Read Maltese Bible with DC – IL-BIBBJA IL-KOTBA MQADDSA DEWTERONOMJU 33 Bible Online

DEWTERONOMJU 33 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 33

¹Din hi l-barka li biha bierek Mosè[49], il-bniedem ta’ Alla, lil ulied Iżrael, qabel ma miet.

²U qalilhom: “Ġie mis-Sinaj il-Mulej, u dehrilna minn Xegħir; idda mill-għolja ta’ Faran, ġie minn Meribat-kades, u fuq lemintu ħuġġieġa nar.

³Tassew iħobb il-poplu tiegħu, il-qaddisin kollha tiegħu f’idejk, u huma f’riġlejk joqogħdu, kull wieħed jiġbor kliemek,

⁴il-liġi li Mosè tana. Wirtu l-ġemgħa ta’ Ġakobb,

⁵u hu s-sultan f’Ġesurun[50], meta ltaqgħu l-prinċpijiet tal-poplu flimkien mat-tribujiet ta’ Iżrael.

⁶Jgħix Ruben u ma jmutx, imma jkun żgħir fil-għadd.

⁷U dan qal għal Ġuda: Isma’, Mulej, leħen Ġuda, u wasslu għal ma’ niesu, għalih innifsu b’idejh jiġġieled; int l-għajnuna kontra l-għedewwa tiegħu.

⁸U għal Levi qal: It-Tummim u l-Urim[51] tiegħek, agħti lill-bniedem ta’ mħabbtek, li f’Massa int ġarrabt, u tlewwimt miegħu ħdejn l-ilma ta’ Meriba.

⁹Li qal għal missieru u ommu; ‘Ma rajthomx’; u ’l ħutu m’għarafhomx; u ’l uliedu ma qishomx. Għax huma ħarsu kliemek, u żammew il-patt tiegħek.

¹⁰Jgħallmu l-preċetti tiegħek lil Ġakobb, u l-liġi tiegħek lil Iżrael. Joffru inċens lil imnifsejk, u s-sagrifiċċju tal-ħruq fuq l-artal tiegħek.

¹¹Bierek, Mulej, lil Levi, u ilqa’ xogħol idejh. Kisser ġenbejn l-għedewwa tiegħu, ta’ dawk li jobogħduh, biex ma jqumux.

¹²Għal Benjamin qal: Il-maħbub tal-Mulej jgħammar b’moħħu mistrieħ: Alla l-għoli dejjem jostru, u taħt ġwenħajh hu jgħammar.

¹³U għal Ġużeppi qal: Il-barka tal-Mulej fuq artu, bil-ġid mill-għoli tas-smewwiet, u minn qiegħ l-art mifrux minn taħt,

¹⁴bil-ġid tal-frott tax-xemx,

¹⁵u bl-aħjar ġid imnibbet bl-oqsma, u bl-aħjar ġid mill-iġbla tal-qedem, u bil-frott tal-għoljiet ta’ dejjem,

¹⁶bil-ġid tal-art u kulma fiha, u bl-għaxqa ta’ min jgħammar fl-għollieq[52]. Ħalli jinżlu l-barkiet fuq ras Ġużeppi, fuq il-qurriegħa tal-magħżul fost ħutu.

¹⁷Il-glorja tiegħu bħal ta’ gendus tal-bikri, qrunu l-qrun ta’ gendus selvaġġ; bihom il-popli jidrob, u jgerrixhom sa truf l-art. Hekk huma l-eluf ta’ eluf ta’ Efrajm, hekk huma l-eluf ta’ Manassi.

¹⁸U għal Żebulun qal: Ifraħ Żebulun fi ħruġek, u int Issakar fl-għerejjex tiegħek.

¹⁹Il-popli għal fuq il-muntanja jsejħu, u hemm joffru sewwa s-sagrifiċċji; u minn tifwir il-baħar jerdgħu[53], u mill-għana moħbi fir-ramel.

²⁰U għal Gad qal: Imbierek min ikabbar lil Gad! Bħal iljun jimtedd, u jqarmeċ id-driegħ u r-ras.

²¹Xeħet għajnejh fuq l-aħjar tal-art; Sehem ta’ prinċep[54] kien hemm għalih; iżda ħareġ l-ewwel mal-kbarat tal-poplu; u għamel il-ġustizzja tal-Mulej, u l-ħaqq tiegħu ma’ Iżrael.”

²²U għal Dan qal: Dan ferħ ta’ ljun[55], jaqbeż jiġri minn Basan.

²³U għal Naftali qal: Naftali mfawwar bil-favuri; mimli bil-barka tal-Mulej; wirtek il-baħar[56] u n-Nofsinhar.

²⁴U għal Aser qal: Aser, l-aktar imbierek fost l-ulied, ikun il-maħbub fost ħutu, u jaħsel riġlejh fiż-żejt.

²⁵Ħadid u bronż l-istaneg tiegħek, u saħħtek kemm iddum ħaj.

²⁶M’hemmx Alla bħalu, bħal Alla ta’ Ġesurun[57], biex jgħinek; jaqsam riekeb is-smewwiet, fuq is-sħab bil-glorja tiegħu.

²⁷Kennek Alla ta’ żmien il-qedem, b’dirgħajh iwieżnek minn taħt. Minn quddiemek l-għedewwa jkeċċi, u lilek jordna u jgħid: ‘Eqridhom’.

²⁸U straħ Iżrael fil-kwiet bla biża’; u weħidha għaliha għajn Ġakobb, f’art l-inbid u l-qmuħ, u n-nida tqattar minn smewwietha.

²⁹Hieni int, ja Iżrael; min hu bħalek, poplu li ħelsek il-Mulej? Hu t-tarka ta’ għajnuntek, u x-xabla ta’ rebħietek. U jżiegħlu bik l-għedewwa tiegħek, int u tirfes fuq għoljiethom.”