Read Maltese Bible with DC – IL-BIBBJA IL-KOTBA MQADDSA ĠOŻWÈ 13 Bible Online

ĠOŻWÈ 13 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 13

¹Meta Ġożwè kien xjieħ u daħal fiż-żmien, il-Mulej qallu: “Inti xjeħt u dħalt fiż-żmien, u għad fadal biċċa kbira mill-art x’tittieħed.

²Din hi l-art li għad baqa’: l-inħawi kollha tal-Filistin u l-Gesurin kollha,

³minn Siħor fuq il-Lvant tal-Eġittu sat-trufijiet ta’ Għekron fit-Tramuntana; l-art tal-Kangħanin f’idejn il-ħames prinċpijiet tal-Filistin ta’ Gaża, Asdod, Askelon, Gatt u Għekron; l-inħawi tal-Għawwin

⁴fin-Nofsinhar, l-art kollha tal-Kangħanin mill-Għerien ta’ Sidon sa Afeka sal-fruntiera tal-Amurrin;

⁵l-art tal-Giblin u l-Libanu kollu, lejn tlugħ ix-xemx minn Bagħal-gad taħt il-muntanja tal-Ħermon sad-daħla ta’ Ħamat.

⁶Dawk kollha li jgħammru fil-muntanji tal-Libanu sa Mixrefotmajm, is-Sidonin kollha, jien inkeċċihom minn quddiem ulied Iżrael; iżda qassamha lil Iżrael b’wirt bħalma ordnajtlek.

⁷Mela issa qassam l-art b’wirt lid-disa’ tribujiet, u nofs it-tribù ta’ Manassi.

⁸Miegħu kienu ħadu sehemhom ir-Rubenin u l-Gadin, li kien tahom Mosè, qaddej tal-Mulej, in-naħa l-oħra tal-Ġordan, in-naħa tal-Lvant bħalma kien tahom Mosè il-qaddej tal-Mulej:

⁹minn Għarogħer li qiegħda max-xatt tax-xmara Arnon u l-belt li qiegħda f’nofs il-wied u l-wita kollha ta’ Medeba sa Dibon;

¹⁰u l-ibliet kollha ta’ Siħon, sultan tal-Amurrin, li kien isaltan f’Ħesbon sat-trufijiet ta’ wlied Għammon.

¹¹U Gilgħad, u l-inħawi tal-Gesurin u l-Magħkatin u l-muntanji kollha tal-Ħermon u Basan kollu sa Salka;

¹²is-saltna kollha ta’ Għog f’Basan, li kien isaltan f’Astarot u f’Edregħi, il-fdal tar-Refajin, u rebaħhom Mosè u keċċiehom.

¹³Imma wlied Iżrael ma rnexxilhomx ikeċċu l-Gesurin u l-Magħkatin, u baqgħu jgħammru f’Gesur u f’Magħkat f’nofs Iżrael sal-lum.

¹⁴Iżda lit-tribù ta’ Levi ma tahomx sehem; sehmu hu mis-sagrifiċċji tal-Mulej Alla, Alla ta’ Iżrael, bħalma kien qallu.

¹⁵Mosè ta sehem lil ulied Ruben skont il-familji tagħhom.

¹⁶U l-limiti tagħhom kienu minn Għarogħer li tinsab fuq f’tarf il-wied tal-Arnon u l-belt f’nofs il-wied u l-wita kollha sa Medeba,

¹⁷Ħesbon u l-bliet kollha tagħha fil-wita ta’ Dibon, Bamot-bagħal, Bet-bagħal-megħon,

¹⁸Ġaħsa, Kedemot, Mefagħat,

¹⁹Kirjatajm, Sibma, Żaret-saħar, fl-għolja tal-wied.

²⁰U Bet-pegħor għal taħt ix-xaqliba ta’ Pisga u Betġesimot.

²¹U l-ibliet kollha tal-wita u s-saltna kollha ta’ Siħon, is-sultan tal-Amurrin li kien isaltan f’Ħesbon li għelbu Mosè, lilu u l-prinċpijiet ta’ Midjan, Ewi u Rekem u Sur u Ħur u Reba, prinċpijiet ta’ Siħon, li kienu jgħammru f’din l-art.

²²U ’l Balgħam bin Begħor, is-saħħar, ulied Iżrael qatluh bix-xabla mal-bqija li qatlu.

²³L-art tar-Rubenin kienet twassal sal-Ġordan; dan hu sehem ir-Rubenin bil-familji tagħhom, l-ibliet bl-irħula tagħhom.

²⁴Mosè ta wkoll sehem lit-tribù ta’ wlied Gad bil-familji tagħhom.

²⁵Din kienet l-art li messithom: Ġagħżer u l-ibliet kollha ta’ Gilgħad u nofs l-art ta’ wlied Għammon sa Għarogħer fil-Lvant ta’ Rabba,

²⁶u minn Ħesbon sa Ramat-misfe u Betunim u minn Maħanajm sal-limiti ta’ Lodebar;

²⁷kien fiha l-wied ta’ Bet-ħaram u Bet-nimra u Sukkot u Safon, u l-bqija tas-saltna ta’ Siħon, is-sultan ta’ Ħesbon; il-Ġordan kien il-limiti sa tarf il-baħar ta’ Kinneret fil-Lvant tal-Ġordan.

²⁸Dan kien sehem ulied Gad bil-familji tagħhom, l-ibliet u l-irħula tagħhom.

²⁹Mosè ta sehem ukoll lil ulied nofs it-tribù ta’ Manassi skont il-familji tagħhom.

³⁰U l-medda tal-art tagħhom kienet minn Maħanajm, il-Basan kollu, is-saltna kollha ta’ Għog, sultan ta’ Basan, u l-irħula kollha ta’ Ġajir f’Basan, sittin belt.

³¹Nofs Gilgħad u Għastarot u Edregħi, l-ibliet ewlenin ta’ Għog f’Basan, ingħataw lil ulied Makir bin Manassi, jiġifieri lil nofs ulied Makir skont il-familji tagħhom.

³²Dawn huma l-ishma li qassam Mosè fil-wita ta’ Mowab, in-naħa l-oħra tal-Ġordan fil-Lvant biswit Ġeriko.

³³Lit-tribù ta’ Levi ma tah ebda sehem; il-Mulej, Alla ta’ Iżrael, hu sehemhom, bħalma kien qalilhom.