Read Maltese Bible with DC – IL-BIBBJA IL-KOTBA MQADDSA RUMANI 14 Bible Online

RUMANI 14 - Maltese Bible with DC – IL-BIBBJA IL-KOTBA MQADDSA bible

RUMANI 14

¹Lil min hu dgħajjef fil-fidi ilqgħuh mingħajr ma toqogħdu tiddiskutu l-fehmiet tiegħu[45].

²Hemm min jaħseb li jista’ jiekol kollox, u hemm min, imbagħad, għax hu dgħajjef fil-fidi, jiekol ħaxix biss.

³Min jiekol kollox m’għandux imaqdar lil min ma jikolx; u min ma jikolx m’għandux jiġġudika lil min jiekol, għax Alla laqa’ lilu wkoll.

⁴Int min int biex tagħmel ħaqq mill-qaddej ta’ ħaddieħor[46]? Jekk iżommx wieqaf jew jaqax, dan jarah sidu. Iżda huwa jżomm wieqaf, għax il-Mulej għandu kull ħila li jżommu wieqaf.

⁵Hemm min jagħżel bejn jum u ieħor[47], u hemm min iqis il-jiem kollha xorta. Ħa jżomm kulħadd il-fehma tiegħu.

⁶Min iħares il-jum, iħarsu għall-ġieħ tal-Mulej; u min jiekol, jiekol għall-ġieħ tal-Mulej, ladarba b’hekk ikun qiegħed jiżżi ħajr lil Alla. U min ma jikolx, ma jikolx għall-ġieħ tal-Mulej, u hu wkoll ikun qiegħed jiżżi ħajr lil Alla.

⁷Għax ħadd minna ma jgħix għalih innifsu, u ħadd ma jmut għalih innifsu.

⁸Jekk ngħixu, ngħixu għall-Mulej; jekk immutu, immutu għall-Mulej. Sew jekk ngħixu, mela, sew jekk immutu, aħna tal-Mulej.

⁹Kristu għalhekk miet u rxoxta, biex ikun Sid kemm tal-ħajjin u kemm tal-mejtin.

¹⁰Imma int, għax għandek tagħmel ħaqq minn ħuk? Jew lil ħuk, għaliex għandek tmaqdru? Aħna lkoll għad nidhru quddiem it-tribunal ta’ Alla;

¹¹għax hemm miktub: “Daqs kemm jien ħaj, jgħid il-Mulej, quddiemi għad jinżel għarrkupptejh kull bniedem, u kull ilsien għad ifaħħar lil Alla.”

¹²Għalhekk kull wieħed minna għad jagħti kont tiegħu nnifsu lil Alla.

¹³Ma niġġudikawx iżjed, mela, lil xulxin. Aħjar taraw li ma tkunux ta’ tfixkil jew ta’ skandlu għal ħukom.

¹⁴Għax jiena naf, u minn dan jiena żgur fil-Mulej Ġesù, li xejn ma hemm imniġġes minnu nnifsu. Imma jekk xi ħadd jidhirlu li ħaġa hi mniġġsa, għalih tkun imniġġsa.

¹⁵Jekk minħabba l-ikel tiegħek tħalli lil ħuk iġarrab il-ħsara, inti ma tkunx qiegħed timxi bl-imħabba. Qis li ma tmurx, minħabba l-ikel tiegħek, iġġarraf lil dak li għalih miet Kristu.

¹⁶Tħallux illi t-tajjeb li għandkom[48] ikun kaġun ta’ tkasbir għalik.

¹⁷Is-Saltna ta’ Alla mhijiex ikel u xorb, imma hi ġustizzja, u sliem, u grazzja fl-Ispirtu s-Santu.

¹⁸Min jaqdi lil Kristu f’dan, ikun jogħġob lil Alla, u jinġieb mill-bnedmin.

¹⁹Ħalli nfittxu, mela, dak li jġib is-sliem u dak li jservi għall-edifikazzjoni ta’ xulxin.

²⁰Tħallix li bl-ikel tiegħek titħassar l-opra ta’ Alla. Kollox safi, imma jagħmel ħażin il-bniedem li jiekol xi ħaġa li biha jiskandalizza lil ħaddieħor.

²¹It-tajjeb hu li la tiekol laħam u lanqas tixrob inbid u ma tagħmel xejn li jista’ jfixkel lil ħuk.

²²Il-konvinzjoni tal-kuxjenza tiegħek żommha għalik quddiem Alla. Hieni l-bniedem li ma jikkundannax lilu nnifsu meta jaqtagħha x’se jagħmel.

²³Min jiekol bid-dubju hu kkundannat għax mhux miexi skont il-konvinzjoni tal-kuxjenza tal-fidi, u kulma mhux mill-konvinzjoni tal-fidi hu dnub.