Read Maltese Bible with DC – IL-BIBBJA IL-KOTBA MQADDSA ĠOŻWÈ 11 Bible Online

ĠOŻWÈ 11 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 11

¹Malli Ġabin, is-sultan ta’ Ħasor, sama’ b’dan kollu, bagħat messaġġiera għand Ġobab, sultan ta’ Madon,

²u għand is-sultan ta’ Simron u s-sultan ta’ Aksaf, u għand is-slaten li kienu jgħammru fit-Tramuntana fil-muntanji, fl-Għaraba ’l isfel minn Kinneret u fis-Sefela u Nafat-dor fuq il-Punent;

³u għand il-Kangħanin tal-Lvant u tal-Punent, l-Amurrin, il-Ħittin, il-Periżżin, il-Ġebusin ta’ fuq il-muntanji, u l-Ħiwwin ta’ taħt il-Ħermon f’art Mispa.

⁴Dawn kollha ħarġu flimkien bil-qtajja’ kollha tagħhom, poplu kotran bħar-ramel f’xatt il-baħar, u żwiemel u mriekeb bla għadd.

⁵U ftiehmu u ltaqgħu dawn is-slaten kollha, u ġew u waqqfu l-kamp ħdejn l-ilma ta’ Merom biex jitqabdu ma’ Iżrael.

⁶U l-Mulej qal lil Ġożwè: “La tibżax minnhom, għax sa għada bħal dan il-ħin jien nerħihom mejta lkoll f’idejn Iżrael, iż-żwiemel tagħhom taqtgħalhom l-għeruq ta’ riġlejhom u l-imriekeb tagħhom tagħtihom in-nar.”

⁷U Ġożwè u n-nies kollha tal-ġlied tiegħu marru għalihom ħdejn l-ilma ta’ Merom, u nxteħtu għal fuqhom għal għarrieda.

⁸U l-Mulej telaqhom f’idejn Iżrael, u tawhom xebgħa, u għamlu għal warajhom sa Sidon il-Kbira u sa Mixrefotmajm u l-wied ta’ Mispa fil-Lvant. U baqgħu jagħtuhom sakemm ma ħallew lil ħadd jeħles.

⁹U Ġożwè għamlilhom bħalma kien ordnalu l-Mulej: iż-żwiemel tagħhom qatgħalhom l-għeruq ta’ riġlejhom u l-imriekeb tahom in-nar.

¹⁰Imbagħad Ġożwè dar lura għal Ħasor, u rebaħ il-belt ta’ Ħasor u s-sultan tagħha, u darabhom bix-xabla, għax Ħasor qabel kienet il-belt ewlenija fuq dawn is-saltniet kollha.

¹¹U qatlu b’xifer ix-xabla n-nies kollha li kien hemm fiha u qerduhom; u xejn ma ħalla jgħix, u ’l Ħasor taha n-nar.

¹²U l-ibliet kollha ta’ dawk is-slaten u s-slaten kollha tagħhom qabadhom Ġożwè, u għaddiehom minn xifer ix-xabla, u qeridhom bħalma kien ordna Mosè, il-qaddej tal-Mulej.

¹³Biss l-ibliet kollha li kienu fuq l-għoljiet tagħhom Iżrael ma ħaraqhomx; Ġożwè ħaraq biss lil Ħasor weħidha.

¹⁴Ulied Iżrael żammu għalihom il-priża kollha, u l-bhejjem ta’ dawn l-ibliet; iżda n-nies qatluhom kollha b’xifer ix-xabla sakemm qerduhom: u xejn ma ħallew jgħix.

¹⁵Kif kien ordna l-Mulej lil Mosè, il-qaddej tiegħu, hekk ordna Mosè lil Ġożwè u hekk għamel Ġożwè; ma ħalla xejn minn dak li kien ordna l-Mulej lil Mosè.

¹⁶U Ġożwè ħa f’idejh din l-art kollha; il-muntanji u n-Negeb kollu, l-art kollha ta’ Gosen, is-Sefela u l-Għaraba, il-muntanja ta’ Iżrael u l-witat tiegħu,

¹⁷mill-muntanja ta’ Ħalak li tieħu lejn Xegħir sa Bagħal-gad, u sal-wied tal-Libanu taħt il-muntanja tal-Ħermon. Qabad is-slaten kollha tagħhom, darabhom u qatilhom.

¹⁸Għal żmien twil dam Ġożwè jitqabad ma’ dawn is-slaten.

¹⁹Ebda waħda minn dawk l-ibliet ma ftiehmet ma’ Iżrael; barra mill-Ħiwwin, li jgħammru f’Gibgħon, kollha ħaduhom bil-ġlied.

²⁰Kienet ġejja mill-Mulej li jwebbsu qalbhom u jagħmlu gwerra lil Iżrael, sabiex jinqerdu u ma jkunx hemm ħniena għalihom; u b’hekk jinqerdu bħalma kien ordna l-Mulej lil Mosè.

²¹Dak iż-żmien Ġożwè mar u qered l-Għanakin mill-muntanji, minn Ħebron, minn Debir, minn Għanab, mill-muntanji kollha ta’ Ġuda u mill-muntanji kollha ta’ Iżrael, għamel qerda minnhom u minn bliethom.

²²L-Għanakin ma baqgħux iżjed fl-art ta’ wlied Iżrael, imma baqgħu biss f’Gaża, f’Gatt u f’Asdod.

²³Ġożwè ħa f’idejh l-art kollha skont ma kien qal il-Mulej lil Mosè; u qassamha b’wirt lill-Iżraelin, skont it-taqsima u t-tribujiet tagħhom. U strieħet l-art mill-gwerra[17].