Read Maltese Bible with DC – IL-BIBBJA IL-KOTBA MQADDSA RUMANI 11 Bible Online

RUMANI 11 - Maltese Bible with DC – IL-BIBBJA IL-KOTBA MQADDSA bible

RUMANI 11

¹Issa nistaqsi jien, “Forsi Alla ċaħad il-poplu tiegħu?” Żgur li le! Għax jien ukoll Iżraeli, min-nisel ta’ Abraham, mit-tribù ta’ Benjamin.

²Alla ma ċaħdux lill-poplu tiegħu, li hu kien għażlu sa minn qabel. Ma tafx xi tgħid fuq Elija l-Iskrittura? Kif tkellem ma’ Alla kontra Iżrael:

³“Mulej, qatlu lill-profeti tiegħek, kissru l-artali tiegħek, jien waħdi bqajt u issa qegħdin ifittxuli ħajti?”

⁴Iżda x’wieġbu Alla? “Jien ħallejt għalija sebat elef raġel li ma niżlux għarkupptejhom quddiem Bagħal[41].”

⁵Hekk issa wkoll f’dan iż-żmien hemm il-fdal skont l-għażla tal-grazzja.

⁶U, jekk inhu[42] bis-saħħa tal-grazzja, mela mhux aktar bis-saħħa tal-opri; inkella l-grazzja ma tibqax aktar grazzja.

⁷Xi ngħidu, mela? Il-poplu ta’ Iżrael ma sabx dak li kien ifittex, iżda dawk li kienu magħżula sabuh; il-bqija webbsu rashom

⁸kif inhu miktub: “Alla tahom spirtu ta’ ngħas fuqhom, għajnejn biex ma jarawx, widnejn biex ma jisimgħux, sal-ġurnata tal-lum.”

⁹U David iżid: “Jalla tkun il-mejda tagħhom nasba u nassa, it-tfixkil u l-ħlas li ħaqqhom.

¹⁰Ħalli jiddallmu għajnejhom biex ma jarawx; u lwielhom daharhom għal dejjem.”

¹¹Mela, ngħid jien, jaqaw tfixklu biex waqgħu għal kollox? Żgur li le! Imma bis-saħħa tal-ħtija tagħhom waslet is-salvazzjoni għand il-pagani biex il-Lhud tiġihom l-għira għalihom.

¹²Jekk, mela, il-ħtija tal-Lhud sfat ta’ ħafna ġid għad-dinja, u l-waqgħa tagħhom ta’ ħafna ġid għall-pagani, kemm se tkun aktar is-salvazzjoni tagħhom ilkoll[43].

¹³U issa ngħid lilkom il-pagani. Sakemm jiena appostlu tal-pagani nibqa’ nagħmel ġieħ lill-ministeru tiegħi,

¹⁴bit-tama li nqajjem l-għira ta’ ġensi u hekk insalva lil xi wħud minnhom.

¹⁵Għax jekk it-tkeċċija tagħhom ġiebet il-ħbiberija tad-dinja ma’ Alla, l-ilqugħ tagħhom mill-ġdid xi jkun ifisser, jekk mhux ħajja mill-imwiet?

¹⁶Jekk l-ewwel frott hu mqaddes, hekk ukoll hi l-għaġna kollha; u jekk hu mqaddes l-għerq, hekk ukoll huma l-friegħi.

¹⁷Jekk xi wħud mill-friegħi tqaċċtu, int li int żebbuġa selvaġġa, li kont imlaqqam fuqhom u taqsam magħhom l-għerq u terda’ s-sustanza taż-żebbuġa,

¹⁸la tiftaħarx minn fuq il-friegħi mqaċċta. Jekk int tiftaħar, ftakar li mhux int iżżomm l-għerq, imma l-għerq iżomm lilek.

¹⁹Int għandek mnejn tgħid: “Il-friegħi tqaċċtu, biex nitlaqqam jien flokhom.”

²⁰Tajjeb! Tqaċċtu, għax ma emmnux; imma int qiegħed iżżomm bil-fidi. Timliex rasek, iżda ibża’.

²¹Jekk Alla ma ħafirhiex lill-friegħi naturali, anqas ma jaħfirha lilek.

²²Qis, mela, it-tjieba u l-ħruxija ta’ Alla: ħruxija għal dawk li waqgħu, u t-tjieba għalik jekk tibqa’ fit-tjieba tiegħu; inkella int ukoll titqaċċat.

²³Huma wkoll jerġgħu jitlaqqmu jekk ma jibqgħux ma jemmnux; għax Alla għandu l-qawwa li jerġa’ jlaqqamhom.

²⁴Jekk int ġej miż-żebbuġa selvaġġa u kontra n-natura kont imlaqqam f’żebbuġa tajba, kemm iktar jistgħu jitlaqqmu fiż-żebbuġa tagħhom stess dawk li skont in-natura ġejjin minnha!

²⁵Ma rridx li ma tkunux tafu, l-aħwa, dan il-misteru, li ma tmorrux taħsbu li intom xi għorrief; l-ebusija tal-qalb li waqgħet fuq parti minn Iżrael tibqa’ sakemm tidħol il-milja tal-pagani;

²⁶u hekk Iżrael kollu jkun salv. Kif inhu miktub: “Għad joħroġ minn Sijon il-Feddej; ineħħi l-ħażen minn Ġakobb.

²⁷U dan ikun il-patt tiegħi magħhom: meta nneħħilhom dnubiethom.”

²⁸Skont l-Evanġelju[44] huma għedewwa minħabba fikom; skont l-għażla huma maħbuba minħabba missirijiethom.

²⁹Alla ma jreġġax lura d-doni u s-sejħa tiegħu.

³⁰Bħalma fl-imgħoddi intom ma kontux tobdu lil Alla, imma issa sibtu l-ħniena tiegħu minħabba d-diżubbidjenza tagħhom;

³¹hekk huma wkoll mhumiex jobduh minħabba l-ħniena li sibtu intom mingħandu, ħalli issa huma wkoll isibu l-ħniena.

³²Għax Alla ħalla ’l kulħadd fil-jasar tad-diżubbidjenza, biex jagħmel ħniena ma’ kulħadd.

³³Kemm huma kbar l-għana, l-għerf u l-għaqal ta’ Alla! Kemm tassew ħadd ma jista’ jgħarbel il-ġudizzju tiegħu u jifhem it-triqat tiegħu!

³⁴Għax min qatt għaraf moħħ il-Mulej? Min qatt kien il-kunsillier tiegħu?

³⁵Min qatt tah l-ewwel biex jistħoqqlu l-ħlas?

³⁶Kollox ġej minnu, kollox permezz tiegħu, kollox għalih. Lilu l-glorja għal dejjem ta’ dejjem. Ammen!