkunux smajtu l-kelma tal-Mulej, Alla tagħkom.

⁶³Bħalma l-Mulej jifraħ jagħmlilkom il-ġid u jkattarkom, hekk għad jifraħ iħarbatkom u jeqridkom, u jaħsadkom minn fuq l-art li int sejjer fiha biex teħodha f’idejk.

⁶⁴U l-Mulej ixerrdek fost il-ġnus, minn tarf tal-art għall-ieħor, u hemm isservi allat oħra, li la int u lanqas missirijietek ma tafu bihom, allat tal-ġebel u tal-ħatab.

⁶⁵Imma anqas qalb dawk il-ġnus ma jkollok mistrieħ, u ma jkollokx fejn isserraħ qiegħ riġlejk; iżda hemmhekk il-Mulej iregħedlek qalbek, imewwitlek għajnejk u jreqqlek ruħek.

⁶⁶Ħajtek tkun imdendla b’ħajta, imbeżżgħa lejl u nhar, bla tama f’ħajtek.

⁶⁷Filgħodu tgħid: ‘Li kien jidlam!’ u filgħaxija tgħid: ‘Li kien jisbaħ!’ minħabba l-biża’ li jkollok f’qalbek, u għal li jaraw għajnejk.

⁶⁸Il-Mulej ireġġagħkom lura fuq l-iġfna lejn l-Eġittu[40], minn dik l-istess triq li jien kont għedtlek: ‘Ma taraha qatt aktar’, u hemm, irġiel u nisa, toffru ruħkom għall-bejgħ b’ilsiera lill-għedewwa tagħkom, bla ma ħadd jixtrikom.”

⁶⁹Dan hu d-diskors dwar il-patt li l-Mulej ordna lil Mosè li jagħmel ma’ wlied Iżrael fl-art ta’ Mowab, barra l-patt li diġà kien għamel magħhom f’Ħoreb.