Read Maltese Bible with DC – IL-BIBBJA IL-KOTBA MQADDSA EFESIN 6 Bible Online

EFESIN 6 - Maltese Bible with DC – IL-BIBBJA IL-KOTBA MQADDSA bible

EFESIN 6

¹Intom it-tfal, isimgħu mill-ġenituri tagħkom fil-Mulej, għax dan hu s-sewwa.

²“Weġġaħ ’il missierek u ’l ommok”: dan hu l-ewwel kmandament b’wegħda

³“sabiex ikollok ir-risq u jtul għomrok fuq l-art.”

⁴U intom il-missirijiet, iġġarrbuhomx iżżejjed lil uliedkom; iżda rabbuhom fid-dixxiplina u t-twiddib tal-Mulej.

⁵Intom l-ilsiera, isimgħu mis-sidien tagħkom ta’ din l-art bil-biża’ u r-rispett, bis-safa ta’ qalbkom bħallikieku lil Kristu;

⁶mhux taqduhom għal wiċċhom, bħal min irid jogħġob lill-bnedmin, iżda bħala lsiera ta’ Kristu, li jagħmlu r-rieda ta’ Alla minn qalbhom,

⁷aqduhom bil-qalb it-tajba, qiskom lill-Mulej u mhux lill-bnedmin.

⁸Għaliex tafu li kull wieħed, skont it-tajjeb li jkun għamel, jitħallas tiegħu mill-Mulej, sew jekk ilsir u sew jekk ħieles.

⁹U intom, is-sidien, agħmlu l-istess magħhom; ħallukom mit-tehdid, għax tafu li s-Sid fis-smewwiet hu tagħhom bħalma hu tagħkom, u hu ma jħares lejn wiċċ ħadd.

¹⁰Mill-bqija, twettqu fil-Mulej u ssaħħu bil-qawwa tiegħu.

¹¹Ilbsu l-armatura ta’ Alla biex tkunu tifilħu tieqfu għat-tnassis tax-Xitan.

¹²Għax il-ġlieda tagħna mhijiex kontra d-demm u l-laħam, imma kontra s-Setgħat, kontra l-Qawwiet, kontra l-Prinċpijiet ta’ din id-dinja ta’ dlamijiet, kontra l-ispirti ħżiena li jgħammru fil-wisa’ tas-smewwiet.

¹³Għalhekk ħudu fuqkom l-armatura ta’ Alla, ħalli tkunu tistgħu tieqfu fi żmien il-ħażen, u, wara li tkunu għamiltu ħilitkom kollha, iżżommu weqfin.

¹⁴Żommu sħiħ, mela, ħażżmu ġenbejkom bil-verità, ilbsu l-kurazza tal-ġustizzja,

¹⁵u xiddu riġlejkom bil-ħeġġa tal-Evanġelju tas-sliem;

¹⁶ħudu f’idejkom it-tarka tal-fidi; li biha tistgħu titfu l-vleġeġ kollha tan-nar tal-Ħażin;

¹⁷ilbsu l-elmu tas-salvazzjoni[18] u aqbdu x-xabla tal-Ispirtu li hi l-kelma ta’ Alla.

¹⁸Itolbu dejjem fl-Ispirtu, b’kull xorta ta’ talb u f’kull ħtieġa, ishru fih bla ma tieqfu, u itolbu għall-ħtiġiet tal-qaddisin kollha.

¹⁹Itolbu għalija wkoll, biex meta niftaħ fommi tingħatali l-kelma, ħalli b’wiċċi minn quddiem inxandar il-misteru tal-Evanġelju,

²⁰li tiegħu jiena l-ambaxxatur fil-ktajjen. Jalla jien u nxandar nkun nista’ nitkellem b’wiċċi minn quddiem kif għandi nagħmel.

²¹Biex intom ukoll tkunu tafu fejn ninsab u x’qiegħed nagħmel, jgħarrafkom b’kollox Tikiku, ħija l-għażiż u l-qaddej fidil fil-Mulej.

²²Lilu bgħattilkom b’dan il-ħsieb, jiġifieri li tkunu tafu b’aħbarna u jfarrġilkom qlubkom.

²³Is-sliem lil ħutna u l-imħabba flimkien mal-fidi minn Alla l-Missier u l-Mulej Ġesù Kristu.

²⁴Il-grazzja magħkom ilkoll li tħobbu lil Sidna Kristu Ġesù b’imħabba li ma tmut qatt.