Read Maltese Bible with DC – IL-BIBBJA IL-KOTBA MQADDSA ATTI TAL-APPOSTLI 10 Bible Online

ATTI TAL-APPOSTLI 10 - Maltese Bible with DC – IL-BIBBJA IL-KOTBA MQADDSA bible

ATTI TAL-APPOSTLI 10

¹F’Ċesarija kien hemm wieħed jismu Kornelju, ċenturjun[36] tar-riġment imsejjaħ ‘ir-Riġment Taljan’.

²Dan ir-raġel, flimkien mal-familja tiegħu kollha[37], kien bniedem sewwa u kellu l-biża’ ta’ Alla; kien jagħmel ħafna opri ta’ karità mal-poplu u kien dejjem jitlob lil Alla.

³Darba waħda, f’xi t-tlieta ta’ wara nofsinhar, kellu dehra li fiha ra b’mod ċar anġlu ta’ Alla dieħel ħdejh u jsejjaħlu: “Kornelju!”

⁴Hu ċċassa jħares lejh kollu biża’, u qal: “Dan x’inhu, Sinjur?” L-anġlu qallu: “It-talb tiegħek u l-opri tiegħek ta’ karità telgħu quddiem Alla u ftakar fik.

⁵Mela issa ibgħat xi rġiel f’Ġaffa, biex iġibu minn hemm lil wieħed Xmun, li jgħidulu wkoll Pietru.

⁶Dan qiegħed għand ċertu Xmun, konzatur, li għandu d-dar ħdejn il-baħar.”

⁷X’ħin l-anġlu li kien ikellmu telaq, Kornelju sejjaħ tnejn mill-qaddejja tiegħu u suldat twajjeb minn dawk li kellu dejjem madwaru,

⁸qalilhom kulma kien ġralu u bagħathom lejn Ġaffa.

⁹L-għada, waqt li dawn kienu fit-triq u qorbu lejn il-belt, Pietru għall-ħabta ta’ nofsinhar tala’ jitlob fuq il-bejt.

¹⁰Qabdu l-ġuħ u xtaq jitrejjaq b’xi ħaġa; u ġara li, waqt li kienu qegħdin iħejjulu, daħal f’estasi.

¹¹Lemaħ is-sema jinfetaħ, u ra xi ħaġa qisha liżar kbir, miżmum mill-erbat itruf u nieżel lejn l-art.

¹²Fih kien hemm minn kull xorta ta’ bhejjem ta’ erba’ saqajn, annimali li jitkaxkru fuq l-art u għasafar tal-ajru.

¹³U sema’ leħen jgħidlu: “Qum, Pietru, oqtol u kul.”

¹⁴Imma Pietru wieġeb: “Ma jkun qatt, Mulej! Jien qatt ma kilt ikel profan u mniġġes[38].”

¹⁵U l-leħen tennielu għal darb’oħra: “Dak li Alla saffa, int ma għandekx issejjaħlu mniġġes.”

¹⁶Dan ġara għal tliet darbiet. Imbagħad, f’daqqa waħda, dik il-ħaġa qisha liżar reġgħet ittieħdet ’il fuq lejn is-sema.

¹⁷Pietru, kollu mħawwad, kien qiegħed jaħseb bejnu u bejn ruħu x’setgħet tfisser dik id-dehra li kellu; fl-istess ħin l-irġiel li kien bagħat Kornelju staqsew għad-dar ta’ Xmun u waslu quddiem il-bieb.

¹⁸Imbagħad sejħu lil xi ħadd u staqsew jekk Xmun, li jgħidulu Pietru, kienx qiegħed hemm.

¹⁹Sadattant Pietru kien għadu mħasseb dwar dik id-dehra. U qallu l-Ispirtu: “Hawn żewġt irġiel[39] qegħdin jistaqsu għalik.

²⁰Fittex inżel isfel u mur magħhom, tieħu ħsieb ta’ xejn, għax jien hu li bgħatthom.”

²¹Pietru niżel ħdejn dawk l-irġiel u qalilhom: “Jien hu dak li qegħdin tfittxu. X’ġiebkom hawn?”

²²Huma qalulu: “Bagħatna Kornelju, iċ-ċenturjun, raġel sewwa li għandu l-biża’ ta’ Alla u jixhed għalih il-poplu Lhudi kollu. Anġlu qaddis qallu biex jibgħat għalik u tmur għandu ħalli jisma’ x’għandek tgħidlu.”

²³Imbagħad Pietru stedinhom jibqgħu hemm. L-għada qam u telaq magħhom, u marru wkoll miegħu xi wħud mill-aħwa ta’ Ġaffa.

²⁴Il-jum ta’ wara waslu Ċesarija. Kornelju laqqa’ flimkien lil niesu u ’l ħbiebu u kien qiegħed jistenniehom.

²⁵Xħin daħal Pietru, Kornelju mar jilqgħu u ntefa’ f’riġlejh jagħtih qima.

²⁶Imma Pietru qajmu u qallu: “Qum. Jien bniedem ukoll.”

²⁷Huwa u jitkellem miegħu, baqa’ dieħel ġewwa, u hemm sab ħafna nies miġbura flimkien.

²⁸U qalilhom: “Intom tafu li mhijiex ħaġa sewwa għal wieħed Lhudi li jissieħeb ma’ wieħed barrani jew li jersaq lejh. Imma lili Alla wrieni li ebda bniedem ma għandi nsejjaħlu profan jew imniġġes.

²⁹Għalhekk xejn ma sibtha bi tqila biex niġi hawn meta bagħat għalija. Issa, nistaqsi jien, għalfejn bgħatt għalija?”

³⁰U Kornelju wieġbu: “Erbat ijiem ilu, bħal dan il-ħin, kont id-dar ngħid it-talba tat-tlieta ta’ wara nofsinhar. F’daqqa waħda rajt raġel bi lbies ilellex wieqaf ħdejja,

³¹u qalli, ‘Kornelju, Alla sama’ t-talb tiegħek u laqa’ l-opri tal-karità tiegħek u ftakar fik.

³²Mela issa ibgħat lil xi ħadd f’Ġaffa għand Xmun, li jgħidulu Pietru, u għidlu jiġi għandek. Dan qiegħed fid-dar ta’ Xmun, il-konzatur, ħdejn il-baħar.’

³³Għalhekk jien malajr bgħatt għalik; u int għamilt sewwa li ġejt. Issa aħna qegħdin hawn ilkoll quddiem Alla, biex nisimgħu dak kollu li l-Mulej iridek tgħidilna.”

³⁴Pietru qabad jitkellem u qal: “Issa tassew qiegħed nifhem li Alla ma jħares lejn wiċċ ħadd,

³⁵imma jilqa’ lil kull min għandu l-biża’ tiegħu u jagħmel is-sewwa, ikun minn liema poplu jkun.

³⁶Huwa bagħat il-kelma tiegħu lil ulied Iżrael u xandrilhom is-sliem permezz ta’ Ġesù Kristu, li hu s-Sid ta’ kollox.

³⁷Intom tafu b’dak li ġara mal-Lhudija kollha, ibda mill-Galilija, wara li Ġwanni kien xandar il-magħmudija;

³⁸tafu kif Alla kkonsagra lil Ġesù ta’ Nazaret bl-Ispirtu s-Santu u bil-qawwa, u kif dan Ġesù għadda jagħmel il-ġid u jfejjaq lil dawk kollha li kienu maħkuma mix-xitan, għax Alla kien miegħu.

³⁹U aħna xhud ta’ dak kollu li hu għamel fl-art tal-Lhudija u f’Ġerusalemm. “Tawh il-mewt billi dendluh mal-għuda tas-salib;

⁴⁰imma Alla qajmu mill-imwiet fit-tielet jum u għamel li hu jidher,

⁴¹mhux lil kulħadd, imma lix-xhieda li Alla għażel minn qabel, lilna, li miegħu kilna u xrobna wara l-qawmien tiegħu mill-imwiet.

⁴²Lilna ordnalna biex inxandruh lill-poplu u nixhdu li dan hu dak li Alla għamlu mħallef tal-ħajjin u tal-mejtin.

⁴³Il-profeti kollha jixhdu għalih u jgħidu li kull min jemmen fih jaqla’ l-maħfra tad-dnubiet bis-saħħa ta’ ismu[40].”

⁴⁴Meta Pietru kien għadu qiegħed jgħid dan, l-Ispirtu s-Santu niżel fuq dawk kollha li kienu jisimgħuh.

⁴⁵Dawk li kienu marru ma’ Pietru, Lhud li kienu emmnu[41], stagħġbu kif Alla sawwab id-don tal-Ispirtu s-Santu fuq il-pagani wkoll.

⁴⁶Għax semgħuhom jitkellmu bl-ilsna u jfaħħru l-kobor ta’ Alla. Imbagħad Pietru qal:

⁴⁷“Jista’ xi ħadd jiċħad l-ilma tal-magħmudija lil dawn in-nies, li ħadu l-Ispirtu s-Santu bħalma ħadnieh aħna wkoll?”

⁴⁸U ordna li jitgħammdu fl-isem ta’ Kristu[42]. Imbagħad huma talbuh jibqa’ għal ftit jiem magħhom.