Read Maltese Bible with DC – IL-BIBBJA IL-KOTBA MQADDSA GALATIN 2 Bible Online

GALATIN 2 - Maltese Bible with DC – IL-BIBBJA IL-KOTBA MQADDSA bible

GALATIN 2

¹Wara erbatax-il sena rġajt tlajt Ġerusalemm[6] flimkien ma’ Barnaba u ħadt miegħi lil Titu wkoll.

²Tlajt hemmhekk wara li kelli rivelazzjoni; u jiena qegħedt quddiemhom, lill-mexxejja ewlenin weħidhom, u wrejthom l-Evanġelju li qiegħed inxandar fost il-ġnus, biex ma nkunx ġrejt jew qiegħed niġri għalxejn.

³Madankollu anqas Titu li kien miegħi, hu li hu Grieg, ma kien imġiegħel li jkun ċirkonċiż.

⁴Iżda minħabba f’xi wħud li riedu jiżżattu, aħwa foloz li ndaħlu bla jedd biex jissindikaw il-libertà tagħna li għandna fi Kristu Ġesù ħalli jitfgħuna fil-jasar[7]…

⁵lilhom anqas għal waqt wieħed biss ma rħejnielhom iwaqqgħuna għalihom, ħalli b’hekk il-verità tal-Evanġelju tibqa’ sħiħa għalikom.

⁶Min-naħa tagħhom, il-mexxejja - kienu x’kienu, lili xejn ma jimpurtani; Alla lejn wiċċ ħadd ma jħares - dawk li kellhom isem, ma żiduli xejn ġdid lili;

⁷anzi, għall-kuntrarju, meta raw li lili kien fdat ix-xandir tal-Evanġelju fost il-Ġentili bħalma kien lil Pietru fost il-Lhud -

⁸għax Dak li ħadem b’Pietru u għamlu appostlu għal fost il-Lhud ħadem ukoll bija għal fost il-Ġentili -

⁹meta għarfu l-grazzja li kienet mogħtija lili, Ġakbu, Kefa u Ġwanni, li kienu meqjusin bħala l-kolonni, taw lili u ’l Barnaba l-id il-leminija tagħhom b’sinjal tal-għaqda ta’ bejnietna, biex aħna naħdmu fost il-Ġentili u huma fost il-Lhud;

¹⁰talbuna biss, li min-naħa tagħna nibqgħu niftakru fil-fqar[8], ħaġa li fittixt nagħmilha minn qalbi.

¹¹Meta Kefa ġie Antjokja[9], jiena waqaftlu f’wiċċu, għaliex kellu tort.

¹²Għax qabel ma waslu xi wħud mingħand Ġakbu, hu kien qiegħed jiekol mal-Ġentili; iżda mbagħad lil dawn beda jaħrabhom u jitwarrab minnhom meta waslu dawk, għaliex baża’ mil-Lhud ċirkonċiżi.

¹³Il-Lhud l-oħra bdew jimxu bl-uċuħ bħalu, u saħansitra Barnaba ħalla ruħu jitħajjar minnhom fil-wiri ta’ ħaġa b’oħra.

¹⁴Imma meta rajt li ma kinux miexja sewwa skont il-verità tal-Evanġelju, jiena għedt lil Kefa quddiem kulħadd: “Jekk inti, li int Lhudi, qed iġġib ruħek bħall-Ġentili u mhux ta’ Lhudi li int, kif qiegħed iġġiegħel il-Ġentili jġibu ruħhom ta’ Lhud?”

¹⁵Aħna, Lhud minn twelidna u mhux midinbin mill-Ġentili,

¹⁶aħna li nafu li l-bniedem ma jkunx iġġustifikat bl-opri tal-Liġi imma bil-fidi f’Ġesù Kristu[10], aħna wkoll emminna f’Ġesù Kristu, sabiex inkunu ġġustifikati bil-fidi fi Kristu u mhux bl-opri tal-Liġi, għaliex bl-opri tal-Liġi ebda bniedem ma jkun iġġustifikat.

¹⁷Jekk aħna, li nfittxu l-ġustifikazzjoni permezz ta’ Kristu, aħna stess midinbin ukoll, allura Kristu qaddej tad-dnub? Ma jkun qatt!

¹⁸Għax jekk jiena nerġa’ nibni dak li nkun ħattejt, inkun qed nagħti prova li jiena ħati.

¹⁹Imma jien permezz tal-Liġi mitt għal-Liġi biex ngħix għal Alla; issallabt ma’ Kristu.

²⁰Ngħix, imma mhux iżjed jien, iżda jgħix fija Kristu. Il-ħajja li issa ngħix fil-ġisem qiegħed ngħixha bil-fidi fl-Iben ta’ Alla, li ħabbni u ta lilu nnifsu għalija.

²¹M’iniex inġib fix-xejn il-grazzja ta’ Alla; għax kieku l-ġustifikazzjoni kellha tiġi mil-Liġi, Kristu kien ikun miet għal xejn.