Read Maltese Bible with DC – IL-BIBBJA IL-KOTBA MQADDSA RUMANI 9 Bible Online

RUMANI 9 - Maltese Bible with DC – IL-BIBBJA IL-KOTBA MQADDSA bible

RUMANI 9

¹Ngħidilkom is-sewwa fi Kristu, m’iniex nigdeb, tixhidli l-istess kuxjenza tiegħi fl-Ispirtu s-Santu,

²li jiena mnikket għall-aħħar, u dejjem qalbi maqsuma;

³nixtieq li kont jiena stess maqtugħ minn Kristu minħabba f’ħuti[35], nies ġensi skont il-ġisem:

⁴l-Iżraelin. Tagħhom hija l-adozzjoni ta’ wlied Alla u l-glorja, il-pattijiet u l-Liġi, il-liturġija u l-wegħdiet;

⁵tagħhom huma l-patrijarki; u kien minnhom li, skont il-ġisem, ħareġ Kristu, li hu fuq kollox, Alla mbierek għal dejjem ta’ dejjem. Ammen!

⁶Mhux li l-wegħda ta’ Alla sfat fix-xejn; għax mhux dawk kollha li huma mnissla minn Iżrael[36] huma Iżraelin.

⁷Mhux dawk kollha li huma min-nisel ta’ Abraham huma wliedu għax il-wegħda kienet din: “Minn Iżakk jissejjaħ in-nisel tiegħek.”

⁸Dan ifisser, mhux ulied il-ġisem huma wlied Alla, imma l-imwielda bis-saħħa tal-wegħda huma magħduda b’ulied Abraham.

⁹Il-wegħda kienet tgħid: “Bħal dan iż-żmien jien nerġa’ niġi għandek u Sara jkollha iben.”

¹⁰U mhux hekk biss, imma l-istess ġara meta Rebekka kellha ż-żewġ uliedha minn Iżakk missierna.

¹¹Kienu għadhom ma tweldux, bla ma kienu għadhom għamlu xejn la tajjeb u anqas ħażin - biex il-pjan tal-għażla ta’ Alla jseħħ bis-saħħa ta’ Alla, li sejjaħ,

¹²u mhux bis-saħħa tal-opri - Alla qalilha: “Il-kbir iservi liż-żgħir”

¹³kif inhu miktub ukoll: “Ħabbejt lil Ġakobb u bgħadt lil Għesaw [37].”

¹⁴Xi ngħidu mela? Li Alla ma jagħmilx sewwa? Ma jkun qatt.

¹⁵Alla qal lil Mosè: “Inħenn għal min inħenn; u nitħassar lil min nitħassar.”

¹⁶Mhux x’wieħed irid jew kemm jitħabat li jgħodd, iżda għal min Alla jħenn.

¹⁷L-Iskrittura tgħid lill-Fargħun: “Għalhekk qajjimtek, biex nuri l-qawwa tiegħi bik u nxandar ismi mal-art kollha.”

¹⁸Hu jħenn għal min irid, u jwebbes il-qalb ta’ min irid.

¹⁹Imma tista’ tgħidli: “Għaliex jibqa’ jċanfar? Min jista’ jieqaf lir-rieda tiegħu?”

²⁰Ja bniedem, int min int biex teħodha ma’ Alla? Forsi l-fuħħar jeħodha kontra l-ħaddiem u jgħidlu: “Għaliex għamiltni hekk?”

²¹Ma jistax il-ħaddiem tal-fuħħar jagħmel mit-taħlita tat-tafal oġġett ta’ ġieħ jew oġġett ta’ għajb?

²²Jekk Alla li jrid juri l-korla tiegħu u jgħarraf il-qawwa tiegħu, issaporta b’sabar kbir l-oġġetti tal-korla lesti għall-qerda;

²³biex imbagħad jgħarraf l-għana tal-glorja tiegħu għall-oġġetti tal-ħniena, li hu ħejja għall-glorja minn qabel, jiġifieri,

²⁴lilna li hu sejjaħ, mhux biss mil-Lhud, imma wkoll mill-Ġentili[38]…

²⁵Bħalma jgħid fil-Ktieb ta’ Hosegħa: “Insejjaħ lil dak li mhux poplu tiegħi: ‘Il-Poplu Tiegħi’ u lil dik li mhijiex maħbuba, ‘Maħbuba.’

²⁶U jiġri li fejn kienu jsejħulhom: ‘Intom m’intomx il-Poplu Tiegħi,’ hemm isejħulhom: ‘Ulied Alla l-Ħaj.’ ”

²⁷Isaija għolla leħnu u qal dwar Iżrael: “Ukoll jekk stess l-għadd ta’ wlied Iżrael ikun daqs ir-ramel tal-baħar, il-fdal biss isalva,

²⁸għax il-Mulej dalwaqt jagħmel il-kont u jaqtagħha fil-qasir mad-dinja kollha.”

²⁹Kif ukoll il-profeta Isaija qal minn qabel: “Li kieku l-Mulej tal-eżerċti ma ħallilniex nisel, konna nsiru bħal Sodoma, u ’l Gomorra konna nixbhu.”

³⁰Xi ngħidu mela? Ngħidu dan: li l-pagani li ma kinux ifittxu l-ġustizzja kisbu l-ġustizzja, il-ġustizzja li ġejja mill-fidi;

³¹imma Iżrael, li kienu jfittxu l-Liġi li tieħu għall-ġustizzja, ma laħqux l-iskop tal-Liġi.

³²Għaliex? Għax ma fittxewhiex permezz tal-fidi, imma permezz tal-opri. Tfixklu fil-ġebla tat-tfixkil

³³skont ma hu miktub: “Arawni! Jien inqiegħed f’Sijon ġebla għat-tfixkil u blata tat-tiġrif, u min jemmen fiha ma jitħawwadx.”