Read Maltese Bible with DC – IL-BIBBJA IL-KOTBA MQADDSA ĠOŻWÈ 12 Bible Online

ĠOŻWÈ 12 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 12

¹Dawn huma s-slaten tal-art[18] li rebħuhom ulied Iżrael u wirtu arthom in-naħa l-oħra tal-Ġordan, lejn tlugħ ix-xemx, mix-xmara Arnon sal-muntanja tal-Ħermon,

²u l-Għaraba kollha n-naħa tal-Lvant: Siħon, sultan tal-Amurrin, li kien jgħammar f’Ħesbon, kien jaħkem minn Għarogħer, li taħbat f’tarf il-wied tal-Arnon, u l-belt li hemm f’nofs il-wied u fuq nofs Gilgħad sa wied Ġabbok, truf l-art ta’ wlied Għammon,

³u l-Għaraba sal-baħar ta’ Kinneret lejn il-Lvant, sal-Baħar tal-Għaraba, il-Baħar il-Mielaħ, lejn il-Lvant fit-triq ta’ Betġesimot, lejn in-Nofsinhar taħt ix-xaqliba ta’ Pisga.

⁴U t-territorju ta’ Għog, is-sultan ta’ Basan, li kien fadal mir-Refajin, li kien joqgħod f’Għastarot u f’Edrej,

⁵u kien jaħkem fuq il-muntanja tal-Ħermon, u fuq Salka, u fuq Basan kollu sal-fruntiera tal-Gesurin u tal-Magħkatin, u fuq nofs Gilgħad f’tarf l-art ta’ Siħon sultan ta’ Ħebson.

⁶Lil dawn qatluhom Mosè, il-qaddej tal-Mulej, u wlied Iżrael; u Mosè, il-qaddej tal-Mulej, ta ’l arthom b’wirt lir-Rubenin, lill-Gadin u lil nofs it-tribù ta’ Manassi.

⁷Din hi l-lista tas-slaten tal-art li rebaħ Ġożwè u wlied Iżrael in-naħa l-oħra tal-Ġordan fuq il-Punent, minn Bagħal-gad fil-wied tal-Libanu sal-muntanja Ħalak li tieħu għal Xegħir. U ta din l-art Ġożwè lit-tribujiet ta’ Iżrael skont it-taqsim tagħhom

⁸fil-muntanji, fis-Sefela, fl-Għaraba, fix-xaqlibiet tagħhom, u fid-deżert u fin-Negeb, l-artijiet tal-Ħittin, tal-Amurrin, tal-Kangħanin, tal-Periżżin, tal-Ħiwwin u tal-Ġebusin.

⁹Is-slaten kienu dawn: is-sultan ta’ Ġeriko, is-sultan ta’ Għaj ħdejn Betel;

¹⁰is-sultan ta’ Ġerusalemm, is-sultan ta’ Ħebron,

¹¹is-sultan ta’ Ġarmut, is-sultan ta’ Lakis,

¹²is-sultan ta’ Għeglon, is-sultan ta’ Geżer,

¹³is-sultan ta’ Debir, is-sultan ta’ Geder,

¹⁴is-sultan ta’ Ħorma, is-sultan ta’ Għarad,

¹⁵is-sultan ta’ Libna, is-sultan ta’ Għadullam,

¹⁶is-sultan ta’ Makkeda, is-sultan ta’ Betel,

¹⁷is-sultan ta’ Taffuħa, is-sultan ta’ Ħafer,

¹⁸is-sultan ta’ Afek, is-sultan ta’ Lassaron,

¹⁹is-sultan ta’ Madon, is-sultan ta’ Ħasor,

²⁰is-sultan ta’ Simron-merun, is-sultan ta’ Aksaf,

²¹is-sultan ta’ Tagħnak, is-sultan Megiddu,

²²u s-sultan ta’ Kedes, is-sultan ta’ Ġoknegħam fil-Karmel,

²³is-sultan ta’ Dor f’Nafat-dor, is-sultan ta’ Gojim f’Gilgal,

²⁴is-sultan ta’ Tirsa - wieħed u tletin sultan b’kollox.