Read Maltese Bible with DC – IL-BIBBJA IL-KOTBA MQADDSA ĠWANNI 15 Bible Online

ĠWANNI 15 - Maltese Bible with DC – IL-BIBBJA IL-KOTBA MQADDSA bible

ĠWANNI 15

¹“Jiena d-dielja vera u Missieri l-bidwi.

²Kull fergħa fija li ma tagħmilx frott jaqtagħha; u kull waħda li tagħmel il-frott jiżborha u jnaddafha, biex tagħmel frott aktar.

³Intom ġa ndaf minħabba l-kelma li għidtilkom.

⁴Ibqgħu fija, u jiena nibqa’ fikom. Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibqgħux fija.

⁵Jiena d-dielja, intom il-friegħi. Min jibqa’ fija u jiena fih, dan jagħmel ħafna frott; għax mingħajri ma tistgħu tagħmlu xejn.

⁶Jekk wieħed ma jibqax fija, jintrema barra bħal fergħa, u jinxef; imbagħad, friegħi bħal dawn jiġbruhom u jixħtuhom fin-nar u jinħarqu.

⁷Jekk tibqgħu fija u kliemi jibqa’ fikom, itolbu kulma tridu, u jingħatalkom.

⁸Din hi l-glorja ta’ Missieri, li intom tagħmlu ħafna frott u tkunu dixxipli tiegħi.

⁹Kif ħabbni Missieri, hekk ħabbejtkom jiena. Ibqgħu fl-imħabba tiegħi.

¹⁰Jekk tħarsu l-kmandamenti tiegħi, intom tibqgħu fi mħabbti, kif jiena ħarist il-kmandamenti ta’ Missieri u qiegħed f’imħabbtu.

¹¹“Għedtilkom dan biex il-ferħ tiegħi jkun fikom, u biex il-ferħ tagħkom ikun sħiħ.

¹²Dan hu l-kmandament tiegħi: li tħobbu lil xulxin kif ħabbejtkom jien.

¹³Ħadd ma għandu mħabba akbar minn din: li wieħed jagħti ħajtu għal ħbiebu.

¹⁴Intom ħbiebi, jekk tagħmlu dak li jiena nikkmandakom.

¹⁵Ma nsejħilkomx aktar qaddejja, għax il-qaddej ma jafx x’jagħmel sidu; sejjaħtilkom ħbieb, għaliex kulma smajt mingħand Missieri jiena għarrafthulkom.

¹⁶Mhux intom għażiltu lili, imma jien għażilt lilkom, u ħtartkom biex tmorru tagħmlu l-frott u l-frott tagħkom jibqa’, ħalli kulma titolbu lill-Missier f’ismi, huwa jagħtihulkom.

¹⁷Dan hu li qiegħed nikkmandakom: li tħobbu lil xulxin.

¹⁸“Jekk id-dinja tobgħodkom, kunu afu li lili bagħditni qabel ma bagħdet lilkom.

¹⁹Kieku intom kontu tad-dinja, id-dinja kienet tħobbkom bħalma tħobb dak li hu tagħha; iżda billi m’intomx tad-dinja, għax jien ħriġtkom mid-dinja, id-dinja tobgħodkom.

²⁰Ftakru fil-kelma li għedtilkom: il-qaddej mhuwiex akbar minn sidu. Jekk ippersegwitaw lili, għad jippersegwitaw lilkom ukoll; jekk ħarsu l-kelma tiegħi, għad iħarsu tagħkom ukoll.

²¹Imma dan kollu għad jagħmluhulkom minħabba f’ismi, għax huma ma jafux lil dak li bagħatni.

²²Kieku ma ġejtx u ma kellimthomx, ma kienx ikollhom ħtija; imma issa ma għandhomx skuża ta’ dnubhom.

²³Min jobgħod lili, jobgħod ukoll lil Missieri.

²⁴Kieku ma għamiltx quddiemhom l-opri li ħadd qatt ma għamel, ma kienx ikollhom ħtija iżda issa raw b’għajnejhom u baqgħu jobogħdu sew lili u sew lil Missieri.

²⁵Imma dan ġara biex isseħħ il-kelma li hemm fil-Liġi tagħhom, ‘Fuq xejn bagħduni.’

²⁶“Meta jiġi d-Difensur[56], li se nibagħtilkom mingħand il-Missier, l-Ispirtu tal-verità, li ġej mill-Missier, huwa jixhed għalija.

²⁷U intom ukoll tixhdu, għax intom kontu miegħi sa mill-bidu.