Read Maltese Bible with DC – IL-BIBBJA IL-KOTBA MQADDSA ĠWANNI 7 Bible Online

ĠWANNI 7 - Maltese Bible with DC – IL-BIBBJA IL-KOTBA MQADDSA bible

ĠWANNI 7

¹Wara dan, Ġesù baqa’ jdur fil-Galilija, għax ma riedx joqgħod idur fil-Lhudija billi l-Lhud kienu qegħdin ifittxu li joqtluh.

²Kienet qorbot għal-Lhud il-festa tal-Għerejjex[30],

³u ħutu[31] qalulu: “Itlaq minn hawn u mur il-Lhudija, biex id-dixxipli tiegħek ukoll jaraw l-għemejjel li qiegħed tagħmel.

⁴Għax ħadd ma jagħmel xejn bil-moħbi jekk irid ikun magħruf minn kulħadd. Ladarba qiegħed tagħmel dan kollu, uri ruħek lid-dinja.”

⁵Għax anqas ħutu ma emmnu fih.

⁶Għalhekk Ġesù qalilhom: “Għalija għadu ma wasalx iż-żmien, imma ż-żmien tagħkom dejjem f’idejkom.

⁷Id-dinja lilkom ma tistax tobgħodkom, imma lili tobgħodni, għax jiena nixhed kontra tagħha li kulma tagħmel hu ħażin.

⁸Itilgħu intom għall-festa, imma jiena ma nitlax għaliha din il-festa, għax iż-żmien tiegħi għadu ma għalaqlix.”

⁹Wara li qalilhom dan, baqa’ fil-Galilija.

¹⁰Imma wara li ħutu telgħu għall-festa tela’ hu wkoll, mhux bid-dieher, imma bil-moħbi.

¹¹Fil-festa l-Lhud bdew ifittxuh u jgħidu: “Dan fejn hu?”

¹²Fost il-poplu kien hemm ħafna għajdut fuqu; min beda jgħid li kien raġel tajjeb, u min qal li ma kienx imma li kien qed iqarraq bin-nies.

¹³Madankollu ħadd ma kien jitkellem fuqu bil-miftuħ, għax kienu jibżgħu mil-Lhud.

¹⁴Il-festa kienet ġa f’nofsha meta Ġesù tela’ fit-tempju u qabad jgħallem.

¹⁵Il-Lhud stagħġbu bih u qalu: “Dan kif jaf daqshekk bla ma tgħallem[32]?”

¹⁶Qabeż Ġesù u qalilhom: “It-tagħlim tiegħi mhuwiex tiegħi, imma ta’ dak li bagħatni.

¹⁷Min irid jagħmel ir-rieda tiegħu jaf jekk dan it-tagħlim huwiex minn Alla jew jekk iniex ngħid xi ħaġa minn tiegħi.

¹⁸Min jgħid xi ħaġa minn moħħu jkun qiegħed ifittex il-glorja tiegħu nnifsu. Iżda min ifittex il-glorja ta’ min ikun bagħtu, dan ikun jgħid is-sewwa, u fih ma jkun hemm ebda qerq.

¹⁹Il-Liġi mhux Mosè tahielkom? U madankollu ħadd minnkom ma jħares il-Liġi. Għaliex qegħdin tfittxu li toqtluni?”

²⁰Qalulu n-nies: “Int għandek xitan fik! Min qiegħed ifittex li joqtlok?”

²¹Weġibhom Ġesù: “Ħaġa waħda għamilt, u lkoll stagħġibtu biha.

²²Mosè takom iċ-ċirkonċiżjoni - għalkemm din ma kinitx ġejja minn Mosè, imma mill-patrijarki - u intom, lil dak li jkun, iċ-ċirkonċiżjoni tagħmluhielu f’jum is-Sibt.

²³Mela jekk intom, lil dak li jkun, tagħmlulu ċ-ċirkonċiżjoni f’jum is-Sibt biex ma tinkisirx il-Liġi ta’ Mosè, kif se teħduha kontra tiegħi għax f’jum is-Sibt fejjaqt bniedem kollu kemm hu?

²⁴Tagħmlux il-ħaqq fuq dak li taraw b’għajnejkom imma agħmluh skont is-sewwa!”

²⁵Xi wħud min-nies ta’ Ġerusalemm qalu: “Dan mhuwiex dak li qegħdin ifittxuh biex joqtluh?

²⁶Araw, b’wiċċu minn quddiem qiegħed jitkellem, u ħadd ma hu jgħidlu xejn. Jaqaw tassew li l-kbarat għarfu li dan hu l-Messija?

²⁷Imma dan nafu minn fejn hu; il-Messija, meta jiġi, ħadd ma jkun jaf minn fejn ikun ġej.”

²⁸Ġesù, huwa u jgħallem fit-tempju, għolla leħnu u qal: “Intom lili tafuni, u tafu wkoll minn fejn jien. Jiena ma ġejtx minn rajja, imma hemm wieħed tassew li bagħatni, wieħed li intom ma tafuhx.

²⁹Jiena nafu, għax jien minn għandu ġej, u kien hu li bagħatni.”

³⁰Huma fittxew jaqbduh, iżda ħadd minnhom ma medd idejh fuqu, għax is-siegħa tiegħu kienet għadha ma waslitx.

³¹Ħafna nies emmnu fih u qalu: “Meta jiġi l-Messija se jagħmel sinjali aktar milli qiegħed jagħmel dan?”

³²Il-Fariżej semgħu x’kienu qegħdin jgħidu fuqu n-nies, u huma u l-qassisin il-kbar bagħtu xi għases biex jaqbduh.

³³Ġesù qal: “Ftit ieħor baqagħli magħkom, u mbagħad nerġa’ mmur għand min bagħatni.

³⁴Għad tfittxuni u ma ssibunix, u ma tkunux tistgħu tiġu fejn inkun jien.”

³⁵Il-Lhud bejniethom bdew jgħidu: “Mela fejn sejjer dan, biex m’aħniex se nsibuh? Jaqaw sejjer[33] għand dawk li huma mxerrda fost il-Griegi u jgħallem lill-Griegi?

³⁶Dan xi kliem hu li qal, ‘Għad tfittxuni u ma ssibunix,’ u ‘Ma tkunux tistgħu tiġu fejn inkun jien’?”

³⁷Fl-aħħar jum tal-festa, il-jum l-aktar solenni, Ġesù qam jgħid[34] b’leħen għoli: “Min jieħdu l-għatx, jiġi għandi u jixrob.

³⁸Kif tgħid l-Iskrittura, min jemmen fija, minnu joħorġu xmajjar ta’ ilma ħaj.”

³⁹Dan qalu għall-Ispirtu li kellhom jirċievu dawk li jemmnu fih, għax l-Ispirtu kien għad ma ngħatalhomx, billi Ġesù kien għadu ma ġiex igglorifikat.

⁴⁰Meta xi wħud semgħu kliemu qalu: “Tassew dan hu l-Profeta.”

⁴¹Oħrajn qalu: “Dan hu l-Messija.” Iżda xi wħud qalu: “Mela l-Messija għandu jiġi mill-Galilija?

⁴²Ma tgħidx l-Iskrittura li l-Messija għandu jiġi min-nisel ta’ David u minn Betlehem, ir-raħal minn fejn kien David?”

⁴³Hekk in-nies ma qablux bejniethom minħabba fih.

⁴⁴Xi wħud minnhom riedu jaqbduh, iżda ħadd ma medd idejh fuqu.

⁴⁵L-għases reġgħu lura għand il-qassisin il-kbar u l-Fariżej, u dawn qalulhom: “Dan kif ma ġibtuhx magħkom?

⁴⁶L-għases qalulhom: “Qatt ħadd ma tkellem bħalu, dan il-bniedem!”

⁴⁷Qabżu l-Fariżej u qalulhom: “Intom ukoll tqarraqtu?

⁴⁸Hemm xi ħadd mill-kapijiet u l-Fariżej li emmen fih?

⁴⁹Imma dawn x’qabda nies misħuta, li l-Liġi ma jafuhiex!”

⁵⁰Wieħed minnhom, jismu Nikodemu, dak li qabel kien mar għand Ġesù, qabeż u qalilhom:

⁵¹“Jaqaw il-Liġi tagħna tikkundanna lil xi ħadd qabel ma tisma’ lilu stess ħalli tkun taf x’inhu jagħmel?”

⁵²U huma qalulu[35]: “M’intix int ukoll mill-Galilija, hux? Fittex fl-Iskrittura, ħalli tara li ebda profeta ma jqum mill-Galilija!”

⁵³U wieħed wieħed telqu lejn djarhom.