Read Maltese Bible with DC – IL-BIBBJA IL-KOTBA MQADDSA EFESIN 3 Bible Online

EFESIN 3 - Maltese Bible with DC – IL-BIBBJA IL-KOTBA MQADDSA bible

EFESIN 3

¹Għalhekk jiena, Pawlu, jien, il-priġunier ta’ Kristu Ġesù minħabba fikom il-pagani[10]…

²jekk, kif tassew ġara, intom smajtu bil-pjan tal-grazzja li Alla tani għall-ġid tagħkom,

³jiġifieri, li permezz ta’ rivelazzjoni għarrafni l-misteru[11], bħalma ġa ktibtilkom fil-qosor.

⁴Minn dak li qrajtu tistgħu tifhmu sewwa kemm jiena dħalt fil-qalb tal-misteru ta’ Kristu.

⁵Dan hu l-misteru li fil-ġenerazzjonijiet l-imgħoddija ma kienx mgħarraf lill-bnedmin bħalma issa ġie rrivelat lill-appostli qaddisa tiegħu u lill-profeti fl-Ispirtu,

⁶jiġifieri, li l-pagani huma msejħa biex ikollhom sehem mill-istess wirt, ikunu membri tal-istess ġisem, ikollhom sehem mill-istess wegħda, fi Kristu Ġesù permezz tal-Evanġelju.

⁷Ta’ dan l-Evanġelju jiena sirt ministru skont id-don tal-grazzja li Alla tani, skont is-setgħa tal-qawwa tiegħu.

⁸Lili, l-iżgħar fost il-qaddisin kollha, ngħatatli din il-grazzja li nxandar fost il-pagani l-Evanġelju tal-għana ta’ Kristu, għana li ebda moħħ ma jista’ jifhmu,

⁹u li noħroġ għad-dawl quddiem kulħadd kif Alla temm il-pjan tal-misteru, li kien moħbi sa minn dejjem f’Alla li ħalaq kollox.

¹⁰B’hekk l-għerf ta’ Alla, għerf ta’ kull xorta ta’ mezzi, ikun issa mgħarraf permezz tal-Knisja lill-Prinċpijiet u lis-Setgħat tas-sema[12],

¹¹skont il-pjan li hu kien fassal sa minn dejjem fi Kristu Ġesù Sidna.

¹²Bih aħna għandna l-ħila nersqu permezz tal-fidi tagħna fih.

¹³Għalhekk nitlobkom: tħallux it-tbatijiet li jien għaddej minnhom minħabba fikom jaqtgħulkom qalbkom; dawn huma l-glorja tagħkom!

¹⁴Jiena ninżel għarkupptejja quddiem il-Missier

¹⁵li minnu tieħu isimha kull familja fis-sema u fl-art,

¹⁶biex skont l-għana tal-glorja tiegħu, jagħtikom li bil-qawwa tiegħu permezz tal-Ispirtu tiegħu, tissaħħu fil-bniedem ta’ ġewwa,

¹⁷u li Kristu jgħammar f’qalbkom permezz tal-fidi, biex tniżżlu l-għeruq tagħkom fl-imħabba u fuqha tibnu ħajjitkom.

¹⁸B’hekk tkunu tistgħu tifhmu, flimkien mal-qaddisin kollha, x’inhu l-wisa’ u t-tul, l-għoli u l-fond[13]’ tal-imħabba ta’ Kristu;

¹⁹tagħrfu kemm din l-imħabba ta’ Kristu tisboq kull għerf, biex timtlew bil-milja kollha ta’ Alla.

²⁰Lil dak Alla li, bis-setgħa tiegħu li taħdem fina, għandu l-qawwa li jagħmel kollox bil-wisq iżjed milli aħna nistgħu nitolbu jew naħsbu,

²¹lilu l-glorja fil-Knisja u permezz ta’ Kristu Ġesù, għal kemm itulu ż-żminijiet, għal dejjem ta’ dejjem. Ammen.