Read Maltese Bible with DC – IL-BIBBJA IL-KOTBA MQADDSA 1 KORINTIN 11 Bible Online

1 KORINTIN 11 - Maltese Bible with DC – IL-BIBBJA IL-KOTBA MQADDSA bible

1 KORINTIN 11

¹Ixbhu lili bħalma jien nixbah lil Kristu.

²Infaħħarkom għax tiftakru dejjem fija u żżommu t-tradizzjonijiet li jien għaddejtilkom.

³Irridkom tkunu tafu li r-ras ta’ kull raġel huwa Kristu, u ras il-mara huwa r-raġel, u ras Kristu hu Alla.

⁴Kull raġel li jitlob jew jipprofetizza b’rasu mgħottija jagħmel għajb lil rasu.

⁵Kull mara li titlob jew tipprofetizza b’rasha mikxufa tagħmel għajb lil rasha; l-istess bħallikieku kellha xagħarha maqtugħ[30].

⁶Jekk il-mara ma tgħattix rasha, ħalliha taqta’ xagħarha. Jekk hu għajb għall-mara li taqta’ jew tqaxxar xagħarha, ħalliha tgħatti rasha.

⁷Raġel ma jixraqlux jgħatti rasu, għax hu xbieha u glorja ta’ Alla; il-mara hi l-glorja tar-raġel.

⁸Mhux ir-raġel ġej mill-mara, imma l-mara ġejja mir-raġel.

⁹U mhux ir-raġel li kien maħluq għall-mara, imma l-mara li kienet maħluqa għar-raġel.

¹⁰Għalhekk il-mara għandha tinsatar biex turi li hemm is-setgħa ta’ żewġha fuqha minħabba l-anġli.

¹¹Imma la l-mara ma hi mingħajr ir-raġel u lanqas ir-raġel mingħajr il-mara fil-Mulej.

¹²Kif il-mara saret mir-raġel, hekk ir-raġel sar permezz tal-mara. Kollox imbagħad minn Alla.

¹³Iġġudikaw intom! Jixraq li mara titlob xuxa lil Alla?

¹⁴Jaqaw ma tgħallimniex in-natura stess li x-xagħar twil hu għajb għar-raġel,

¹⁵imma għall-mara x-xagħar twil hu ġmielha? Ix-xagħar twil ngħata lilha bħala velu.

¹⁶Jekk xi ħadd irid jitlewwem fuq dan, ngħidulu: aħna ma aħniex imdorrijin hekk u lanqas il-knejjes ta’ Alla.

¹⁷F’li sa ngħidilkom ma nfaħħarkomx! Għax intom tiltaqgħu mhux għall-ġid imma għad-deni.

¹⁸Qabel xejn, kull meta tiltaqgħu fil-knisja smajt li hemm firda bejnietkom, u xi ħaġa nemmen.

¹⁹Għandu jkun hemm firdiet, biex jidhru fostkom il-ġusti.

²⁰Meta tiltaqgħu f’post wieħed mhux l-ikla tal-Mulej li intom tieklu.

²¹Għax kull wieħed minnkom iġib, jaqbad u jiekol l-ikel tiegħu; wieħed bil-ġuħ u l-ieħor fis-sakra.

²²Ma għandkomx djar fejn tieklu u tixorbu? Jew tridu twaqqgħu fl-għajb il-Knisja ta’ Alla u ġġiegħlu jistħu lil dawk li ma għandhomx? X’ngħidilkom? Infaħħarkom? F’dan ma nfaħħarkomx.

²³Jien irċevejt mingħand il-Mulej it-tagħlim li għaddejt lilkom, jiġifieri, li l-Mulej Ġesù, fil-lejl li fih kien ittradut, ħa l-ħobż

²⁴u wara li radd il-ħajr qasmu u qal: “Dan hu ġismi li jingħata għalikom; agħmlu dan b’tifkira tiegħi.”

²⁵Hekk ukoll għamel bil-kalċi wara li kiel u qal: “Dan il-kalċi hu l-patt il-ġdid b’demmi; agħmlu dan kull meta tixorbu, b’tifkira tiegħi.”

²⁶Mela kull meta tieklu dan il-ħobż u tixorbu dan il-kalċi, intom ixxandru l-mewt tal-Mulej sa ma jiġi.

²⁷Mela kull min jiekol il-ħobż jew jixrob il-kalċi tal-Mulej bla ma jixraqlu, ikun ħati tal-ġisem u d-demm tal-Mulej.

²⁸Ħa jgħarbel il-bniedem lilu nnifsu, imbagħad jiekol il-ħobż u jixrob il-kalċi.

²⁹Min jiekol u jixrob bla ma jagħżel minn ikel ieħor il-ġisem tal-Mulej, ikun jiekol u jixrob il-kundanna tiegħu stess.

³⁰Għalhekk ħafna fostkom huma bla saħħa u morda u oħrajn mejta.

³¹Jekk aħna ngħarblu lilna nfusna sewwa, ma nkunux ikkundannati.

³²Meta jagħmel ħaqq minna l-Mulej, jagħmlu biex iwiddibna ħalli ma nkunux ikkundannati mad-dinja.

³³Għalhekk mela, l-aħwa, meta tiltaqgħu biex tieklu, stennew lil xulxin.

³⁴Jekk xi ħadd ikun bil-ġuħ ħa jiekol id-dar; biex ma tkunux iltqajtu għall-kundanna tagħkom. Mill-bqija, meta niġi ngħidilkom x’għandkom tagħmlu.