Read Maltese Bible with DC – IL-BIBBJA IL-KOTBA MQADDSA ATTI TAL-APPOSTLI 19 Bible Online

ATTI TAL-APPOSTLI 19 - Maltese Bible with DC – IL-BIBBJA IL-KOTBA MQADDSA bible

ATTI TAL-APPOSTLI 19

¹Meta Apollu kien Korintu, Pawlu għadda mill-inħawi ta’ fuq u wasal Efesu, fejn sab xi dixxipli

²u staqsiehom: “Ħadtu intom l-Ispirtu s-Santu meta emmintu?” Iżda huma weġbuh: “Le, anqas biss smajna li hemm l-Ispirtu s-Santu!”

³“Mela x’magħmudija ħadtu?” staqsiehom Pawlu. “Il-magħmudija ta’ Ġwanni,” weġbuh huma.

⁴Imbagħad Pawlu qalilhom: “Ġwanni għammed bil-magħmudija tal-indiema; imma lin-nies kien jgħidilhom biex jemmnu f’dak li kellu jiġi warajh, jiġifieri, f’Ġesù.”

⁵Xħin semgħu dan, tgħammdu f’isem il-Mulej Ġesù.

⁶Imbagħad, kif Pawlu qegħdilhom idejh fuqhom, niżel fuqhom l-Ispirtu s-Santu u bdew jitkellmu b’ilsna u jħabbru[98].

⁷B’kollox kienu madwar tnax-il raġel.

⁸Għal tliet xhur Pawlu kien imur fis-sinagoga, jitkellem bi qlubija kbira u jfittex li jipperswadihom fuq is-Saltna ta’ Alla.

⁹Xi wħud kienu jwebbsu rashom u ma ridux jemmnu, u bdew imaqdru t-Triq tal-Mulej quddiem il-ġemgħa kollha. Għalhekk Pawlu telaq minn magħhom, ġabar miegħu d-dixxipli, u kien joqgħod jitkellem magħhom kuljum fl-iskola ta’ wieħed jismu Tirannu.

¹⁰Dan baqa’ sejjer għal sentejn, tant li dawk kollha li kienu joqogħdu fl-Asja, kemm Lhud u kemm Griegi, semgħu l-kelma tal-Mulej.

¹¹U Alla kien jagħmel mirakli mhux żgħar permezz ta’ Pawlu,

¹²hekk li, meta kienu jieħdu mkatar jew fradal li jkunu messew miegħu u jqegħduhom fuq il-morda, dawn kienu jfiqu mill-mard tagħhom u l-ispirti ħżiena kienu joħorġu minnhom.

¹³Kien hemm xi wħud mill-eżorċisti[99] Lhud iduru ma’ dawk l-inħawi, u bdew isejħu l-isem tal-Mulej Ġesù fuq dawk li kellhom l-ispirti ħżiena u jgħidulhom: “Niskunġrak b’dak Ġesù li jxandar Pawlu.”

¹⁴Kien hemm seba’ wlied ta’ wieħed jismu Xeva, qassis kbir Lhudi, li kienu jagħmlu dan.

¹⁵Imma l-ispirtu ħażin weġibhom: “Lil Ġesù nafu, u lil Pawlu nafu wkoll, imma intom min intom?”

¹⁶Imbagħad ir-raġel li kellu l-ispirtu ħażin ħebb għalihom, għelibhom ilkoll u qabadhom b’saħħtu kollha, hekk li ħarbu minn dik id-dar imneżżgħin u kollhom miġruħa.

¹⁷Dan saru jafu bih il-Lhud u l-Griegi kollha li kienu joqogħdu Efesu, u waqa’ biża’ fuqhom ilkoll; u isem il-Mulej Ġesù kien igglorifikat bil-bosta.

¹⁸Ħafna minn dawk li emmnu bdew jersqu biex jistqarru u jxandru għemilhom[100].

¹⁹U bosta minn dawk li qabel kienu jagħmlu s-sħarijiet ġiebu l-kotba tagħhom u ħarquhom quddiem kulħadd. Meta għamlu l-istima tagħhom, sabu li kienu jiswew ħamsin elf biċċa tal-fidda.

²⁰Hekk il-kelma tal-Mulej baqgħet tikber u tissaħħaħ bil-qawwa kollha.

²¹Wara li seħħ dan kollu, Pawlu għamel il-ħsieb li jmur il-Maċedonja u l-Akaja biex minn hemm jibqa’ sejjer Ġerusalemm. Qal ukoll: “Wara li mmur hemm, jeħtieġ nara Ruma wkoll.”

²²Għalhekk bagħat lejn il-Maċedonja lil Timotju u ’l Erastu, tnejn minn dawk li kienu jgħinuh, u hu baqa’ għal ftit taż-żmien ieħor fl-Asja.

²³Mela dik il-ħabta nqala’ inkwiet mhux żgħir minħabba t-Triq tal-Mulej.

²⁴Kien hemm wieħed arġentier, jismu Demetriju, li kien jagħmel mudelli tal-fidda tat-tempju ta’ Artemi[101], u, bis-saħħa tiegħu, in-nies tas-sengħa kienu jaqilgħu ħafna flus.

²⁵Dan laqqagħhom flimkien ma’ nies ta’ snajja’ oħra bħal tagħhom, u qalilhom: “Ħbieb, intom tafu li l-għana tagħna ġej mill-qligħ ta’ din is-sengħa.

²⁶Qegħdin taraw u tisimgħu li dan Pawlu qiegħed idawwar u jaqleb ħafna nies, mhux biss f’Efesu, imma tista’ tgħid fl-Asja kollha. Qiegħed jgħidilhom li allat maħduma bl-idejn ma huma allat xejn.

²⁷Dan hu l-biża’ tagħna, li mhux biss din is-sengħa tagħna ma jibqgħux jistmawha, iżda li saħansitra t-tempju ta’ Artemi l-kbira, l-alla tagħna, jiġi fix-xejn; u fl-aħħar jiġri li tonqos il-glorja kbira ta’ dik li hi miqjuma fl-Asja u d-dinja kollha.”

²⁸Xħin semgħu dan, imtlew bl-għadab u qabdu jgħajtu: “Kbira Artemi tal-Efesin!”

²⁹Qamet taħwida fil-belt kollha; in-nies b’ġirja waħda telqu lkoll flimkien għall-anfitijatru u kaxkru magħhom lil Gaju u ’l Aristarku, iż-żewġ irġiel mill-Maċedonja li kienu sħab Pawlu fil-vjaġġ.

³⁰Pawlu ried jidħol qalb il-folla, imma d-dixxipli ma ħallewhx.

³¹Xi awtoritajiet tal-Asja[102], ħbieb tiegħu, bagħtu jgħidulu huma wkoll biex ma jissugrax jidħol fl-anfitijatru.

³²Ġewwa fost il-ġemgħa kien hemm storbju sħiħ; min kien jgħajjat ħaġa u min oħra, u l-biċċa l-kbira anqas biss kienu jafu għalfejn inġabru hemm.

³³Il-Lhud tefgħu lil Alessandru ’l quddiem, u xi wħud mill-folla fehmuh x’kienet il-kwistjoni. Alessandru għamel sinjal b’idu biex juri li ried jagħmel difiża quddiem il-poplu.

³⁴Imma kif intebħu li kien Lhudi qabdu jgħajtu lkoll b’leħen wieħed, u baqgħu sejrin jgħajtu għal madwar sagħtejn sħaħ: “Kbira Artemi tal-Efesin!”

³⁵Imbagħad uffiċjal pubbliku rnexxielu jsikket il-folla u qalilhom: “Nies ta’ Efesu, min hu dak li ma jafx li Efesu hija l-belt li tħares it-tempju ta’ Artemi l-kbira u tax-xbieha tagħha li waqgħet mis-sema?

³⁶Dan ħadd ma jista’ jmerih! Mela għandkom toqogħdu bi kwietkom u ma tagħmlu xejn bl-għaġla.

³⁷Intom ġibtu hawn lil dawn l-irġiel, li ebda sagrileġġ ma għamlu, u anqas dgħaw kontra din l-alla tagħna.

³⁸Mela jekk Demetriju u sħabu tas-sengħa tiegħu għandhom xi jgħidu kontra xi ħadd, hemm il-qrati u l-imħallfin; ħa jmorru jixlu ’l xulxin quddiemhom.

³⁹Jekk imbagħad għandkom xi kwistjoni oħra, ħalluha tkun deċiża fil-laqgħa tas-soltu.

⁴⁰Għax fuq dak li ġara llum, hemm il-periklu li jgħodduna b’ħatja ta’ dan l-irvell, u ma hemm ebda skuża li nistgħu nġibu għal irvell bħal dan.”

⁴¹Xħin temm jgħid dan, bagħat lil kulħadd ’il barra.