Read Maltese Bible with DC – IL-BIBBJA IL-KOTBA MQADDSA ATTI TAL-APPOSTLI 18 Bible Online

ATTI TAL-APPOSTLI 18 - Maltese Bible with DC – IL-BIBBJA IL-KOTBA MQADDSA bible

ATTI TAL-APPOSTLI 18

¹Wara dan, Pawlu ħalla Ateni u mar Korintu[90].

²Hemm sab wieħed Lhudi minn Pontu[91], jismu Akwila, li kien għadu kemm wasal mill-Italja ma’ martu Prixxilla; għax l-imperatur Klawdju kien ordna biex il-Lhud kollha jitilqu minn Ruma. Pawlu mar għandhom

³u, billi kellu l-istess sengħa tagħhom, qagħad jaħdem magħhom. Is-sengħa tagħhom kienet li jagħmlu t-tined.

⁴Kull nhar ta’ Sibt kien imur jiddiskuti fis-sinagoga u jfittex li jipperswadi lil-Lhud u l-Griegi.

⁵Meta Sila u Timotju waslu mill-Maċedonja[92], Pawlu ta ruħu kollu kemm hu għax-xandir tal-kelma, u kien jixhed lil-Lhud li Ġesù huwa l-Messija.

⁶Iżda huma waqfulu u bdew jidgħulu, u għalhekk Pawlu farfar ħwejġu[93] u qalilhom: “Intom taħtu għat-telfien tagħkom, jien ma għandix ħtija! Minn issa ’l quddiem se ngħaddi għal għand il-pagani.”

⁷Imbagħad telaq minn hemm u mar għand wieħed jismu Titu Ġustu, li kien iqim lil Alla[94], u li daru kienet maġenb is-sinagoga.

⁸Krispu, il-kap tas-sinagoga, u l-familja tiegħu kollha emmnu fil-Mulej, u ħafna mill-Korintin, li kienu jisimgħu lil Pawlu, emmnu huma wkoll u tgħammdu.

⁹Darba billejl il-Mulej deher lil Pawlu u qallu: “La tibżax, imma tkellem u tiskotx,

¹⁰għax jiena miegħek, u ħadd ma hu se jmidd idu fuqek biex jagħmillek ħsara; għax poplu kbir hawn għalija f’din il-belt.”

¹¹Pawlu qagħad hemm sena u sitt xhur, jgħallimhom il-kelma ta’ Alla.

¹²Imma meta Galljon[95] sar prokonslu tal-Akaja, il-Lhud qamu għalenija kontra Pawlu, tellgħuh quddiem il-qorti,

¹³u qalu: “Dan il-bniedem qiegħed jipperswadi lin-nies biex iqimu lil Alla kontra l-Liġi.”

¹⁴Xħin Pawlu kien se jiftaħ fommu, Galljon qal lil-Lhud; “Li kieku kien hemm xi ħtija jew delitt, kien ikun hemm raġuni li nismagħkom bis-sabar kollu lilkom il-Lhud:

¹⁵imma jekk din hi kwistjoni dwar kliem u ismijiet u l-Liġi tagħkom, arawha intom; jien ma rridx nagħmilha ta’ mħallef fi ħwejjeġ bħal dawn.”

¹⁶U bagħathom ’il barra mill-qorti.

¹⁷Imbagħad ilkoll qabdu f’Sòsteni, il-kap tas-sinagoga, u tawh xebgħa quddiem il-qorti. Imma Galljon ma ta ebda kas ta’ dan.

¹⁸Pawlu baqa’ hemm għal ħafna ġranet. Imbagħad infired mill-aħwa u rħielha bil-baħar lejn is-Sirja. Kellu miegħu lil Prixxilla u Akwila. F’Kenkri[96] qata’ xagħru, għax kellu wegħda.

¹⁹Meta waslu Efesu, Pawlu ħalla lill-oħrajn u mar fis-sinagoga jiddiskuti mal-Lhud.

²⁰Huma talbuh joqgħod hemm ftit ieħor; hu ma riedx,

²¹imma xħin ġie biex jinfired minnhom qalilhom: “Jekk Alla jrid, nerġa’ niġi għandkom.” U telaq minn Efesu bil-baħar.

²²Meta wasal Ċesarija, tala’ Ġerusalemm isellem lill-Knisja, u mbagħad niżel Antjokja.

²³Wara li għadda ftit taż-żmien hemmhekk, telaq u qagħad idur minn post għal ieħor fl-art tal-Galazja u l-Friġja[97], iwettaq id-dixxipli kollha.

²⁴Wieħed Lhudi minn Lixandra, jismu Apollu, wasal Efesu. Kien raġel jinqala’ biex jitkellem, u għaref fl-Iskrittura.

²⁵Kien mgħallem fit-Triq tal-Mulej, u kien jitkellem b’ħeġġa kbira u jgħallem fuq Ġesù, għad li kien jaf biss bil-magħmudija ta’ Ġwanni.

²⁶Dan beda jitkellem bi qlubija kbira fis-sinagoga. Prixxilla u Akwila semgħuh; ħaduh magħhom u fissrulu t-Triq ta’ Alla iktar bir-reqqa.

²⁷Billi hu ried imur l-Akaja, l-aħwa għamlulu l-qalb u kitbu lid-dixxipli biex jilqgħuh. Meta wasal hemm, bis-saħħa tal-grazzja li kellu, kien ta’ għajnuna kbira għal dawk li kienu emmnu.

²⁸U bil-qawwa kollha kien jagħlaq ħalq il-Lhud quddiem kulħadd billi jurihom mill-Iskrittura li Ġesù hu l-Messija.