Read Maltese Bible with DC – IL-BIBBJA IL-KOTBA MQADDSA GALATIN 4 Bible Online

GALATIN 4 - Maltese Bible with DC – IL-BIBBJA IL-KOTBA MQADDSA bible

GALATIN 4

¹Irrid ngħid li, sakemm idum iż-żmien li fih il-werriet ikun għadu tifel, dan ma jkunx aħjar minn ilsir, għad li hu sid il-ġid kollu;

²iżda jkun taħt il-ħarsien tat-tuturi u tal-amministraturi, sa ma jasal iż-żmien magħżul mill-missier[16].

³Hekk ukoll aħna: meta konna tfal, konna lsiera taħt l-elementi tad-dinja[17].

⁴Iżda meta waslet il-milja taż-żmien, Alla bagħat lil Ibnu, imwieled minn mara, imwieled taħt il-Liġi,

⁵biex jifdi lil dawk li kienu taħt il-Liġi, biex ikollna l-adozzjoni ta’ wlied.

⁶U għax intom ulied, Alla bagħat l-Ispirtu ta’ Ibnu f’qalbna jgħajjat: Abba! Missier!

⁷U hekk m’intix iżjed ilsir, iżda iben; u jekk iben, werriet ukoll bil-grazzja ta’ Alla.

⁸Imma fl-imgħoddi lil Alla ma kontux tafuh u kontu taqdu lill-ħlejjaq li m’humiex allat.

⁹Issa lil Alla tafuh, jew aħjar, Alla jafkom; mela, kif erġajtu lura lejn l-elementi bla saħħa u bla siwi, u tridu terġgħu taqduhom biex tħarsu

¹⁰l-jiem, ix-xhur, l-istaġuni u s-snin[18]?

¹¹Qiegħed nibża’ li t-taħbit li tħabatt għalikom kien kollu ta’ xejn.

¹²Kunu bħali, nitlobkom, bħalma jien bħalkom, l-aħwa. Ħadd minnkom ma naqasni f’xejn.

¹³Intom tafu li meta xandartilkom l-Evanġelju għall-ewwel darba, kien minħabba li kont marid.

¹⁴Għalkemm din il-marda f’ġismi kienet ta’ prova għalikom, intom ma stmerrejtunix u anqas skartajtuni, iżda lqajtuni bħala anġlu ta’ Alla, bħala Kristu Ġesù.

¹⁵Fejn hu issa l-ferħ tagħkom? Jien xhud għalikom, li kieku kien jista’ jkun kontu taqilgħu għajnejkom u tagħtuhomli.

¹⁶Sirt issa, mela, għadu tagħkom għax qiegħed ngħidilkom il-verità?

¹⁷Huma jfittxukom, iżda mhux b’fehma tajba; iridu jifirdukom minni biex intom tfittxu lilhom.

¹⁸Tajjeb li wieħed jitqanqal għall-ġid tal-oħrajn dejjem, u mhux biss meta nkun magħkom jien.

¹⁹Uliedi, għal darba oħra qiegħed inħoss l-uġigħ tal-ħlas sakemm Kristu jissawwar fikom.

²⁰Bħalissa jien ridt kieku nkun għandkom u nbiddel leħni, għax inħossni inkwetat minħabba fikom.

²¹Għiduli, intom li tridu toqogħdu taħt il-Liġi! Ma tisimgħux xi tgħid il-Liġi?

²²Hemm miktub li Abraham kellu żewġ ulied, wieħed mill-ilsira, u wieħed mill-ħielsa;

²³imma dak li ġie mill-ilsira twieled bis-saħħa tal-ġisem, waqt li dak li ġie mill-ħielsa twieled bis-saħħa tal-wegħda.

²⁴Dan kollu ntqal b’tixbiha, għax dawn in-nisa jfissru żewġ pattijiet: wieħed ġej mill-muntanja Sinaj, li tiled għall-jasar: din hija Ħagar -

²⁵għax Ħagar hija l-muntanja Sinaj li hi fl-Għarabja - u taqbel ma’ Ġerusalemm[19] tal-lum li għadha mjassra flimkien ma’ wliedha.

²⁶Iżda Ġerusalemm ta’ fuq, li hi ommna, hi ħielsa,

²⁷għax hemm miktub: “Ifraħ, mara bla wlied li ma tiledx, erfa’ leħnek u għajjat bil-ferħ, int li ma tbatix b’uġigħ il-ħlas; għax ulied il-mara abbandunata huma aktar kotrana minn dawk ta’ dik li għandha ’l żewġha”.

²⁸Issa intom, l-aħwa, intom ulied il-wegħda, bħal Iżakk.

²⁹Iżda bħalma f’dak iż-żmien, dak li twieled bis-saħħa tal-ġisem ippersegwita lil dak li twieled bis-saħħa tal-Ispirtu, hekk ukoll issa.

³⁰Iżda xi tgħid l-Iskrittura? “Keċċi ’l barra ’l-ilsira u ’l binha, għax bin l-ilsira ma jaqsamx fil-wirt ma’ bin il-ħielsa”.

³¹Għalhekk, l-aħwa, aħna m’aħniex ulied l-ilsira, imma wlied il-ħielsa.