Read Maltese Bible with DC – IL-BIBBJA IL-KOTBA MQADDSA RUMANI 10 Bible Online

RUMANI 10 - Maltese Bible with DC – IL-BIBBJA IL-KOTBA MQADDSA bible

RUMANI 10

¹L-aħwa, nixtieq tassew minn qalbi nitlob quddiem Alla li niesi jsalvaw.

²Jien xhud għalihom li huma għandhom il-ħeġġa għal Alla, iżda din mhijiex ħeġġa skont l-għerf veru.

³Għax m’għarfux il-ġustizzja ta’ Alla, imma fittxew il-ġustizzja tagħhom, u għalhekk ma qagħdux għall-ġustizzja ta’ Alla.

⁴L-iskop tal-Liġi hu Kristu għall-ġustizzja għal min jemmen fih.

⁵Fuq il-ġustizzja li tiġi mil-Liġi, Mosè kiteb: “Il-bniedem li jħarisha jgħix biha.”

⁶U dwar il-ġustizzja li tiġi mill-fidi jgħid hekk: “Tgħidx f’qalbek, ‘Min sa jitla’ fis-sema?’ jiġifieri biex iniżżel lil Kristu;

⁷anqas: ‘Min sa jinżel fil-qiegħ?’ jiġifieri, biex iġib lil Kristu mill-imwiet.”

⁸Imma xi tgħid l-Iskrittura? “Il-kelma qiegħda ħdejk, f’fommok u f’qalbek”; jiġifieri, il-kelma tal-fidi li aħna nxandru.

⁹Għax jekk inti tistqarr b’fommok, “Ġesù hu l-Mulej”, u temmen b’qalbek li Alla qajmu mill-imwiet, inti ssalva.

¹⁰Wieħed jemmen f’qalbu biex ikollu l-ġustizzja u jistqarr b’xufftejh biex ikollu s-salvazzjoni.

¹¹L-Iskrittura tgħid, “Kull min jemmen fih ma jintilifx.”

¹²Ma hemmx għażla bejn Lhudi u Grieg; hu s-Sid ta’ kulħadd u għani ma’ dawk kollha li jsejħulu.

¹³Għax kull min isejjaħ isem il-Mulej isalva.

¹⁴Imma kif jistgħu jsejħu lil dak li ma jemmnux fih? Kif jistgħu jemmnu f’dak li ma semgħux bih? Kif jistgħu jisimgħu jekk ma jxandrulhomx?

¹⁵Kif jistgħu jxandrulhom jekk ma jkunux mibgħuta? Bħalma hemm miktub: “Kemm huma sbieħ riġlejn dawk li jħabbru l-ġid.”

¹⁶Iżda mhux kulħadd qagħad għall-kelma tal-Evanġelju. Isaija ħabbar: “Mulej, min emmen il-kelma li sama’ mingħandna?”

¹⁷Il-fidi, mela, tiġi mis-smigħ, u s-smigħ mix-xandir tal-kelma ta’ Kristu.

¹⁸Imma ngħid jien, jaqaw ma semgħux[39]? Żgur li semgħu. L-Iskrittura tgħid: “Leħinhom xtered mal-art kollha [40], u l-kelma tagħhom laħqet truf id-dinja.”

¹⁹Imma nistaqsi jien: “Jaqaw Iżrael ma fehemx?” L-ewwel ma jwieġeb Mosè: “Jien inqajjimlek l-għira permezz ta’ ġens mhux poplu; permezz ta’ poplu bla ras ngħaddabkom.”

²⁰Isaija mbagħad b’wiċċu minn quddiem jgħid: “Sabuni dawk li ma kinux ifittxuni, dhert lil dawk li ma kinux jistaqsu għalija.”

²¹U dwar Iżrael jissokta: “Il-jum kollu jien ftaħt idejja lil poplu li ma jemminx u li qam kontrija.”