Read Maltese Bible with DC – IL-BIBBJA IL-KOTBA MQADDSA EFESIN 4 Bible Online

EFESIN 4 - Maltese Bible with DC – IL-BIBBJA IL-KOTBA MQADDSA bible

EFESIN 4

¹Inħeġġiġkom jien, il-priġunier tal-Mulej, biex timxu sewwa skont is-sejħa li biha kontu msejħin;

²billi bl-umiltà kollha, bil-ħlewwa u bis-sabar, taħmlu u tħobbu ’l xulxin.

³Ħabirku biex iżżommu spirtu wieħed bir-rabta tas-sliem;

⁴ġisem wieħed u ruħ waħda, l-istess kif kontu msejħa għal tama waħda;

⁵Mulej wieħed, fidi waħda, magħmudija waħda;

⁶Alla wieħed u Missier ta’ kulħadd, li hu fuq kulħadd, b’kulħadd u f’kulħadd.

⁷Lil kull wieħed minna Alla tana l-grazzja skont il-qjies tad-don ta’ Kristu.

⁸Hu għalhekk li tgħid l-Iskrittura: “Tala’ fil-għoli, jassar l-ilsiera, ta doni lill-bnedmin.”

⁹“Tela’,”: xi jfisser dan għajr li hu niżel ukoll fl-inħawi l-aktar t’isfel tal-art?

¹⁰Dak li niżel huwa dak li tela’ fuq is-smewwiet kollha, biex jimla kollox.

¹¹U huwa dak li ta lil xi wħud li jkunu appostli, lil xi wħud profeti, lil xi wħud evanġelisti, lil xi wħud rgħajja u mgħallmin:

¹²Hekk jitrawmu l-qaddisin għax-xogħol tal-ħidma tagħhom għall-bini tal-Ġisem ta’ Kristu,

¹³sakemm aħna lkoll naslu biex insiru ħaġa waħda fil-fidi u fl-għarfien tal-Iben ta’ Alla; insiru raġel magħmul, fl-aħjar ta’ żmienu. U hekk isseħħ il-milja ta’ Kristu,

¹⁴u ma nkunux aktar trabi mitfugħin ’l hawn u ’l hemm, u mkaxkra minn kull riħ ta’ tagħlim bil-qerq tal-bnedmin u bl-ingann tagħhom biex iwasslu lil ħaddieħor fl-iżball.

¹⁵Imma waqt li nagħmlu s-sewwa fl-imħabba nikbru f’kollox fih, f’dak li hu r-Ras, Kristu.

¹⁶Fih il-ġisem kollu jsib ir-rabta u l-għaqda tiegħu permezz tal-għekiesi kollha li jservuh skont il-ħidma ta’ kull waħda minnhom, biex jikber fih innifsu u jinbena fl-imħabba.

¹⁷Jiena dan ngħidilkom u nwissikom quddiem il-Mulej: li ma ġġibux iżjed ruħkom skont ma jġibu ruħhom il-pagani bil-bluha ta’ moħħhom.

¹⁸Il-fehma tagħhom hi mdallma, maqtugħa mill-ħajja ta’ Alla minħabba l-injoranza li għandhom u l-ebusija ta’ qalbhom.

¹⁹Huma tilfu kull sentiment u ntelqu għal ħajja bla rażan, għal kull xorta ta’ żina bla xaba’.

²⁰Imma intom mhux hekk tgħallimtu ’l Kristu -

²¹jekk intom smajtuh u tgħallimtuh skont il-verità li hi f’Ġesù -

²²jiġifieri, li għandkom twarrbu l-ħajja tagħkom ta’ qabel u tinżgħu l-bniedem il-qadim, imħassar bix-xewqat tal-pjaċiri qarrieqa,

²³u li għandkom tiġġeddu b’tibdila spiritwali tal-fehma tagħkom

²⁴u tilbsu l-bniedem il-ġdid, maħluq skont Alla, fil-ġustizzja u l-qdusija tassew.

²⁵Warrbu minnkom il-gideb u għidu l-verità wieħed lill-ieħor, għax aħna membri ta’ xulxin.

²⁶Tinkurlaw? Imma tidinbux; tħallux ix-xemx tgħib fuq il-korla tagħkom,

²⁷u tagħtux il-wisa’ lix-Xitan.

²⁸Iqis il-ħalliel li ma jisraqx aktar; imma jaħdem bl-onestà b’idejh biex ikun jista’ jgħin lil min ikun fil-bżonn.

²⁹Ebda kelma mhux xierqa m’għandha toħroġ minn fommkom, imma kliem sewwa li jedifika skont il-ħtieġa, kliem li jagħmel il-ġid lil min jisimgħu.

³⁰U tnikktux l-Ispirtu s-Santu ta’ Alla, li fih intom issiġillati għal jum il-fidwa.

³¹Imrar, saħna, korla, tagħjir, għajjat, dan kollu warrbuh minnkom, u wkoll kull ħażen ieħor.

³²Kunu twajba ma’ xulxin, ħennu għal xulxin, aħfru lil xulxin, bħalma Alla ħafer lilkom[14] fi Kristu.