Read Maltese Bible with DC – IL-BIBBJA IL-KOTBA MQADDSA RUMANI 15 Bible Online

RUMANI 15 - Maltese Bible with DC – IL-BIBBJA IL-KOTBA MQADDSA bible

RUMANI 15

¹Aħna li aħna sħaħ fil-fidi għandna ngħinu lid-dgħajfa jerfgħu l-piż tagħhom u mhux infittxu nogħġbu lilna nfusna.

²Kull wieħed minna għandu jfittex jogħġob lil għajru għall-ġid tiegħu.

³Għax Kristu ma fittixx jogħġob lilu nnifsu, kif inhu miktub: “It-tagħjir ta’ dawk li għajru lilek waqa’ fuqi.”

⁴Kulma nkiteb fl-Iskrittura fl-imgħoddi, inkiteb għat-tagħlim tagħna, biex bis-sabar u bil-faraġ li tagħtina l-Iskrittura, aħna jkollna t-tama.

⁵Alla, li minnu ġej kull sabar u faraġ, jagħtikom il-grazzja li tkunu fehma waħda bejnietkom skont Kristu Ġesù,

⁶biex b’fomm wieħed u b’qalb waħda tfaħħru lil Alla u Missier Sidna Ġesù Kristu.

⁷Għalhekk ilqgħu lil xulxin bħalma Kristu wkoll laqa’ lilkom, għall-glorja ta’ Alla.

⁸Jiena ngħidilkom li Kristu sar qaddej tal-Lhud ċirkonċiżi minħabba l-fedeltà ta’ Alla, biex iseħħu l-wegħdiet li għamel lill-Patrijarki,

⁹u biex il-pagani wkoll ifaħħru lil Alla minħabba l-ħniena tiegħu bħalma hu miktub: “Għalhekk jiena nfaħħrek fost il-ġnus u ngħanni tifħir ismek.”

¹⁰U ttenni tgħid: “Ifirħu, intom ġnus, flimkien mal-poplu tiegħu”;

¹¹u terġa’: “Faħħru lill-Mulej, intom ġnus kollha, ħa jfaħħruh il-popli kollha.”

¹²U jerġa’ jgħid ukoll Isaija: “U joħroġ għerq minn Ġesse [49]; iqum biex jaħkem il-ġnus [50]; u fih il-ġnus iqiegħdu t-tama tagħhom.”

¹³U Alla tat-tama jimliekom ilkoll bil-ferħ u s-sliem permezz tal-fidi tagħkom, sabiex it-tama tagħkom toktor bil-qawwa tal-Ispirtu s-Santu.

¹⁴Jien żgur minnkom l-aħwa, li intom ilkoll mimlija bit-tjieba u bl-għerf kollu, kapaċi twiddbu lil xulxin.

¹⁵Imma jien għamilt il-qalb u ktibtilkom biex infakkarkom f’xi ħwejjeġ. Dan għamiltu bil-grazzja li tani Alla

¹⁶li nkun ministru ta’ Kristu Ġesù fost il-pagani, ikkonsagrat biex naħdem għall-Evanġelju ta’ Alla u nagħmel mill-ġnus offerta mqaddsa mill-Ispirtu s-Santu u li togħġob lil Alla[51].

¹⁷Għalhekk jien għandi biex nitkabbar fi Kristu Ġesù fis-servizz tiegħi għal Alla.

¹⁸Ma nissogra nsemmi xejn, jekk mhux dak li għamel Kristu permezz tiegħi biex inwassal il-pagani għall-ubbidjenza[52] bil-kelma u bl-għemil,

¹⁹bil-qawwa tas-sinjali u l-mirakli, bil-qawwa tal-Ispirtu ta’ Alla. Hekk permezz tiegħi seħħ ix-xandir tal-Evanġelju ta’ Kristu minn Ġerusalemm u l-inħawi ta’ madwarha sal-Illirja[53].

²⁰Ix-xewqa tiegħi hi li nxandar l-Evanġelju fejn qatt ma ssemma Kristu, sabiex ma nkunx bnejt fuq sisien li jkun qiegħed ħaddieħor;

²¹kif inhu miktub: “Biex dawk li qatt ma kellhom l-aħbar jaraw; u dawk li qatt ma semgħu bih jifhmuh.”

²²Għalhekk dejjem kien hemm xi jżommni li niġi għandkom.

²³Issa, billi f’dawn l-inħawi ma għandix post ieħor fejn immur u billi minn ħafna snin ’l hawn kelli x-xewqa li niġi sa għandkom,

²⁴nittama li meta nkun fi triqti lejn Spanja[54], ngħaddi narakom, jiena u għaddej minn hemm; u nieħu mingħandkom li jkolli bżonn għall-vjaġġ, wara li nkun gawdejt il-kumpanija tagħkom għal xi ftit żmien.

²⁵Issa sa mmur Ġerusalemm biex naqdi lill-qaddisin[55];

²⁶għax in-nies tal-Maċedonja[56] u l-Akaja[57] għoġobhom jaqsmu ġidhom mal-fqar li hemm Ġerusalemm fost il-qaddisin.

²⁷Hekk għoġobhom, iżda dan hu dmirhom: jekk il-pagani għandhom mingħand il-Lhud il-ġid spiritwali, huma fid-dmir li jservuhom fil-ħwejjeġ materjali.

²⁸Meta nkun temmejt dan u nkun tajthom din il-ġabra, nitlaq lejn Spanja u ngħaddi għandkom.

²⁹Jiena naf li meta nasal għandkom, il-miġja tiegħi tkun mimlija bil-barka ta’ Kristu.

³⁰Inħeġġiġkom, l-aħwa, permezz ta’ Sidna Ġesù Kristu u permezz tal-imħabba tal-Ispirtu, tqabdu miegħi intom u itolbu lil Alla għalija

³¹biex jeħlisni minn dawk fil-Lhudija li ma jemmnux[58], u biex is-servizz tiegħi jkun milqugħ tajjeb mill-qaddisin f’Ġerusalemm.

³²Imbagħad, jekk Alla jrid, niġi għandkom ferħan u jkolli ftit tal-mistrieħ għandkom.

³³Alla tas-sliem ikun magħkom ilkoll. Ammen.