Read Maltese Bible with DC – IL-BIBBJA IL-KOTBA MQADDSA FILIPPIN 2 Bible Online

FILIPPIN 2 - Maltese Bible with DC – IL-BIBBJA IL-KOTBA MQADDSA bible

FILIPPIN 2

¹Jekk hemm fikom xi faraġ fi Kristu; jekk hemm xi kelma ta’ ħlewwa fl-imħabba; jekk hemm xi xirka fl-Ispirtu; jekk hemm xi ħniena u mogħdrija; kunu fehma waħda

²u imlewni bil-ferħ! Ħa jkollkom l-istess imħabba, u ruħ waħda u ħsieb wieħed.

³Tagħmlu xejn b’pika ta’ partit, anqas għall-ftaħir fieragħ; imma kunu umli u kull wieħed minnkom iqis lill-ieħor aħjar minnu.

⁴Ħadd minnkom ma għandu jfittex li jaqbillu, imma li jaqbel lil ħaddieħor.

⁵Aħsbu bħalma kien jaħseb Kristu Ġesù:

⁶hu li għad li kellu n-natura ta’ Alla, ma qagħadx ifittex tiegħu li hu daqs Alla,

⁷iżda xejjen lilu nnifsu billi ħa n-natura ta’ lsir; sar jixbah lill-bnedmin, u deher minn barra bħala bniedem;

⁸ċekken lilu nnifsu, billi obda sal-mewt, anzi sal-mewt tas-salib.

⁹Għalhekk Alla għollieh sas-smewwiet u żejnu bl-Isem li hu fuq kull isem,

¹⁰biex fl-isem ta’ Ġesù - fis-sema, fl-art u f’qiegħ l-art - il-ħlejjaq kollha jinżlu għarrkupptejhom,

¹¹u kull ilsien jistqarr: “Ġesù Kristu hu Mulej”,[9] għall-glorja ta’ Alla l-Missier”.

¹²Għalhekk, għeżież tiegħi, bħalma dejjem obdejtu, mhux biss meta kont magħkom, imma wisq aktar issa li m’iniex magħkom, ħabirku għas-salvazzjoni tagħkom bil-biża’ u t-tregħid.

¹³Alla hu li jaħdem fikom u jġegħelkom tridu u tħabirku biex tagħmlu dak li jogħġob lilu.

¹⁴Agħmlu kollox mingħajr tgemgim u mingħajr tlaqliq,

¹⁵ħalli tkunu nies bla għajb u safja, ulied Alla bla tebgħa f’nofs bnedmin ta’ ħajja mgħawġa u mħassra; fosthom intom għandkom tiddu fid-dinja bħal kwiekeb.

¹⁶U żżommu sħiħ il-kelma tal-ħajja; hekk fil-jum ta’ Kristu jkolli biex niftaħar li ma nkunx ġrejt u tħabatt għal xejn.

¹⁷U mqar kieku kelli nxerred demmi[10] fuq il-vittmi u s-sagrifiċċju tal-fidi tagħkom, jiena nifraħ fuq li nifraħ magħkom ilkoll.

¹⁸U hekk ukoll intom għandkom tifirħu fuq li tifirħu miegħi.

¹⁹Nittama fil-Mulej Ġesù li nibagħtilkom malajr lil Timotju biex nieħu r-ruħ jiena wkoll b’aħbarkom.

²⁰’Il ħadd ma għandi bħalu li minn qalbu jieħu ħsiebkom sewwa.

²¹Kulħadd ifittex li jaqbel lilu u mhux dak li hu ta’ Ġesù Kristu.

²²Intom tafu bit-tiġrib tiegħu; kif bħal iben ma’ missieru ħadem miegħi għat-tixrid tal-Evanġelju.

²³Nittama li nibagħtu ma ndumx hekk kif insir naf fiex sa nsib ruħi.

²⁴Għandi qalbi qawwija fil-Mulej li ma ndumx ma niġi għandkom.

²⁵Ħassejt li jeħtieġ nibagħtilkom lil Epafroditu[11], ħija, ħaddiem miegħi u sieħbi fit-taqbid; mibgħut minnkom biex jgħinni fil-ħtiġiet tiegħi.

²⁶Għandu ħrara kbira li jarakom u inkwieta ħafna għax intom smajtu li kien marad.

²⁷Tassew li kien marid għall-mewt; iżda Alla ħenn għalih, u mhux biss għalih, imma għalija wkoll u b’hekk ma kellix għali fuq għali.

²⁸Għalhekk fittixt aktar fuq ix-xwiek li nibgħathulkom, ħalli tarawh intom, u tifirħu; u jien neħles mill-għali.

²⁹Ilqgħuh ilkoll ferħana fil-Mulej; għożżuhom nies bħal dawn.

³⁰Ittarraf sal-mewt u kien għoddu miet biex jaħdem għal Kristu, u tarraf ħajtu biex jagħmel tajjeb hu fejn naqset l-għajnuna tagħkom għalija.