Read Maltese Bible with DC – IL-BIBBJA IL-KOTBA MQADDSA ĠOŻWÈ 10 Bible Online

ĠOŻWÈ 10 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 10

¹Ġara li malli Adonisedek, is-sultan ta’ Ġerusalemm, sama’ li Ġożwè kien qabad Għaj, u qeridha, u bħalma għamel lil Ġeriko u s-sultan tagħha, hekk għamel lil Għaj u lis-sultan tagħha; u li n-nies ta’ Gibgħon għamlu paċi mal-Iżraelin u baqgħu jgħammru fosthom,

²qabdu biża’ kbir, għax Gibgħon kienet belt kbira, bħal waħda mill-ibliet tas-slaten, u kienet akbar minn Għaj, u niesha nies qalbiena.

³Għalhekk Adonisedek, sultan ta’ Ġerusalemm, bagħat jgħid lil Ħoħam, is-sultan ta’ Ħebron, lil Piram, is-sultan ta’ Ġarmut, u lil Ġafigħa, is-sultan ta’ Lakis, u lil Debir, is-sultan ta’ Għeglon:

⁴“Itilgħu ħdejja u għinuni ħa naħbtu għal Gibgħon, għax ftiehmu u għamlu paċi ma’ Ġożwè u ma’ wlied Iżrael.”

⁵U ftiehmu u telgħu l-ħames slaten tal-Amurrin - is-sultan ta’ Ġerusalemm, is-sultan ta’ Ħebron, is-sultan ta’ Ġarmut, is-sultan ta’ Lakis, is-sultan ta’ Għeglon, huma u l-eżerċti kollha tagħhom, u waqqfu l-kamp madwar Gibgħon u ħabtu għaliha.

⁶In-nies ta’ Gibgħon bagħtu jgħidu lil Ġożwè fil-kamp f’Gilgal: “La twarrabx idek minn fuq il-qaddejja tiegħek: itla’ għandna malajr, eħlisna u għinna għax is-slaten kollha tal-Amurrin, li jgħammru fl-għoljiet, ngħaqdu kontrina lkoll.”

⁷U Ġożwè tala’ minn Gilgal bin-nies kollha tal-ġlied miegħu, u l-irġiel qalbiena kollha.

⁸U l-Mulej qal lil Ġożwè: “La tibżax minnhom għax nerħihom f’idejk; ebda bniedem minnhom ma jiqaflek.”

⁹U Ġożwè mar għalihom minnufih; dam il-lejl kollu tiela’ minn Gilgal.

¹⁰U l-Mulej ħawwadhom quddiem Iżrael, u dawn tawhom xebgħa kbira f’Gibgħon u għamlu għal warajhom tul it-triq li titla’ għal Betħoron u baqgħu jagħtuhom sa Għażeka u Makkeda.

¹¹Ġara li huma u jaħirbu minn quddiem Iżrael, kif kienu fin-niżla ta’ Betħoron, il-Mulej waddab fuqhom ġebel kbir mis-smewwiet sa Għażeka. Mietu aktar bil-ġebel tas-silġ milli wlied Iżrael qatlu bix-xabla.

¹²Imbagħad Ġożwè kellem lill-Mulej, dak in-nhar li l-Mulej telaq l-Amurrin quddiem ulied Iżrael, u qal quddiem Iżrael: “Ieqaf, xemx, fuq Gibgħon; Ieqaf, qamar, fuq wied Ajjalon.”

¹³U waqfet ix-xemx, u waqaf il-qamar, sakemm tħallas il-poplu mill-għedewwa tiegħu. Mhux hekk hemm miktub fi Ktieb il-Ġust[14]? U x-xemx waqfet[15] f’nofs is-smewwiet, u ma għaġġlitx tinżel għal jum sħiħ.

¹⁴U qatt ma kien hemm jum bħalu, la qabel u lanqas wara, li fih il-Mulej sama’ mill-kelma ta’ bniedem; għax il-Mulej kien jitqabad għal Iżrael.

¹⁵Imbagħad Ġożwè u l-Iżraelin kollha reġgħu lura lejn il-kamp f’Gilgal.

¹⁶Dawk il-ħames slaten ħarbu u nħbew f’għar f’Makkeda.

¹⁷U għarrfu lil Ġożwè u qalulu: “Sibna lill-ħames slaten moħbija f’għar f’Makkeda.”

¹⁸U Ġożwè qalilhom: “Gerbu ġebel kbir f’daħlet l-għar u qiegħdu xi rġiel għassa tagħhom.

¹⁹Imma intom tiqfux, iżda ibqgħu sejrin wara l-għedewwa tagħkom, ħuduhom minn wara, u tħalluhomx jidħlu fi bliethom, għax il-Mulej, Alla tagħkom, telaqhom f’idejkom.”

²⁰U ġara li meta Ġożwè u wlied Iżrael temmew ix-xebgħa kbira li tawhom sa ma qerduhom għalkollox, barra minn xi ftit li ħarbu u sabu l-kenn fi bliet magħluqa bis-swar,

²¹il-poplu kollu raġa’ lura fil-kamp għand Ġożwè f’Makkeda, qawwi u sħiħ. Ħadd ma ssogra jlissen kelma kontra wlied Iżrael.

²²U Ġożwè ordna: “Iftħu bieb il-għar, u oħorġuli dawk il-ħames slaten mill-għar.”

²³U hekk għamlu, u ġabulu dawk il-ħames slaten mill-għar: is-sultan ta’ Ġerusalemm, is-sultan ta’ Ħebron, is-sultan ta’ Ġarmut, is-sultan ta’ Lakis u s-sultan ta’ Għeglon.

²⁴Meta ġiebu lil dawk is-slaten quddiem Ġożwè, sejjaħ Ġożwè lill-Iżraelin kollha, u qal lill-kapijiet tan-nies tal-gwerra li kienu marru miegħu: “Ersqu ’l hawn, u qiegħdu riġlejkom fuq għonq dawn is-slaten.” U resqu u qiegħdu riġlejhom fuq għonqhom.

²⁵U Ġożwè qalilhom: “La tibżgħux u la taqtgħux qalbkom. Agħmlu l-ħila u qawwu qalbkom, għax hekk jagħmel il-Mulej lill-għedewwa kollha tagħkom, li magħhom intom għandkom titqabdu.”

²⁶Imbagħad Ġożwè darabhom, u qatilhom, u dendilhom ma’ ħames siġriet, u baqgħu mdendla mas-siġar sa filgħaxija.

²⁷Ma’ nżul ix-xemx Ġożwè ordna li jniżżluhom mis-siġar, u xeħtuhom fl-għar fejn kienu nħbew u għalqu d-daħla b’ġebel kbir, u għadhom hemm sal-lum.

²⁸Dak in-nhar stess Ġożwè rebaħ il-belt ta’ Makkeda u għaddieha minn xifer ix-xabla, lilha u lis-sultan tagħha, u qeridha b’kull min kien hemm fiha bla ma ħadd ħelisha; u lis-sultan ta’ Makkeda għamillu bħalma kien għamel lis-sultan ta’ Ġeriko.

²⁹Imbagħad Ġożwè u l-Iżraelin kollha miegħu għaddew minn Makkeda għal Libna u ħabtu għaliha.

³⁰U l-Mulej erħieha wkoll f’id Iżrael bis-sultan tagħha; u darab b’xifer ix-xabla lilha u lil kull min kien hemm fiha bla ma ħalla ’l ħadd minnhom ħaj. U lis-sultan tagħha għamillu bħalma kien għamel lis-sultan ta’ Ġeriko.

³¹U għadda Ġożwè u l-Iżraelin kollha miegħu minn Libna għal Lakis, waqqaf il-kamp madwarha, u ħabat għaliha.

³²U l-Mulej reħa lil Lakis f’idejn Iżrael, u dan rebaħha fit-tieni jum u għadda minn xifer ix-xabla lilha u ’l kull min kien fiha; għamlilha kollox bħalma kien għamel lil Libna.

³³Frattant Ħoram, sultan ta’ Geżer, tala’ jgħin lil Lakis, u Ġożwè ħabat għalih u n-nies tiegħu sakemm ma ħalla ’l ħadd minnhom ħaj.

³⁴Imbagħad Ġożwè u n-nies tiegħu għaddew minn Lakis għal Għeglon; u waqqfu l-kamp madwarha u ħabtu għaliha.

³⁵Qabduha dak in-nhar stess, u għaddewha minn xifer ix-xabla, u qerdu ’l kull min kien hemm fiha dak in-nhar, kollox bħal ma kienu għamlu lil Lakis.

³⁶U tala’ Ġożwè b’Iżrael kollu miegħu minn Għeglon għal Ħebron u ħabtu għaliha.

³⁷Qabduha u għaddewha minn xifer ix-xabla, lilha u lis-sultan tagħha, u l-ibliet kollha u n-nies kollha li kien hemm fiha u ma ħalla lil ħadd jeħles; kollox bħalma kien għamel lil Għeglon, qered lilha u ’l kull min kien hemm fiha.

³⁸Imbagħad Ġożwè u Iżrael kollu miegħu dar għal Debir, u ħabat għaliha.

³⁹U rebaħha, lilha u s-sultan tagħha, u l-ibliet kollha tagħha għaddiehom minn xifer ix-xabla, u qered lil kull min kien hemm fiha, u ma ħalla ’l ħadd li kien hemm fiha jeħles ħaj; bħalma għamel lil Ħebron[16], hekk għamel lil Debir u s-sultan tagħha.

⁴⁰Ġożwè rebaħ l-art kollha - il-muntanji, in-Negeb, is-Sefela, bix-xaqliba tagħhom - u s-slaten kollha tagħhom. Ma ħalla ’l ħadd jeħles, u qered kulma kien jieħu n-nifs, bħalma kien ordna l-Mulej, Alla ta’ Iżrael.

⁴¹Ġożwè rebaħhom minn Kades-barnigħa sa Gaża, u l-art kollha ta’ Gosen sa Gibgħon.

⁴²Rebaħ Ġożwè lil dawn is-slaten kollha, u artijiethom f’salt wieħed, għax il-Mulej, Alla ta’ Iżrael, tqabad għal Iżrael.

⁴³U Ġożwè b’Iżrael kollu miegħu raġa’ lura fil-kamp f’Gilgal.