Read Maltese Bible with DC – IL-BIBBJA IL-KOTBA MQADDSA DEWTERONOMJU 8 Bible Online

DEWTERONOMJU 8 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 8

¹“Qis li tħares u tagħmel kull kmandament li jien qiegħed nagħtik illum, sabiex tgħix u toktor, u tidħol u tieħu l-art f’idejk, l-art li l-Mulej ħalef lil missirijietek.

²Ftakar fil-mixja kollha li mexxiek il-Mulej, Alla tiegħek, matul dawn l-erbgħin sena fid-deżert, biex iċekknek u jġarrbek, ħalli jkun jaf x’għandek f’qalbek, jekk tridx toqgħod għall-kmandamenti tiegħu jew le.

³Huwa ċekknek, ried li tbati l-ġuħ, imbagħad temgħek il-manna, li la int u lanqas missirijietek ma kontu qatt tafu biha, biex jurik li mhux bil-ħobż biss jgħix il-bniedem, imma b’dak kollu li joħroġ minn fomm il-Mulej, b’dan jgħix il-bniedem.

⁴Il-mantar tiegħek ma tkiddx minn fuqek, u riġlejk ma ntefħux f’dawn l-erbgħin sena.

⁵Mela għandek tkun taf u ddaħħal f’qalbek li l-Mulej, Alla tiegħek, jgħakksek, bħalma l-missier jgħakkes lil ibnu,

⁶biex int tħares il-kmandamenti tal-Mulej, Alla tiegħek, u timxi fi triqatu u tibża’ minnu.

⁷Għaliex il-Mulej, Alla tiegħek, se jdaħħlek f’art tajba, art ta’ widien ta’ ilma, ta’ għejun u gliegel, li jferrgħu fil-witat u l-muntanji;

⁸art tal-qamħ, tax-xgħir, tad-dwieli, tat-tin, tar-rummien; art taż-żebbuġ, taż-żejt, tal-għasel;

⁹art fejn ma tikolx bl-għaks, fejn xejn ma jkun jonqsok, art fejn il-blat hu ħadid, u mill-muntanji taqtgħu l-bronż.

¹⁰U tiekol, u tixba’ u tbierek il-Mulej, Alla tiegħek, għall-art tajba li tak.

¹¹“Qis li ma tinsiex lill-Mulej, Alla tiegħek, li ma tinsiex tħares il-kmandamenti u d-digrieti u l-liġijiet tiegħu, li llum jien qiegħed nordnalek.

¹²Qis li meta tiekol u tixba’, u tibni djar sbieħ u toqgħod fihom, u joktru l-baqar u l-imrieħel tiegħek,

¹³u jiżdiedu l-fidda u d-deheb, u jikber kulma għandek;

¹⁴qis li ma titkabbarx qalbek u tinsa l-Mulej, Alla tiegħek, li ħarġek mill-art tal-Eġittu, mill-art tal-jasar.

¹⁵Hu li mexxiek fid-deżert kbir u jwaħħax, mimli sriep velenużi u skorpjuni, art niexfa bla ilma xejn, li ħariġlek l-ilma mill-blata taż-żnied,

¹⁶li temgħek il-manna fid-deżert, li missirijietek ma kienu jafu biha xejn, bil-ħsieb li jgħakksek u jġarrbek, biex imbagħad jagħtik il-ġid.

¹⁷Ma għandekx tgħid f’qalbek: ‘Il-ħila tiegħi u l-qawwa ta’ idi kisbuli dan il-ġid kollu.’

¹⁸Ftakar fil-Mulej, Alla tiegħek, għax hu tak il-qawwa biex tikseb dan il-ġid, biex iżomm il-patt tiegħu li ħalef lil missirijietek, bħalma hu llum.

¹⁹Jekk inti tinsa l-Mulej, Alla tiegħek, u tmur wara allat oħra, tadurahom u tinxteħet fl-art quddiemhom, jien ngħidilkom mil-lum stess, tinqerdu għalkollox;

²⁰bħall-ġnus li qeridhom il-Mulej minn quddiemek, hekk tinqerdu, għax ma tkunux smajtu l-kelma tal-Mulej, Alla tagħkom.