Read Maltese Bible with DC – IL-BIBBJA IL-KOTBA MQADDSA DEWTERONOMJU 3 Bible Online

DEWTERONOMJU 3 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 3

¹“Imbagħad ilwejna u bqajna mexjin mat-triq ta’ Basan; u Għog, sultan ta’ Basan, ħareġ għalina, hu u l-poplu tiegħu kollu, biex jitqabad magħna f’Edregħi.

²“U l-Mulej qalli: ‘La tibżax minnu. Jien erħejtu f’idek, lilu u l-poplu tiegħu kollu, u l-art kollha tiegħu, u nagħmel miegħu dak li għamilt ma’ Siħon, is-sultan tal-Amurrin, li jgħammar f’Ħesbon.’

³“U l-Mulej, Alla tagħna, tana wkoll f’idejna lil Għog, sultan ta’ Basan, u l-poplu tiegħu kollu; qtilnieh u ma ħallejnielu lil ħadd ħaj.

⁴Dakinhar għelibna l-ibliet tiegħu kollha, u ma kienx hemm belt li ma qbadnihiex minn idejhom, sittin belt, l-inħawi kollha ta’ Argob, is-saltna kollha ta’ Għog f’Basan.

⁵Dawn kienu kollha bliet iffortifikati, swar għolja, bwieb u staneg, barra l-ħafna bliet miftuħa.

⁶Qridniehom bħalma għamilna ’l Siħon, sultan ta’ Ħesbon; qridna l-ibliet kollha, irġiel, nisa u tfal.

⁷Għalina żammejna biss il-bhejjem u l-priża.

⁸“Dak iż-żmien ħadna l-art minn idejn iż-żewġ slaten tal-Amurrin in-naħa l-oħra tal-Ġordan, mill-wied tal-Arnon sal-muntanja Ħermon -

⁹is-Sidonin isejħu ’l Ħermon Sirjon, u l-Amurrin isejħulha Xenir -

¹⁰l-ibliet kollha tal-wita fl-għoljiet, Gilgħad kollu, u Basan sa Saleka u Edregħi, bliet ta’ Għog f’Basan.

¹¹Mill-bqija tar-Refajin kien baqa’ waħdu Għog, is-sultan ta’ Basan; it-tebut tiegħu tal-ħadid, li għadu jinsab f’Rabbat tal-Għammonin, hu twil disat idriegħ u erbgħa wiesa’ skont id-driegħ ta’ raġel.

¹²“Din hi l-art, mela, li ħadna dak iż-żmien: minn Għarogħer, li qiegħda fuq il-wied tal-Arnon, u nofs il-muntanji ta’ Gilgħad bl-ibliet tagħhom, u tajthom lir-Rubenin u lill-Gadin.

¹³Il-bqija ta’ Gilgħad u Basan kollu, is-saltna ta’ Għog, tajtha lil nofs it-tribù ta’ Manassi, jiġifieri n-naħa kollha ta’ Argob, l-art kollha ta’ Basan li jsejħulha art ir-Refajin.

¹⁴“Ġajir bin Manassi ħa n-naħa kollha ta’ Argob, f’Basan, sa truf il-Gesurin u l-Magħkatin, u semmieha b’ismu, Ħawwat-ġajir, sal-lum.

¹⁵Lil Makir tajtu ’l Gilgħad.

¹⁶Lir-Rubenin u ’l Gadin tajthom minn Gilgħad sal-wied tal-Arnon bil-fruntiera f’nofs il-wied, sal-wied ta’ Ġabbok, fi truf l-art tal-Għammonin;

¹⁷u l-Għaraba u l-Ġordan u l-medda kollha minn Kinneret sal-Baħar tal-Għaraba, il-Baħar il-Mielaħ, taħt ix-xaqliba tal-Pisga, in-naħa tal-Lvant.

¹⁸“F’dak iż-żmien tajtkom din l-ordni: ‘Il-Mulej, Alla tagħkom, riedkom tieħdu f’idejkom din l-art; mela intom, in-nies armati u kemm hemm fostkom nies ta’ ħila, tgħaddu lkoll qabel ħutkom ulied Iżrael;

¹⁹u jibqgħu biss fl-ibliet li tajtkom in-nisa u t-tfal u l-imrieħel tagħkom - għax naf li għandkom ħafna mrieħel -

²⁰sakemm il-Mulej jagħti l-mistrieħ lil ħutkom bħalkom, u huma wkoll jieħdu taħt idejhom l-art li l-Mulej, Alla tagħkom, se jagħtihom in-naħa l-oħra tal-Ġordan; u mbagħad terġgħu lura, kull wieħed lejn l-art tiegħu, li jiena tajtkom.’

²¹“Lil Ġożwè f’dak iż-żmien wissejtu u għedtlu: ‘Rajt b’għajnejk x’għamel il-Mulej, Alla tagħkom, lil dawk iż-żewġ slaten; hekk jagħmel il-Mulej lis-saltniet kollha, li int sejjer fihom.

²²Tibżax minnhom, għax il-Mulej, Alla tagħkom, jitqabad għalikom.’

²³“Dak iż-żmien tlabt ħniena lill-Mulej u għedtlu:

²⁴‘Sidi Mulej, int bdejt turi lill-qaddej tiegħek il-kobor tiegħek u l-qawwa ta’ driegħek; għax liema alla hemm fis-sema u fl-art li jista’ jagħmel opri bħal tiegħek u għandu l-ħila tiegħek?

²⁵Ħa naqsam in-naħa l-oħra u nara din l-art tajba li qiegħda n-naħa l-oħra tal-Ġordan, dawn il-muntanji sbieħ u l-Libanu.’

²⁶“Iżda l-Mulej inkorla għalija minħabba fikom, u ma semagħnix u qalli: ‘Biżżejjed, tkellimnix aktar fuq dan.

²⁷Itla’ fuq il-quċċata tal-Pisga u erfa’ għajnejk lejn il-Punent u t-Tramuntana, lejn in-Nofsinhar u l-Lvant, u ara b’għajnejk, għax m’intix se taqsam il-Ġordan.

²⁸Agħti l-kmand lil Ġożwè, qawwilu u saħħaħlu qalbu, għax hu se jgħaddi quddiem dan il-poplu, u jagħtihom l-art li tara.’

²⁹“U qgħadna fil-wied, biswit Bet-pegħor.