Read Maltese Bible with DC – IL-BIBBJA IL-KOTBA MQADDSA 2 KORINTIN 6 Bible Online

2 KORINTIN 6 - Maltese Bible with DC – IL-BIBBJA IL-KOTBA MQADDSA bible

2 KORINTIN 6

¹Ladarba qegħdin naħdmu flimkien ma’ Alla, aħna mela nħeġġukom biex ma tirċevux il-grazzja tiegħu għal xejn.

²Għax hu jgħid: “Fiż-żmien it-tajjeb smajtek, f’jum is-salvazzjoni għentek.” Araw, issa hu ż-żmien tajjeb; araw, issa hu jum is-salvazzjoni!

³Aħna xejn ma nagħmlu li jista’ jkun ta’ tfixkil lil xi ħadd, biex il-ministeru tagħna ma jaqax fl-għajb.

⁴F’kollox inqisu ruħna bħala ministri ta’ Alla, bis-sabar kollu fit-tiġrib, fit-tbatija, fid-djieqa,

⁵fis-swat, fil-ħabsijiet, fit-tixwix, fit-taħbit, fis-sahriet bla rqad, fis-sawm;

⁶bis-safa tal-qalb, bl-għerf, bis-sabar, bil-ħlewwa, bi spirtu qaddis, bl-imħabba sinċiera,

⁷bil-kelma tas-sewwa, bil-qawwa ta’ Alla, bl-armi tal-ġustizzja fuq il-lemin u fuq ix-xellug,

⁸fil-ġieħ u fl-għajb, kemm jekk jgħidu l-ħażin u kemm jekk jgħidu t-tajjeb fuqna; iżommuna bħala nies qarrieqa, lilna li ngħidu s-sewwa;

⁹bħala nies li ma jafhom ħadd, għad li kulħadd jafna; bħala nies f’xifer il-mewt, għad li aħna ħajjin; bħala nies ikkastigati, għad li m’aħniex mogħtijin għall-mewt;

¹⁰bħala nies imdejqa, għad li dejjem ferħana; bħala nies foqra, għad li nagħmlu għonja lil ħafna; bħala nies li ma għandhom xejn, għad li kollox huwa tagħna!

¹¹Ftaħna fommna għalikom, o Korintin, b’qalbna miftuħa beraħ!

¹²Għalikom m’hemmx djieq f’qalbna; id-djieq qiegħed f’qalbkom.

¹³Ħallsuna, qiegħed inkellimkom bħal uliedi, billi tiftħu qalbkom beraħ intom ukoll!

¹⁴La tintrabtux mal-pagani taħt madmad wieħed li ma jiġikomx. X’għandhom x’jaqsmu bejniethom il-ġustizzja u l-ħażen? X’xirka hemm bejn id-dawl u d-dlam?

¹⁵Xi ftehim hemm bejn Kristu u Beljar[16]? Jew x’għandu x’jaqsam min jemmen ma’ min ma jemminx?

¹⁶X’rabta hemm bejn it-tempju ta’ Alla mal-idoli? Aħna t-tempju ta’ Alla l-ħaj. Kif jgħid Alla: Ngħammar f’nofshom u nimxi magħhom. Inkun Alla tagħhom; U huma jkunu l-poplu tiegħi.

¹⁷Għalhekk oħorġu minn ġo nofshom, u nfirdu minnhom, jgħid il-Mulej; la tmissux l-imniġġes, u jien nilqagħkom;

¹⁸u nkun għalikom missier u intom tkunu għalija wlied, subjien u bniet, jgħid il-Mulej, li jista’ kollox.