Read Maltese Bible with DC – IL-BIBBJA IL-KOTBA MQADDSA DEWTERONOMJU 31 Bible Online

DEWTERONOMJU 31 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 31

¹U Mosè temm jgħid dan il-kliem lil Iżrael kollu,

²u mbagħad qalilhom: “Illum jien għandi mija u għoxrin sena, u ma niflaħx nibqa’ dieħel u ħiereġ, u l-Mulej qalli: ‘Int ma taqsamx dan il-Ġordan.’

³Il-Mulej, Alla tiegħek, se jaqsam il-Ġordan quddiemek, jeqred dawk il-ġnus minn quddiemek u int tirithom; Ġożwè se jgħaddi quddiemek kif qallek il-Mulej,

⁴u l-Mulej jagħmlilhom bħalma għamel lil Siħon, u lil Għog, slaten tal-Amurrin, u lil arthom, u qeridhom.

⁵U l-Mulej jerħihom f’idejkom u tagħmlulhom skont l-ordni li jien tajtkom.

⁶Agħmlu l-ħila u qawwu qalbkom; tibżgħux u titregħdux quddiemhom; għax hu, il-Mulej, Alla tiegħek, se jimxi miegħek; mhux se jħallik, u anqas jitilqek.”

⁷U Mosè sejjaħ lil Ġożwè u qallu quddiem Iżrael kollu: “Agħmel il-ħila u qawwi qalbek, għax int iddaħħal lil dan il-poplu fl-art li l-Mulej ħalef lil missirijiethom li jagħtihielhom, u int tqassamhielhom.

⁸Il-Mulej jimxi quddiemek, hu jkun miegħek; ma jħallikx u anqas jitilqek; la tibżax u la taqtax qalbek.”

⁹U Mosè kiteb din il-liġi u taha lill-qassisin ulied Levi, li kienu jġorru l-arka tal-patt tal-Mulej, u lix-xjuħ kollha ta’ Iżrael.

¹⁰U Mosè ordnalhom u qalilhom: “Fi tmiem kull seba’ snin, fis-sena tal-maħfra, fil-festa tal-Għerejjex,

¹¹meta Iżrael kollu jiġi biex jara wiċċ il-Mulej, Alla tiegħek, fil-post li jkun għażel, taqra din il-liġi quddiem Iżrael kollu[43], b’mod li jisimgħuk.

¹²“Iġbor il-poplu, l-irġiel u n-nisa, it-tfal u l-barranin, li jkunu fl-ibliet tiegħek, biex jisimgħu u jitgħallmu, u jibżgħu mill-Mulej, Alla tagħkom, u jqisu li jagħmlu l-kliem kollu ta’ din il-liġi.

¹³U wliedhom li ma jafux, jisimgħu u jitgħallmu jibżgħu mill-Mulej, Alla tagħkom, il-jiem kollha li intom tgħixu fuq l-art li se taqsmu l-Ġordan biex teħduha f’idejkom.”

¹⁴U l-Mulej qal lil Mosè: “Ara, qorob żmien mewtek! Sejjaħ lil Ġożwè u ppreżentaw ruħkom fit-tinda tal-laqgħa biex nagħtih il-kmand.” U Mosè u Ġożwè marru u ppreżentaw ruħhom fit-tinda tal-laqgħa.

¹⁵U l-Mulej deher fit-tinda f’kolonna ta’ sħab u l-kolonna tas-sħab waqfet fuq il-bieb tat-tinda.

¹⁶U l-Mulej qal lil Mosè: “Ara, int se tistrieħ ma’ missirijietek, u dan il-poplu għad iqum u jiżni mal-allat tal-barranin ta’ din l-art, li hu sejjer fiha u li jkunu f’nofsu. U jitlaqni u jikser il-patt tiegħi li jien għamilt miegħu.

¹⁷U dakinhar tixgħel il-korla tiegħi għalih, nitlaqhom u naħbi wiċċi minnhom, u hu jsir priża għall-ikel u jilħquh ħafna ħsarat u dwejjaq. Imbagħad dakinhar il-poplu jgħid: ‘Jaqaw mhux għax ma għadux Alla tiegħi f’nofsi laħquni dawn il-ħsarat kollha?’

¹⁸Imma jien naħbi wiċċi għalkollox dakinhar minħabba l-ħażen li jkun għamel meta dawwar wiċċu lejn allat oħra.

¹⁹Mela issa ikteb din l-għanja u għallimha lil ulied Iżrael; qegħedha f’fommhom biex din l-għanja tkun xhud għalija fost ulied Iżrael.

²⁰Meta nkun wassaltu fl-art li jien ħlift lil missirijietu, art tnixxi ħalib u għasel, hu jiekol, jixba’ u jismen, u jdur lejn allat oħra, u jservuhom u lili jkasbruni u jiksru l-patt tiegħi.

²¹Għalhekk meta jkunu laħquh ħafna ħsarat u dwejjaq twieġbu b’din il-għanja f’wiċċu b’xhieda; għax ma tintesiex minn fomm nislu. Għax jien sa minn qabel ma ndaħħlu fl-art li ħliftlu, diġà naf x’għandu f’qalbu u x’għad jagħmel.”

²²U Mosè dakinhar kiteb din l-għanja u għallimha lil ulied Iżrael.

²³Imbagħad il-Mulej ordna lil Ġożwè bin Nun u qallu: “Agħmel il-ħila u qawwi qalbek, għax int għandek iddaħħal lil ulied Iżrael fl-art li jien ħliftilhom; jien inkun miegħek.”

²⁴U ġara li malli Mosè temm jikteb fi ktieb sal-aħħar il-kliem ta’ din il-liġi,

²⁵ordna lil-Leviti, li jġorru l-arka tal-patt tal-Mulej, u qalilhom:

²⁶“Ħudu dan il-ktieb ta’ din il-liġi u qegħduh maġenb l-arka: tal-patt tal-Mulej[44], Alla tagħkom, u jkun hemm b’xhieda għalik.

²⁷Għax jien naf kemm int stinat u rasek iebsa. Jekk meta għadni ħaj fostkom irvillajtu llum kontra l-Mulej, kemm aktar wara mewti?

²⁸“Iġbruli madwari x-xjuħ kollha tat-tribujiet kollha tagħkom, u l-uffiċjali tagħkom, u ngħidilhom b’mod li jisimgħu dan il-kliem, u jkunu xhud tagħhom is-smewwiet u l-art.

²⁹Għax jien naf li wara mewti titħassru għalkollox u toħorġu mit-triq li ordnajtilkom; u jilħaqkom id-deni fiż-żmien li ġej, għax tagħmlu l-ħażen f’għajnejn il-Mulej u tinkuh b’kulma jagħmlu idejkom.”

³⁰U Mosè tenna, b’mod li tisimgħu l-ġemgħa kollha ta’ Iżrael, il-kliem ta’ din l-għanja[45] sal-aħħar: