Read Maltese Bible with DC – IL-BIBBJA IL-KOTBA MQADDSA ĠWANNI 11 Bible Online

ĠWANNI 11 - Maltese Bible with DC – IL-BIBBJA IL-KOTBA MQADDSA bible

ĠWANNI 11

¹Kien hemm wieħed marid, Lazzru minn Betanja[42], ir-raħal ta’ Marija u oħtha Marta.

²Marija kienet dik li dilket il-Mulej b’żejt ifuħ u xxuttatlu riġlejh b’xuxitha; u Lazzru, il-marid, kien ħuha.

³Iż-żewġ nisa bagħtu jgħidu lil Ġesù: “Mulej, ara, ħabibek marid.”

⁴Meta sama’ l-aħbar Ġesù qal: “Din mhijiex marda tal-mewt, iżda hi għall-glorja ta’ Alla, biex biha tingħata glorja lill-Iben ta’ Alla.”

⁵Ġesù kien iħobbhom lil Marta u lil oħtha u lil Lazzru.

⁶Meta sama’ li dan marad, baqa’ jumejn oħra fejn kien,

⁷u mbagħad qal lid-dixxipli: “Ejjew nerġgħu mmorru l-Lhudija.”

⁸Qalulu d-dixxipli: “Rabbi[43], il-Lhud għadhom kemm kienu qegħdin ifittxu li jħaġġruk, u int rieġa’ sejjer hemm?”

⁹Weġibhom Ġesù: “Mhux tnax-il siegħa fiha l-ġurnata? Sakemm wieħed jimxi binhar, ma jitfixkilx, għax ikun qiegħed jara d-dawl ta’ din id-dinja.

¹⁰Imma jekk jimxi billejl, jitfixkel, għax ma jkollux dawl.”

¹¹Qalilhom hekk, u mbagħad issokta jgħidilhom: “Ħabibna Lazzru rieqed; iżda ħa mmur u nqajmu.”

¹²Qalulu d-dixxipli: “Mulej, jekk inhu rieqed, jiġifieri se jfiq.”

¹³Iżda Ġesù kien tkellem mill-mewt tiegħu, u huma ħaduha li kien qalilhom fuq l-irqad ta’ meta wieħed ikun bin-ngħas.

¹⁴Imbagħad qalilhom ċar u tond: “Lazzru miet.

¹⁵U jiena nifraħ minħabba fikom li ma kontx hemm, ħalli temmnu. Iżda ejjew immorru sa ħdejh.”

¹⁶Tumas, imlaqqam it-Tewmi, qal lil sħabu d-dixxipli: “Immorru aħna wkoll ħa mmutu miegħu.”

¹⁷Meta wasal, Ġesù sab li Lazzru kien ġa ilu erbat ijiem fil-qabar.

¹⁸Betanja kienet qrib Ġerusalemm, xi ħmistax-il stadju[44] ’l hemm minnha.

¹⁹Ħafna Lhud kienu ġew għand Marta u Marija biex ifarrġuhom minħabba ħuhom.

²⁰Kif, mela, semgħet li kien ġej Ġesù, Marta ħarġet tilqgħu, iżda Marija baqgħet id-dar.

²¹Marta qalet lil Ġesù: “Mulej, kieku kont hawn, ħija ma kienx imut.

²²Imma wkoll issa, jiena naf li kulma int titlob lil Alla, Alla jagħtihulek.”

²³Ġesù qalilha: “Ħuk jerġa’ jqum!”

²⁴Qaltlu Marta: “Jiena naf li jerġa’ jqum, fil-qawmien mill-imwiet fl-aħħar jum.”

²⁵Qalilha Ġesù: “Jien hu l-qawmien u l-ħajja. Kull min jemmen fija, ukoll jekk imut, jgħix;

²⁶u kull min jgħix u jemmen fija, dan ma jmut qatt. Temmnu inti dan?”

²⁷“Iva, Mulej,” weġbitu, “Jiena nemmen li inti l-Messija, l-Iben ta’ Alla, dak li ġie fid-dinja.”

²⁸Kif qalet dan, marret issejjaħ lil oħtha Marija u minn taħt l-ilsien qaltilha: “L-Imgħallem hawn, u qiegħed isejjaħlek.”

²⁹Dik, malli semgħetha, qamet minnufih u marret ħdejh.

³⁰Ġesù kien għadu ma daħalx fir-raħal, imma baqa’ fejn kienet ġiet tiltaqa’ miegħu Marta.

³¹Il-Lhud li kienu d-dar ma’ Marija biex ifarrġuha, kif rawha tqum malajr u toħroġ, marru warajha, għax stħajluha sejra lejn il-qabar biex toqgħod tibki hemm.

³²Meta Marija waslet fejn kien Ġesù u ratu nxteħtet f’riġlejh, tgħidlu: “Mulej, kieku kont hawn, ħija ma kienx imut.”

³³Ġesù, kif ra lilha tibki u l-Lhud, li ġew magħha, jibku wkoll, ħass ruħu mqanqal u tħawwad ħafna.

³⁴“Fejn qegħedtuh?” staqsiehom. Huma weġbuh: “Mulej, ejja u ara.”

³⁵U Ġesù beka.

³⁶Għalhekk il-Lhud qalu: “Ara kemm kien iħobbu!”

³⁷Iżda xi wħud minnhom qalu: “Ma setax dan il-bniedem, li fetaħ għajnejn l-agħma, jagħmel ukoll li dan ma jmutx?”

³⁸Ġesù ħass ruħu mqanqal għal darb’ oħra u resaq lejn il-qabar. Dan kien għar magħluq bi blata fuqu[45].

³⁹Ġesù qal: “Neħħu l-blata.” Marta, oħt il-mejjet, qaltlu: “Mulej, issa beda jrejjaħ; ġa ilu erbat ijiem mejjet.”

⁴⁰Qalilha Ġesù: “Ma għedtlikx li jekk inti temmen, tara l-glorja ta’ Alla?”

⁴¹Imbagħad neħħew il-blata. Ġesù rafa’ għajnejh ’il fuq u qal: “Missier, irroddlok ħajr li smajtni.

⁴²Kont naf li inti dejjem tismagħni, imma għedt dan minħabba n-nies li hawn madwari, biex huma jemmnu li inti bgħattni.”

⁴³Kif qal hekk, għajjat b’leħen għoli: “Lazzru, oħroġ!”

⁴⁴U dak li kien mejjet ħareġ, b’idejh u riġlejh infaxxati u b’maktur ma’ wiċċu. Ġesù qalilhom: “Ħollulu l-faxex u ħalluh imur.”

⁴⁵Ħafna mil-Lhud, li kienu ġew għand Marija u raw dak li għamel Ġesù, emmnu fih.

⁴⁶Imma xi wħud minnhom marru għand il-Fariżej u qalulhom x’kien għamel Ġesù.

⁴⁷Għalhekk il-qassisin il-kbar u l-Fariżej laqqgħu s-Sinedriju u qalu: “X’sejrin nagħmlu? Għax dan il-bniedem qiegħed jagħmel ħafna sinjali.

⁴⁸Jekk inħalluh sejjer hekk, kulħadd jemmen fih, u jiġu r-Rumani, u jeqirdulna kemm it-tempju[46] u kemm il-ġens tagħna.”

⁴⁹Imma wieħed minnhom, Kajfa, li kien il-qassis il-kbir dik is-sena, qalilhom: “Intom ma tafu xejn.

⁵⁰Anqas ma intom tqisu li jaqblilkom jekk imut bniedem wieħed għall-poplu u mhux jinqered il-ġens kollu.”

⁵¹Issa dan ma qalux minn moħħu, imma billi dik is-sena inzerta kien il-qassis il-kbir, huwa kien imnebbaħ u ħabbar li Ġesù kellu jmut għall-ġens tiegħu,

⁵²u mhux għall-ġens tiegħu biss, imma wkoll biex jiġbor ġemgħa waħda l-ulied ta’ Alla li kienu mxerrdin.

⁵³Minn dak in-nhar ’il quddiem bdew jiftiehmu bejniethom biex joqtluh.

⁵⁴Ġesù ma għaddiex aktar bid-dieher f’nofs il-Lhud, imma telaq minn hemm lejn il-kampanja qrib id-deżert, f’belt jisimha Efrajm[47], u qagħad hemmhekk mad-dixxipli tiegħu.

⁵⁵Kien wasal l-Għid tal-Lhud, u ħafna nies mill-kampanja telgħu Ġerusalemm qabel l-Għid għar-riti tal-purifikazzjoni.

⁵⁶Huma fittxew lil Ġesù, u bdew jgħidu bejniethom fit-tempju: “Intom x’taħsbu? Tgħid, jitla’ għall-festa?”

⁵⁷Issa l-qassisin il-kbar u l-Fariżej taw ordni li, jekk xi ħadd ikun jaf fejn qiegħed, imur jgħidilhom, biex huma jiġu jarrestawh.