Read Maltese Bible with DC – IL-BIBBJA IL-KOTBA MQADDSA GALATIN 5 Bible Online

GALATIN 5 - Maltese Bible with DC – IL-BIBBJA IL-KOTBA MQADDSA bible

GALATIN 5

¹Kristu ħelisna biex ngħixu ta’ nies ħielsa. Żommu sħiħ, u terġgħux tmiddu għonqkom għall-madmad tal-jasar.

²Araw, jiena, Pawlu, qiegħed ngħidilkom: jekk toqogħdu għaċ-ċirkonċiżjoni, xejn ma jkun jiswielkom Kristu.

³Jiena nistqarr għal darb’oħra quddiem kull min qagħad għaċ-ċirkonċiżjoni, li hu marbut għall-ħarsien tal-Liġi kollha.

⁴Intom li tfittxu l-ġustifikazzjoni fil-Liġi intom maqtugħa minn Kristu; intom twarrabtu mill-grazzja.

⁵Imma aħna t-tama tal-ġustifikazzjoni nistennewha bl-Ispirtu permezz tal-fidi.

⁶Għaliex fi Kristu Ġesù, biċ-ċirkonċiżjoni jew mingħajrha, xejn ma jkun jiswa ħlief biss il-fidi li taħdem permezz tal-imħabba.

⁷Kontu tiġru sewwa. Min fixkilkom li ma toqogħdux għas-sewwa?

⁸Din il-persważjoni mhijiex ġejja minn dak li sejħilkom.

⁹Daqsxejn ta’ ħmira ttalla’ l-għaġna kollha.

¹⁰Jien żgur minnkom fil-Mulej li ma taħsbux mod ieħor; min qiegħed iġarrabkom, hu min hu, għad irid jieħu l-ħaqq tiegħu.

¹¹Ngħid għalija, l-aħwa, jekk jien għadni nippriedka ċ-ċirkonċiżjoni, għaliex jien ippersegwitat? Mela tħassar l-iskandlu tas-salib?

¹²Ħalli jqattgħu ġisimhom dawk li jħawdukom.

¹³Intom imma, l-aħwa, intom ġejtu msejħa għall-ħelsien; imma tinqdewx b’dan il-ħelsien għall-ġisem, iżda aqdu lil xulxin fl-imħabba.

¹⁴Il-Liġi kollha tinġabar f’liġi waħda: ‘Ħobb lil għajrek bħalek innifsek’.

¹⁵Jekk intom tgiddmu u tieklu lil xulxin, oqogħdu attenti li ma tikkunsmawx lil xulxin!

¹⁶Jien ngħidilkom, imxu fl-Ispirtu u taqgħux għall-passjonijiet tal-ġisem.

¹⁷Il-passjonijiet tal-ġisem huma kontra l-Ispirtu, u l-Ispirtu hu kontra l-ġisem; dawn it-tnejn huma kontra xulxin, biex ma jħallukomx tagħmlu dak li tixtiequ.

¹⁸Jekk lilkom imexxikom l-Ispirtu, m’intomx taħt il-liġi.

¹⁹L-għemejjel tal-ġisem huma magħrufa: żina, faħx, nuqqas ta’ rażan,

²⁰idolatrija, seħer, mibegħda, ġlied, għira, korla, ambizzjoni, firda, partiti,

²¹invidja, sokor, tbahrid, u ħwejjeġ bħal dawn. Inwissikom, bħalma wissejtkom qabel, min jagħmel dawn il-ħwejjeġ ma jiritx is-saltna ta’ Alla.

²²Il-frott tal-Ispirtu huma: l-imħabba, l-hena, is-sliem, is-sabar, il-ħniena, it-tjieba, il-fidi,

²³il-ħlewwa, ir-rażan. Kontra dawn ma hemmx liġi.

²⁴Dawk li huma ta’ Kristu Ġesù sallbu l-ġisem bil-ġibdiet u l-passjonijiet tiegħu.

²⁵Jekk ngħixu bl-Ispirtu, ħalli nimxu bl-Ispirtu;

²⁶ma nkunux minn dawk li jfittxu l-ftaħir fieragħ; ma nġarrbux lil xulxin; ma ngħirux għal xulxin.