Read Maltese Bible with DC – IL-BIBBJA IL-KOTBA MQADDSA ĠWANNI 8 Bible Online

ĠWANNI 8 - Maltese Bible with DC – IL-BIBBJA IL-KOTBA MQADDSA bible

ĠWANNI 8

¹Ġesù telaq lejn l-Għolja taż-Żebbuġ.

²Imma l-għada qabel is-sebħ raġa’ mar fit-tempju, u l-poplu kollu ġie ħdejh, u hu qagħad bilqiegħda jgħallimhom.

³Imbagħad il-kittieba u l-Fariżej ħadulu quddiemu waħda mara li kienet inqabdet fl-adulterju. Huma qegħduha fin-nofs

⁴u qalulu: “Mgħallem, din il-mara nqabdet fil-fatt fl-adulterju.

⁵Issa fil-Liġi tagħna Mosè ordnalna biex nisa bħal dawn inħaġġruhom. Int, imma, xi tgħid?”

⁶Dan qaluhulu biex iġarrbuh, ħalli jkollhom fuqiex jixluh. Imma Ġesù tbaxxa lejn l-art u beda jikteb b’sebgħu fit-trab.

⁷Billi dawk baqgħu jistaqsuh, qam dritt u qalilhom: “Min fostkom hu bla dnub jitfgħalha hu l-ewwel ġebla.”

⁸U raġa’ tbaxxa jikteb fit-trab.

⁹Kif semgħuh jgħid dan, qabdu u telqu wieħed wara l-ieħor, ibda mix-xjuħ, u Ġesù baqa’ waħdu mal-mara, wieqfa fin-nofs.

¹⁰Qam dritt u qalilha: “Dawk fejnhom, mara? Ħadd minnhom ma kkundannak?”

¹¹“Ħadd, Sinjur,” qaltlu. “Mela anqas jien ma nikkundannak,” qalilha Ġesù. “Mur, u mil-llum ’il quddiem tidnibx iżjed.”

¹²Mill-ġdid Ġesù qabad ikellimhom u jgħidilhom: “Jiena d-dawl tad-dinja. Min jiġi warajja ma jimxix fid-dlam, iżda jkollu d-dawl tal-ħajja.”

¹³Qalulu l-Fariżej: “Qiegħed tixhed int għalik innifsek; mela x-xhieda tiegħek mhix minnha.”

¹⁴Weġibhom Ġesù: “U wkoll kieku kelli nixhed jien għalija nnifsi, ix-xhieda tiegħi kienet tgħodd, għax jiena naf minn fejn ġej u fejn sejjer. Imma intom ma tafux minn fejn jien ġej jew fejn sejjer.

¹⁵Intom il-ħaqq tagħkom tagħmluh ta’ bnedmin li intom; jien ma nagħmel ħaqq minn ħadd.

¹⁶Imma kieku kelli nagħmel ħaqq jien, il-ħaqq tiegħi kien ikun sewwa, għax jien m’iniex waħdi, imma miegħi għandi l-Missier li bagħatni.

¹⁷Issa fil-Liġi tagħkom hemm miktub li x-xhieda ta’ tnejn tgħodd.

¹⁸Hemm jien, li qiegħed nixhed għalija nnifsi, u hemm il-Missier li bagħatni, li hu wkoll qiegħed jixhed għalija.”

¹⁹“Missierek fejn hu?” staqsewh. Weġibhom Ġesù: “Intom la lili ma tafu u lanqas lil Missieri. Li kieku kontu tafu lili, kontu tkunu tafu lil Missieri wkoll.”

²⁰Dan kollu Ġesù qalu fit-teżor[36], huwa u jgħallem fit-tempju. U ħadd minnhom ma qabdu, għax is-siegħa tiegħu kienet għadha ma waslitx.

²¹U raġa’ qalilhom: “Jiena mmur, u intom għad tfittxuni, imma għad tmutu fid-dnub tagħkom. Fejn sejjer jien intom ma tistgħux tiġu.”

²²Qalu l-Lhud: “Jaqaw se jneħħi ħajtu b’idejh dan? Għax qal li ‘Fejn sejjer jien intom ma tistgħux tiġu.’ ”

²³Ġesù qalilhom: “Intom minn hawn isfel, u jiena ġej minn hemm fuq. Intom nies ta’ din id-dinja, imma jien m’iniex ta’ din id-dinja.

²⁴Kif għedtilkom jien, intom tmutu fi dnubietkom. Għax jekk intom ma temmnux li jiena hu, tmutu fi dnubietkom.”

²⁵“U int min int?” staqsewh. Weġibhom Ġesù: “Dak li ili ngħidilkom sa mill-bidu.

²⁶Għandi ħafna xi ngħid fuqkom u x’nikkundanna fikom; iżda dak li bagħatni jgħid il-verità, u jiena ngħid lid-dinja dak li smajt mingħandu.”

²⁷Huma ma ntebħux li kien qiegħed ikellimhom fuq il-Missier.

²⁸Għalhekk Ġesù qalilhom: “Meta terfgħu ’l fuq lil Bin il-bniedem, imbagħad tagħrfu li jiena hu u li minn rajja ma nagħmel xejn, imma li nitkellem skont ma għallimni l-Missier.

²⁹U min bagħatni huwa miegħi, ma telaqnix waħdi, għax jiena dejjem nagħmel dak li jogħġob lilu.”

³⁰Meta tkellem hekk, kienu ħafna dawk li emmnu fih.

³¹Ġesù qal lil-Lhud li emmnu fih: “Jekk iżżommu fil-kelma tiegħi, tkunu tassew dixxipli tiegħi,

³²u tagħrfu l-verità u l-verità teħliskom.”

³³Qalulu: “Aħna nisel Abraham, u qatt ma konna lsiera ta’ ħadd. Kif tiġi tgħidilna li nkunu ħielsa?”

³⁴Weġibhom Ġesù: “Tassew tassew ngħidilkom, li kull min jagħmel id-dnub huwa lsir tad-dnub.

³⁵U l-ilsir ma jibqax fil-familja għal dejjem; imma l-iben għal dejjem jibqa’.

³⁶Jekk l-Iben jeħliskom, tkunu tabilħaqq ħielsa.

³⁷Jiena naf li intom nisel Abraham; madankollu qegħdin tfittxu li toqtluni, għax il-kelma tiegħi ma qabditx l-art fikom.

³⁸Jiena qiegħed nitkellem fuq dak li rajt għand Missieri, u intom tagħmlu dak li smajtu mingħand missierkom.”

³⁹Qabżu u qalulu: “Missierna hu Abraham.” Qalilhom Ġesù: “Kieku kontu wlied Abraham, kontu tagħmlu bħalma għamel Abraham.

⁴⁰Iżda issa qegħdin tfittxu li toqtlu lili, bniedem li għedtilkom il-verità li smajt mingħand Alla. Dan ma għamlux Abraham.

⁴¹Intom tagħmlu bħalma jagħmel missierkom.” Qalulu: “Aħna m’aħniex ulied iż-żina! Missier wieħed għandna, lil Alla.”

⁴²Qalilhom Ġesù: “Li kieku Alla kien missierkom, lili kontu tħobbuni, għax jien ħriġt u ġejt mingħand Alla. Għax jien ma ġejtx minn rajja, imma kien hu li bagħatni.

⁴³Għaliex m’intomx tifhmu x’jiena ngħid? Għax intom kelmti ma tifilħux għaliha.

⁴⁴Intom ġejjin minn missierkom, li hu x-Xitan, u x-xewqat ta’ missierkom tridu tagħmlu. U dan kien qattiel sa mill-bidu, u qatt ma żamm mal-verità, għax il-verità ma tinsabx fih. Meta jigdeb, ikun qiegħed jitkellem ta’ li hu, għax dak giddieb u missier il-gideb.

⁴⁵Imbagħad lili, għax ngħid is-sewwa, ma temmnunix.

⁴⁶Min minnkom jipprova li jien għandi xi dnub? Jekk jiena ngħid il-verità, l-għala ma temmnunix?

⁴⁷Min hu minn Alla jisma’ dak li jgħid Alla. Hu għalhekk li intom ma tisimgħux, għax m’intomx minn Alla.”

⁴⁸Qabżu l-Lhud u qalulu: “Mhux sewwa ngħidu aħna li int Samaritan u li għandek fik Xitan?”

⁴⁹Weġibhom Ġesù: “Jiena ma għandix Xitan fija, imma nagħti ġieħ lil Missieri, u intom tgħajruni.

⁵⁰Jien ma nfittixx il-glorja tiegħi; hemm min ifittixha u jagħmel il-ħaqq.

⁵¹Tassew tassew ngħidilkom li min iħares il-kelma tiegħi ma jara qatt il-mewt.”

⁵²Qalulu l-Lhud: “Issa tassew nafu li għandek Xitan fik. Abraham miet, u l-profeti wkoll; u inti tgħid li ‘Jekk xi ħadd iħares kelmti ma jduq qatt il-mewt.’

⁵³Jaqaw int akbar minn missierna Abraham li miet? U l-profeti wkoll mietu. Inti x’taħseb li int?”

⁵⁴Wieġeb Ġesù: “Li kieku kelli nagħti glorja lili nnifsi, il-glorja tiegħi ma kienet tkun tiswa xejn. Imma dak li lili qiegħed jagħtini l-glorja huwa l-Missier, dak li intom tgħidu li hu Alla tagħkom,

⁵⁵u madankollu ma għaraftuhx. Imma jiena nafu, u kieku kelli ngħid li ma nafux, kont inkun giddieb bħalkom. U mhux biss nafu, imma wkoll inħares il-kelma tiegħu.

⁵⁶Missierkom Abraham qabeż bil-ferħ għall-ħsieb li kien se jara l-jum tiegħi, u rah u feraħ.”

⁵⁷Qalulu l-Lhud: “Għadek anqas għalaqt il-ħamsin u rajt lil Abraham?”

⁵⁸Qalilhom Ġesù: “Tassew tassew ngħidilkom, qabel ma kien Abraham, jiena hu[37].”

⁵⁹Għalhekk il-Lhud qabdu l-ġebel biex iwaddbuhulu; imma Ġesù nħbielhom u ħareġ mit-tempju.