Read Maltese Bible with DC – IL-BIBBJA IL-KOTBA MQADDSA 1 KORINTIN 9 Bible Online

1 KORINTIN 9 - Maltese Bible with DC – IL-BIBBJA IL-KOTBA MQADDSA bible

1 KORINTIN 9

¹Jaqaw m’iniex ħieles jien? M’iniex appostlu? Ma rajtx lil Sidna Ġesù? M’intomx intom l-opra tiegħi fil-Mulej?

²Ukoll jekk stess għal ħaddieħor jien m’iniex appostlu, għalikom jien. Għax is-siġill[22] tal-appostolat tiegħi huwa intom stess fil-Mulej.

³Quddiem dawk li jakkużawni, id-difiża tiegħi hi din:

⁴ma għandniex il-jedd li nieklu u nixorbu[23]?

⁵Ma għandniex id-dritt li jkollna mara nisranija magħna[24]? bħall-appostli l-oħra u l-aħwa tal-Mulej[25] u Kefa?

⁶Jaqaw jien u Barnaba biss ma għandniex id-dritt li ma naħdmux?

⁷Min qatt imur suldat u jħallas l-ispejjeż hu? Min iħawwel dielja u ma jikolx il-frott minnha hu? Min jirgħa l-merħla u ma jixrobx il-ħalib tagħha hu?

⁸M’iniex ngħid dan bl-awtorità ta’ bniedem. Mhux il-liġi stess tgħidu dan?

⁹Fil-Liġi ta’ Mosè hemm miktub: “Tagħmilx is-sarima f’ħalq il-gendus li jkun jidres.” Jaqaw Alla ħsiebu fil-gniedes?

¹⁰Mhux għalina biss qiegħed jgħid? Minħabba fina żgur inkiteb dan, biex min jaħrat, jaħrat bit-tama; u min jidres, jidres bit-tama li jkollu sehmu.

¹¹Jekk aħna żrajna fostkom il-ħwejjeġ spiritwali, ħaġa kbira jekk naħsdu minn għandkom il-ħwejjeġ materjali?

¹²Jekk l-oħrajn għandhom id-dritt li jaqsmu ħwejjiġkom magħkom, mhux aktar minnhom aħna? Iżda aħna ma nqdejniex b’dan id-dritt; iżda sofrejna kollox biex ma nfixklux l-Evanġelju ta’ Kristu.

¹³Ma tafux li min iservi fit-tempju jiekol mit-tempju, u dawk li jservu l-artal jaqsmu mal-artal?

¹⁴Hekk ukoll il-Mulej ordna li dawk li jxandru l-Evanġelju jgħixu mill-Evanġelju.

¹⁵Jien iżda ma nqdejt bl-ebda wieħed minn dawn id-drittijiet. Ma ktibtx dan biex ninqeda bihom issa. Aħjar għalija li mmut milli[26]… Ħadd ma hu sa jġibli fix-xejn il-ftaħir tiegħi.

¹⁶Jekk jiena nxandar l-Evanġelju ma għandix biex niftaħar; jien obbligat nagħmlu dan. Ħażin għalija jekk ma nxandarx l-Evanġelju.

¹⁷Jekk dan nagħmlu minn rajja, ikolli dritt għall-ħlas; imma jekk nagħmlu għax obbligat, dan ifisser li qiegħed nagħmel ix-xogħol li Alla fdali f’idejja.

¹⁸X’inhu mela l-ħlas tiegħi? Li meta nxandar l-Evanġelju, inxandru b’xejn, bla ma nfittex id-dritt li jagħtini l-Evanġelju stess.

¹⁹Għax għad li ma jiena marbut ma’ ħadd, jien għamilt lili nnifsi lsir ta’ kulħadd biex nirbaħ lil ħafna.

²⁰Mal-Lhud, sirt Lhudi, biex nirbaħ il-Lhud; ma’ dawk li huma taħt il-Liġi, qgħadt taħt il-Liġi - jien li m’iniex taħt il-Liġi - biex nirbaħ lil dawk li huma taħt il-Liġi.

²¹Bla Liġi ma’ dawk li huma mingħajrha - mhux għax jien bla liġi ta’ Alla, għax Kristu hu l-liġi tiegħi - biex nirbaħ lil dawk li huma barra l-Liġi.

²²Sirt dgħajjef mad-dgħajfin, biex nirbaħ id-dgħajfin. Sirt kollox ma’ kulħadd, biex insalva lil kulħadd.

²³Nagħmel dan kollu minħabba l-Evanġelju biex ikolli sehem minnu.

²⁴Ma tafux li l-ġerrejja fl-istadju kollha jiġru, imma l-premju wieħed jirbħu? Iġru, mela, ħalli tirbħuh.

²⁵Kull atleta jiċċaħħad minn kollox, u dawn biex jirbħu kuruna midbiela, imma aħna, waħda li ma tidbielx.

²⁶Jien issa hekk niġri, mhux qisni bl-addoċċ; ma nissarax bħallikieku qiegħed nagħti fil-vojt.

²⁷Iżda ngħakkes bl-aħrax lil ġismi u njassru, biex ma jiġrilix li, wara li nkun ippridkajt lil ħaddieħor, jiena stess insib ruħi kkundannat.