Read Maltese Bible with DC – IL-BIBBJA IL-KOTBA MQADDSA DEWTERONOMJU 6 Bible Online

DEWTERONOMJU 6 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 6

¹“U din hi l-ordni, il-liġijiet u d-digrieti li l-Mulej, Alla tagħkom, ordnali ngħallimkom biex tħarsuhom fl-art li se tidħlu fiha biex teħduha f’idejkom:

²ibża’ mill-Mulej, Alla tiegħek, billi int, ibnek u bin ibnek, tħarsu dejjem il-liġijiet u l-kmandamenti kollha tiegħu, li jien qiegħed nagħtik, biex ikollok għomor twil.

³Isma’, o Iżrael, u ħu ħsieb agħmilhom, biex ikollok il-ġid u toktor ħafna, bħalma wiegħed il-Mulej, Alla ta’ missirijietek, li jagħtik art tnixxi ħalib u għasel.

⁴“Isma’, o Iżrael: Alla tagħna l-Mulej, il-Mulej waħdu[10].

⁵Ħobb, mela, lill-Mulej, Alla tiegħek, b’qalbek kollha[11], b’ruħek kollha u b’saħħtek kollha.

⁶Żomm f’qalbek dan il-kliem u dawn il-kmandamenti li qiegħed nagħtik illum.

⁷Tennihom lil uliedek, u tkellem fuqhom meta tkun f’darek, u meta tkun miexi fit-triq, u meta timtedd, u meta tqum;

⁸torbothom b’sinjal ma’ idek u ddendilhom bejn għajnejk[12].

⁹U tiktibhom mal-ġnub tal-bibien u fuq il-bwieb tiegħek.

¹⁰“Il-Mulej, Alla tiegħek, idaħħlek fl-art li ħalef lil missirijietek, lil Abraham, lil Iżakk, u lil Ġakobb, li jagħtiha lilek, bliet kbar u sbieħ li int ma bnejtx;

¹¹u djar mimlija b’kull ġid li ma ħżintx int; bjar imħaffrin, li ma ħaffirthomx int; dwieli u żebbuġ li ma ħawwilthomx int; u tiekol u tixba’.

¹²Qis li ma tinsiex lill-Mulej, li ħarġek mill-Eġittu, minn dar il-jasar.

¹³Tibża’ mill-Mulej, Alla tiegħek, lilu sservi u taħlef b’ismu.

¹⁴Tmurx wara allat oħra, l-allat tal-ġnus l-oħra ta’ madwarek.

¹⁵Għax il-Mulej, Alla tiegħek, hu Alla għajjur f’nofsok, li ma tixgħelx għalik il-qilla tal-Mulej, Alla tiegħek, u jeqirdek minn wiċċ l-art.

¹⁶“La ġġarrbux lill-Mulej, Alla tagħkom, bħalma ġarrabtuh f’Massa.

¹⁷Ħarsu sewwa l-liġijiet tal-Mulej, Alla tagħkom, u l-preċetti u l-kmandamenti li tak.

¹⁸Int tagħmel is-sewwa u t-tajjeb f’għajnejn il-Mulej, biex ikollok ir-risq, u tidħol u tieħu f’idejk l-art tajba li l-Mulej ħalef lil missirijietek.

¹⁹Imbagħad tkeċċi ’l barra l-għedewwa tiegħek minn quddiemek bħalma tkellem il-Mulej.

²⁰“Meta ibnek għada pitgħada jistaqsik, u jgħidlek: ‘X’inhuma dawn il-preċetti, il-kmandamenti u d-digrieti li takom il-Mulej, Alla tagħna?’

²¹int twieġeb lil ibnek: ‘Konna lsiera tal-Fargħun fl-Eġittu, u ħariġna l-Mulej mill-Eġittu bil-qawwa ta’ idejh.

²²U l-Mulej għamel quddiem għajnejna sinjali u għeġubijiet kbar bi ħsara għall-Eġittu, għall-Fargħun u daru kollha.

²³Lilna ħariġna minn hemm biex iġibna fl-art, u jagħtihielna kif ħalef lil missirijietna.

²⁴Il-Mulej ordnalna li nħarsu dawn il-kmandamenti kollha u li nibżgħu mill-Mulej, Alla tagħna, biex ikollna r-riżq il-jiem kollha ta’ ħajjitna bħalma aħna llum.

²⁵U dan ikun is-sewwa tagħna: li nqisu li nagħmlu din il-liġi kollha quddiem il-Mulej, Alla tagħna, bħalma ordnalna hu.’