Read Maltese Bible with DC – IL-BIBBJA IL-KOTBA MQADDSA EFESIN 2 Bible Online

EFESIN 2 - Maltese Bible with DC – IL-BIBBJA IL-KOTBA MQADDSA bible

EFESIN 2

¹Intom li kontu mejtin bi dnubietkom u ħtijietkom,

²li fihom darba mxejtu skont ix-xejra ta’ din id-dinja, skont il-kap tas-saltna tal-ajru, tal-ispirtu li bħalissa qiegħed jaħdem fost dawk li ma jisimgħux…

³Aħna wkoll għexna darba mgħarrqa fil-passjonijiet ta’ ġisimna; konna nagħmlu l-opri tar-rieda tal-ġisem u fehmietna; konna minna nfusna wlied il-korla[6], bħall-bqija tal-bnedmin.

⁴Imma Alla, għani fil-ħniena tiegħu, bis-saħħa tal-imħabba kbira li biha ħabbna,

⁵meta aħna konna mejta minħabba fi dnubietna, tana ħajja ġdida flimkien ma’ Kristu - bi grazzja intom salvi.

⁶Qajjimna miegħu u qegħedna fis-smewwiet ma’ Kristu Ġesù,

⁷biex juri fiż-żminijiet li ġejjin l-għana bla qjies tal-grazzja tiegħu bit-tjieba li wera magħna fi Kristu Ġesù.

⁸Intom salvi bil-grazzja, permezz tal-fidi; u dan mhux bis-saħħa tagħkom, imma b’don ta’ Alla;

⁹mhux bl-opri, biex ħadd ma jiftaħar.

¹⁰Aħna ħolqien tiegħu, maħluqa fi Kristu Ġesù biex nagħmlu l-opri tajba li Alla ħejjielna minn qabel li għandna nagħmlu[7].

¹¹Ftakru, mela, li intom bis-sinjal tal-pagani f’ġisimkom u li kontu msejħin “bla ċirkonċiżjoni” minn dawk li kellhom iċ-ċirkonċiżjoni magħmula bl-idejn fil-ġisem,

¹²ftakru li f’dak iż-żmien kontu mingħajr Kristu; kontu barra miċ-ċittadinanza ta’ Iżrael, barranin għall-Patt tal-wegħda; kontu bla tama u bla Alla fid-dinja!

¹³Imma issa, fi Kristu Ġesù, intom, li darba kontu ’l bogħod, issa tqarribtu bis-saħħa tad-demm ta’ Kristu.

¹⁴Kristu hu s-sliem tagħna, hu, li minna t-tnejn għamel poplu wieħed, billi ġarraf il-ħajt li kien jifridna - il-mibegħda ta’ bejnietna - u ħassar bis-sagrifiċċju ta’ ġismu

¹⁵l-Liġi bil-kmandamenti u l-preċetti tagħha. Mit-tnejn, ried b’hekk joħloq bih innifsu bniedem wieħed, il-bniedem il-ġdid, billi jagħmilhom paċi t-tnejn bejniethom

¹⁶u jħabbibhom it-tnejn ma’ Alla f’ġisem wieħed permezz tas-salib li bih qered il-mibegħda ta’ bejniethom.

¹⁷Imbagħad ġie jħabbar is-sliem, sliem lilkom li kontu fil-bogħod, u sliem lil dawk li kienu fil-qrib.

¹⁸Permezz tiegħu, it-tnejn li aħna għandna bi Spirtu wieħed id-dħul għal għand il-Missier.

¹⁹Għalhekk ma għadkomx aktar barranin u frustieri, imma intom ċittadini flimkien mal-qaddisin u nies tad-dar ta’ Alla,

²⁰mibnija lkoll fuq is-sisien tal-appostli u tal-profeti[8], fejn Kristu hu l-ġebla tax-xewka.

²¹Fih il-bini kollu jintrabat sewwa[9], jitla’ f’tempju qaddis fil-Mulej;

²²fih, intom ukoll fl-Ispirtu, tinbnew flimkien f’dar fejn jgħammar Alla.