Read Maltese Bible with DC – IL-BIBBJA IL-KOTBA MQADDSA GALATIN 3 Bible Online

GALATIN 3 - Maltese Bible with DC – IL-BIBBJA IL-KOTBA MQADDSA bible

GALATIN 3

¹Ja Galatin bla moħħ, min saħħarkom bi kliemu? Intom li Ġesù Kristu tpinġa msallab quddiem għajnejkom!

²Dan biss irrid naf minn għandkom: l-Ispirtu rċevejtuh mill-opri tal-Liġi jew mis-smigħ tal-fidi?

³Daqshekk intom boloh? Bdejtu bl-ispirtu u issa sa tkomplu bil-ġisem?

⁴Batejtu dan kollu għal xejn, jekk tassew għal xejn?

⁵Meta Alla jagħtikom l-Ispirtu u juri s-setgħa tiegħu permezz tagħkom, dan isir bis-saħħa tal-opri tal-Liġi jew bis-smigħ tal-fidi?

⁶Hekk, Abraham “emmen lil Alla, u dan kien magħdud lilu għall-ġustifikazzjoni.”

⁷Kunu afu mela, li dawk li jemmnu, dawk huma wlied Abraham.

⁸U l-Iskrittura, li rat sa minn qabel li Alla kellu jiġġustifika l-Ġentili permezz tal-fidi, ħabbret minn qabel lil Abraham: ‘Fik jitbierku l-ġnus kollha’.

⁹Għalhekk dawk li jemmnu jitbierku ma’ Abraham li kien jemmen.

¹⁰Imma dawk kollha li jgħixu bl-opri tal-Liġi huma taħt is-saħta. Għax hemm miktub: ‘Misħut kull min ma joqgħodx għall-ħwejjeġ kollha li hemm imniżżla fil-ktieb tal-Liġi u ma jagħmilhomx’.

¹¹U li ħadd permezz tal-Liġi ma hu ġġustifikat quddiem Alla jidher ċar, ladarba ‘il-ġust jgħix bil-fidi’;

¹²issa l-Liġi mhijiex ġejja mill-fidi, imma ‘min jagħmel dawn il-ħwejjeġ jgħix bihom’.

¹³Kristu fdiena mis-saħta tal-Liġi billi sar hu nnifsu saħta għalina, għax hemm miktub: ‘Misħut min ikun imdendel mal-għuda’,

¹⁴biex fi Kristu Ġesù l-barka ta’ Abraham tilħaq il-ġnus kollha, u biex permezz tal-fidi aħna nilqgħu l-wegħda tal-Ispirtu.

¹⁵Sa nitkellem ta’ bniedem, l-aħwa: testment, għad li jkun ta’ bniedem, ħadd ma jista’ jwaqqgħu jew iżid miegħu kemm-il darba jkun magħmul kif imiss.

¹⁶Issa l-wegħdiet saru lil Abraham ‘u lin-nisel’ tiegħu. L-Iskrittura ma tgħidx ‘u lin-nislijiet’ bħallikieku kienu ħafna, iżda bħallikieku wieħed: ‘lin-nisel tiegħek’, li hu Kristu.

¹⁷Jien dan ngħid: Liġi, li ġiet erba’ mija u tletin sena wara[11], ma tistax tħassar patt, magħmul kif imiss minn Alla, b’mod li ġġib fix-xejn il-wegħda.

¹⁸Għax jekk il-wirt ġej bis-saħħa tal-Liġi, mela ma jkunx bis-saħħa tal-wegħda; iżda kien bis-saħħa tal-wegħda li Alla ta l-grazzja lil Abraham.

¹⁹Għalfejn il-Liġi, mela? Kienet żjieda li saret minħabba fid-dnub…?[12] sakemm ma jkunx ġie n-nisel li għalih saret il-wegħda, li kienet imxandra mill-anġli[13] permezz ta’ medjatur.

²⁰Iżda l-medjatur mhuwiex ta’ wieħed; imma Alla hu wieħed.

²¹Mela l-Liġi hi kontra l-wegħdiet ta’ Alla? Ma jkun qatt! Għaliex kieku ngħatat liġi li tista’ tagħti l-ħajja, allura tassew li l-ġustifikazzjoni kienet tkun bis-saħħa tal-Liġi.

²²Imma l-Iskrittura xeħtet kollox taħt id-dnub, ħalli l-wegħda, bis-saħħa tal-fidi f’Ġesù[14] Kristu, tingħata lil dawk li jemmnu.

²³Qabel ma ġiet il-fidi, aħna konna miżmumin priġunieri taħt il-ħarsien tal-Liġi, sa ma tiġi l-fidi li kellha tkun irrivelata.

²⁴Il-Liġi, mela, kienet tmexxina qisna tfal lejn Kristu[15], biex inkunu ġġustifikati permezz tal-fidi.

²⁵Issa li l-fidi ġiet, ma neħtiġux aktar min imexxina.

²⁶Għax intom ulied Alla lkoll kemm intom, permezz tal-fidi fi Kristu Ġesù.

²⁷Intom, li intom mgħammda fi Kristu, ilbistu ’l Kristu.

²⁸Issa ma hemmx iżjed Lhudi u anqas Grieg, ma hemmx ilsir u anqas ħieles, ma hemmx raġel u anqas mara; għax intom ilkoll ħaġa waħda fi Kristu Ġesù.

²⁹Imma jekk intom ta’ Kristu, intom ukoll nisel Abraham, werrieta skont il-wegħda.