Read Maltese Bible with DC – IL-BIBBJA IL-KOTBA MQADDSA GALATIN 6 Bible Online

GALATIN 6 - Maltese Bible with DC – IL-BIBBJA IL-KOTBA MQADDSA bible

GALATIN 6

¹L-aħwa, jekk xi ħadd jinqabad f’xi ħtija, intom li intom spiritwali, widdbuh bi spirtu ta’ ħlewwa; oqgħod attent li ma tkunx imġarrab int ukoll.

²Erfgħu t-tagħbija ta’ xulxin, u hekk tkunu qegħdin tħarsu l-liġi ta’ Kristu.

³Jekk xi ħadd jaħseb li hu xi ħaġa meta ma hu xejn, ikun iqarraq bih innifsu.

⁴Kull wieħed jgħarbel għemilu, imbagħad ikun jista’ jiftaħar bih innifsu, u mhux b’ħaddieħor.

⁵Kull wieħed għandu t-tagħbija tiegħu x’jerfa’.

⁶Dak li qiegħed jitgħallem id-duttrina għandu jaqsam ġidu ma’ min jgħallmu.

⁷Titqarrqux; Alla ma jidħak bih ħadd. Dak li bniedem jiżra’, dak huwa jaħsad.

⁸Min jiżra’ f’ġismu jaħsad mill-ġisem it-taħsir; min jiżra’ fl-ispirtu, jaħsad mill-ispirtu l-ħajja ta’ dejjem.

⁹Ma negħjew qatt nagħmlu l-ġid; għax jekk ma naqtgħux qalbna, naħsdu fi żmienu.

¹⁰Mela, dment li għandna ż-żmien ħa nagħmlu l-ġid ma’ kulħadd, l-iktar ma’ qrabatna fil-fidi.

¹¹Araw b’liema ittri kbar ktibtilkom b’idi stess.

¹²Dawk li jridu jingħoġbu fil-ġisem, dawk huma li jridukom tieħdu ċ-ċirkonċiżjoni, u dan jagħmluh biss biex ma jkunux ippersegwitati[20] minħabba s-salib ta’ Kristu.

¹³Lanqas huma, li għandhom iċ-ċirkonċiżjoni, ma jħarsu l-Liġi, iżda jridukom tieħdu ċ-ċirkonċiżjoni biex jiftaħru b’ġisimkom.

¹⁴Ngħid għalija, ma jkun qatt li niftaħar jekk mhux bis-salib ta’ Sidna Ġesù Kristu, li bih id-dinja hi msallba għalija u jien għad-dinja.

¹⁵Għaliex, biċ-ċirkonċiżjoni jew mingħajrha, xejn ma hemm ta’ siwi, ħlief il-ħolqien ġdid.

¹⁶U dawk kollha li jimxu fuq din ir-regola, is-sliem u l-ħniena fuqhom, u wkoll fuq Iżrael ta’ Alla.

¹⁷Millum ’il quddiem ħadd ma għandu jħabbatni iżjed; jien inġib f’ġismi l-marki ta’ Kristu[21].

¹⁸Il-grazzja ta’ Sidna Ġesù Kristu tkun magħkom, l-aħwa. Ammen.