Read Maltese Bible with DC – IL-BIBBJA IL-KOTBA MQADDSA ĠWANNI 12 Bible Online

ĠWANNI 12 - Maltese Bible with DC – IL-BIBBJA IL-KOTBA MQADDSA bible

ĠWANNI 12

¹Sitt ijiem qabel il-festa tal-Għid Ġesù mar Betanja, fejn kien joqgħod Lazzru li Ġesù kien qajjem mill-imwiet.

²Hemmhekk għamlulu ikla; Marta bdiet isservi, waqt li Lazzru kien wieħed minn dawk li qagħdu fuq il-mejda ma’ Ġesù.

³Marija ħadet libbra[48] fwieħa tan-nard[49] pur, tiswa ħafna, u dilket biha riġlejn Ġesù, imbagħad ixxuttathomlu b’xagħarha; u d-dar imtliet bir-riħa tfuħ.

⁴Ġuda l-Iskarjota, wieħed mid-dixxipli tiegħu, dak li kien se jittradih, qal:

⁵“Din il-fwieħa għax ma nbigħetx tliet mitt dinar biex jingħataw lill-foqra?”

⁶Issa dan qalu mhux għax kien jimpurtah mill-foqra, imma għax kien ħalliel, u, billi hu kien il-kaxxier, kien jisraq kulma kienu jaqilgħu.

⁷Qallu Ġesù: “Ħalliha, din il-fwieħa kienet refgħetha għal jum id-difna tiegħi.

⁸Il-foqra dejjem issibuhom magħkom, imma lili mhux dejjem issibuni.”

⁹Kotra kbira ta’ Lhud saru jafu li hu kien qiegħed hemm, u marru mhux biss minħabba Ġesù, imma wkoll biex jaraw lil Lazzru, li hu kien qajjem mill-imwiet.

¹⁰Għalhekk il-qassisin il-kbar ftiehmu li joqtlu lil Lazzru wkoll,

¹¹għax minħabba fih ħafna mil-Lhud bdew jitilquhom u jemmnu f’Ġesù.

¹²L-għada, il-folol ta’ nies[50] li kienu ġew għall-festa, kif semgħu li Ġesù kien ġej Ġerusalemm,

¹³ħadu l-friegħi tal-palm u ħarġu jilqgħuh. U bdew jgħajtu: “Hosanna! [51] Imbierek min ġej f’isem il-Mulej! Imbierek is-sultan ta’ Iżrael!”

¹⁴Ġesù sab felu u rikeb fuqu, kif hemm miktub,

¹⁵“Tibżax, bint Sijon! Ara, ġej is-sultan tiegħek, riekeb fuq felu ta’ ħmara.”

¹⁶Għall-ewwel id-dixxipli tiegħu ma fehmuhomx dawn il-ħwejjeġ; iżda meta Ġesù kien igglorifikat, imbagħad ftakru li dan kien inkiteb fuqu, u hekk għamlulu.

¹⁷U fuq dan tat xhieda l-folla tan-nies li kienet miegħu meta sejjaħ lil Lazzru mill-qabar u qajmu mill-imwiet.

¹⁸Kien għalhekk ukoll li n-nies ħarġet tilqgħu, għax semgħet li kien għamel sinjal bħal dan.

¹⁹Imma l-Fariżej bejniethom qalu: “Qegħdin taraw kif m’intom se tagħmlu xejn! Ara, id-dinja kollha sejra warajh!”

²⁰Fost dawk li telgħu biex iqimu lil Alla fil-festa kien hemm xi Griegi[52].

²¹Dawn marru għand Filippu li kien minn Betsajda tal-Galilija, u talbuh: “Sinjur, nixtiequ naraw lil Ġesù.”

²²Filippu mar jgħid lil Indrì, u mbagħad Indrì u Filippu marru jgħidu lil Ġesù.

²³U Ġesù weġibhom: “Waslet is-siegħa li fiha Bin il-bniedem ikun igglorifikat.

²⁴Tassew tassew ngħidilkom, jekk il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott.

²⁵Min iħobb lil ħajtu jitlifha; imma min jobgħod lil ħajtu f’din id-dinja jħarisha għall-ħajja ta’ dejjem.

²⁶Jekk xi ħadd irid jaqdini, hu għandu jimxi warajja; u fejn inkun jien, hemm ukoll ikun il-qaddej tiegħi. Min jaqdi lili, il-Missier jagħtih ġieħ.

²⁷“Issa qiegħed inħoss ruħi mħawda. U x’naqbad ngħid? Missier, eħlisni minn din is-siegħa? Imma jien għalhekk ġejt: għal din is-siegħa.

²⁸Missier, agħti glorja lil ismek.” Dak il-ħin instama’ leħen mis-sema: “Jiena diġà gglorifikajtu, u nerġa’ nigglorifikah.”

²⁹In-nies li kienu hemm semgħuh, u qalu li kien qiegħed iriegħed. Oħrajn qalu: “Kellmu xi anġlu.”

³⁰Ġesù wieġeb: “Dan il-leħen ma ġiex għalija, imma għalikom.

³¹Il-ġudizzju ta’ din id-dinja qiegħed isir issa. Issa se jitkeċċa l-Prinċep ta’ din id-dinja.

³²U meta nintrefa’ ’l fuq mill-art[53], jiena niġbed il-bnedmin kollha lejja.”

³³Hu qal dan biex jurihom b’liema mewt kien sejjer imut.

³⁴In-nies wieġbu: “Aħna smajna jingħad fil-Liġi li l-Messija għandu jibqa’ għal dejjem. Kif tiġi tgħidilna int li Bin il-bniedem għandu jintrefa’? U dan Bin il-bniedem min hu?”

³⁵Qalilhom Ġesù: “Ftit ieħor baqagħlu magħkom id-dawl. Mela ibqgħu miexja sakemm għandkom id-dawl, biex id-dlam ma jilħaqkomx. Min jimxi fid-dlam ma jafx fejn hu sejjer.

³⁶Sakemm għandkom id-dawl, emmnu fid-dawl, biex tkunu wlied id-dawl.” Wara li qalilhom dan, Ġesù telaq u nħeba minnhom.

³⁷Hu kien għamel ħafna sinjali quddiemhom, u madankollu baqgħu ma emmnux fih,

³⁸biex hekk isseħħ il-kelma tal-profeta Isaija li qal, “Mulej, min emmen l-aħbar tagħna? U driegħ il-Mulej lil min intwera?”

³⁹Kien għalhekk li ma setgħux jemmnu, għax kif qal ukoll Isaija,

⁴⁰“Huwa għalqilhom għajnejhom u webbsilhom qalbhom, li ma jmorrux jaraw b’għajnejhom u jifhmu b’qalbhom u jduru lejja u jiena nfejjaqhom.”

⁴¹Dan qalu Isaija, għax ra l-glorja tiegħu u tkellem fuqu.

⁴²Imma madankollu ħafna mill-kapijiet emmnu fih ukoll, iżda minħabba l-Fariżej dan ma stqarrewhx, biex ma jitkeċċewx ’il barra mis-sinagoga.

⁴³Għalihom kienet aktar għażiża l-glorja tal-bnedmin mill-glorja ta’ Alla.

⁴⁴Ġesù għolla leħnu u qal: “Min jemmen fija jkun qiegħed jemmen mhux fija imma f’min bagħatni;

⁴⁵u min jara lili jkun qiegħed jara lil min bagħatni.

⁴⁶Jiena huwa d-dawl li ġejt fid-dinja biex kull min jemmen fija ma jibqax fid-dlam.

⁴⁷Min jisma’ kliemi u ma jħarsux, jiena ma nagħmilx ħaqq minnu, għax jien ma ġejtx biex nagħmel ħaqq mid-dinja, iżda biex insalva d-dinja.

⁴⁸Min imaqdar lili u ma jilqax kliemi, hemm min jagħmel ħaqq minnu: il-kelma li jiena għedt; tkun hi li tagħmel ħaqq minnu fl-aħħar jum.

⁴⁹Għax jien ma għedt xejn minn moħħi, imma kien dak li bagħatni, jiġifieri l-Missier, li ordnali xi ngħid u nitkellem.

⁵⁰U jiena naf li l-ordni tiegħu hija l-ħajja ta’ dejjem. Dak li ngħid jien, ngħidu kif qalli l-Missier.”