Read Maltese Bible with DC – IL-BIBBJA IL-KOTBA MQADDSA DEWTERONOMJU 5 Bible Online

DEWTERONOMJU 5 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 5

¹U Mosè sejjaħ lil Iżrael kollu u qalilhom: “Isma’, Iżrael, il-liġijiet u d-digrieti li jien qiegħed ngħidilkom f’widnejkom illum, u tgħallimhom u qis li tħarishom.

²Il-Mulej, Alla tagħna, għamel patt magħna f’Ħoreb.

³Mhux ma’ missirijietna għamlu dan il-patt, imma magħna, magħna li qegħdin hawn illum ilkoll ħajjin.

⁴Wiċċ imb wiċċ tkellem magħkom il-Mulej minn fuq il-muntanja, minn ġon-nar.

⁵Jien kont qiegħed bejn il-Mulej u bejnkom f’dak il-waqt, biex ngħarrafkom bil-kelma tal-Mulej, għaliex meta rajtu n-nar bżajtu, u ma tlajtux fuq il-muntanja. U hu qalilkom:

⁶‘Jiena l-Mulej li ħriġtek mill-art tal-Eġittu, minn dar il-jasar.

⁷‘Ma jkollokx allat oħra ħliefi;

⁸ma tagħmel ebda idolu jew xbieha ta’ ebda ħlejqa li hemm fl-għoli tas-smewwiet, jew taħt l-art, jew fl-ibħra taħt l-art.

⁹Tadurahomx u sservihomx. Għax jiena l-Mulej, Alla tiegħek, Alla għajjur, li nikkastiga l-ulied għad-dnubiet ta’ missirijiethom sat-tielet u r-raba’ ġenerazzjoni ta’ min jobgħodni[9].

¹⁰U nagħmel ħniena għal elf ġenerazzjoni ma’ min iħobbni u jħares il-liġijiet tiegħi.

¹¹Issejjaħx l-isem tal-Mulej, Alla tiegħek, fil-batal, għaliex il-Mulej ma jħallix bla kastig lil min isejjaħ ismu fil-batal.

¹²Ħares jum is-Sibt u qaddsu bħalma ordnalek il-Mulej, Alla tiegħek.

¹³Sitt ijiem tista’ taħdem, u tagħmel ix-xogħol kollu tiegħek.

¹⁴Imma s-seba’ jum hu l-mistrieħ tal-Mulej, Alla tiegħek: ebda xogħol ma għandek tagħmel dak in-nhar, la int, la ibnek u lanqas bintek; la l-qaddej u lanqas il-qaddejja tiegħek; la l-barri, la l-ħmar u ebda waħda mill-bhejjem tiegħek; lanqas il-barrani li jgħix f’beltek; ħalli jistrieħu bħalek il-qaddejja tiegħek, irġiel u nisa.

¹⁵‘Ftakar li int kont ilsir fl-art tal-Eġittu, u l-Mulej, Alla tiegħek, ħarġek minn hemm b’id qawwija u bi driegħ merfugħ; għalhekk il-Mulej, Alla tiegħek, ordnalek li tħares jum is-Sibt.

¹⁶‘Weġġaħ lil missierek u ’l ommok, bħalma l-Mulej, Alla tiegħek, ordnalek, sabiex tgħix ħajja twila, u jkollok ir-risq fl-art li l-Mulej, Alla tiegħek, se jagħtik.

¹⁷‘La toqtolx.

¹⁸‘La tagħmilx adulterju.

¹⁹‘La tisraqx.

²⁰‘La tixhidx fil-falz kontra għajrek.

²¹‘La tixtieqx il-mara ta’ għajrek. La tixxennaqx għal dar għajrek: għar-raba’ tiegħu, għall-qaddej tiegħu, għall-qaddejja tiegħu, għall-gendus tiegħu, għall-ħmar tiegħu, għal xejn milli għandu għajrek.’

²²“Dan il-kliem qalu l-Mulej b’leħen qawwi lill-ġemgħa kollha tagħkom minn fuq il-muntanja, minn ġon-nar, minn ġos-sħaba u ċ-ċpar iswed, u xejn aktar ma żied. U kitibhom fuq żewġ twavel tal-ġebel, u tahom lili.

²³“U ġara li, kif smajtu l-leħen minn ġod-dalma u l-muntanja kienet tħeġġeġ bin-nar, resqu lejja l-prinċpijiet tat-tribujiet tagħkom u x-xjuħ tagħkom

²⁴u qaluli: ‘Ara, il-Mulej, Alla tagħna, wriena s-sebħ u l-kobor tiegħu, u semmagħna leħnu minn ġon-nar. Illum rajna li Alla jista’ jkellem lill-bniedem u l-bniedem jibqa’ ħaj.

²⁵U issa għaliex għandna mmutu? Għax se jiblagħna dan in-nar il-kbir. Jekk nibqgħu nisimgħu aħna leħen il-Mulej, Alla tagħna, se mmutu.

²⁶Għax min minn fost kemm huma l-bnedmin, qatt sama’ bħalna leħen Alla ħaj jitkellem u baqa’ ħaj?

²⁷Mela ersaq int, u isma’ kulma jgħid il-Mulej, Alla tagħna, imbagħad int tgħidilna kulma jgħidlek il-Mulej, Alla tagħna, u aħna nisimgħuh u nagħmluh.’

²⁸“U l-Mulej sama’ kliemkom jidwi, intom u tkellmuni, u l-Mulej qalli: ‘Jien smajt jidwi l-kliem li qallek dan il-poplu; sewwa kulma qalulek.

²⁹Mhux li kien ikollhom dan il-ħsieb, li jibżgħu minni, u jħarsu kulma nordnalhom għal ħajjithom kollha, u jkollhom ir-risq, huma u wliedhom, għal dejjem.

³⁰Mur għidilhom: Erġgħu lura lejn it-tined tagħkom.

³¹‘Imma int, ibqa’ hawn quddiemi, u jien ngħidlek il-kmandamenti u l-liġijiet u d-digrieti li għandek tgħallimhom, biex jagħmluhom fl-art li jiena se nagħtihom biex jirtuha.’

³²“Mela qisu li tħarsuhom, kif ordnalkom il-Mulej, Alla tagħkom. La tilwux la lejn ix-xellug u lanqas lejn il-lemin.

³³Imxu fit-triq kollha li ordnalkom il-Mulej, Alla tagħkom, sabiex tgħixu u jkollkom ir-risq, u jkollkom ħajja twila fuq l-art li se tieħdu.