Read Maltese Bible with DC – IL-BIBBJA IL-KOTBA MQADDSA ĠOŻWÈ 14 Bible Online

ĠOŻWÈ 14 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 14

¹Dan hu li ħadu wlied Iżrael f’art Kangħan, u li qassmulhom Elgħażar il-qassis, u Ġożwè bin Nun, u l-kapijiet tad-djar tat-tribujiet lil ulied Iżrael.

²Qassmuhielhom bix-xorti bħalma kien ordna l-Mulej permezz ta’ Mosè lid-disa’ tribujiet u nofs,

³għax Mosè kien ġa ta sehem liż-żewġ tribujiet u nofs in-naħa l-oħra tal-Ġordan; u l-Leviti ma tahomx sehem f’nofshom.

⁴Iż-żewġ ulied ta’ Ġużeppi, Manassi u Efrajm, kienu jagħmlu żewġ tribujiet. U ma tawx sehem lil-Leviti fl-art ħlief bliet fejn jgħammru u mergħat madwarhom għall-imrieħel u l-ġid li jkollhom.

⁵Ulied Iżrael għamlu bħalma kien ordna l-Mulej lil Mosè, u qassmu l-art.

⁶Ulied Ġuda resqu lejn Ġożwè f’Gilgal, u Kaleb bin Ġefunni il-Kenażi qallu: “Int taf x’kien qal il-Mulej lil Mosè, il-bniedem ta’ Alla, għalija u għalik f’Kades-barnigħa.

⁷Jien kelli erbgħin sena meta Mosè, il-qaddej tal-Mulej, bagħatni minn Kades-barnigħa biex nitkixxef l-art, u jien wassaltlu l-aħbar li kelli f’qalbi.

⁸Ħuti li telgħu miegħi qatgħu qalb il-poplu, imma jien bqajt fidil lejn il-Mulej, Alla tiegħi.

⁹U Mosè dak in-nhar ħalef u qalli: ‘L-art li rifes riġlek fuqha tkun wirtek, u sehem uliedek għal dejjem, għax int bqajt fidil lejn il-Mulej, Alla tiegħi.’

¹⁰U issa, ara, il-Mulej żammni ħaj, bħalma kien qal, għal dawn il-ħamsa u erbgħin sena, minn mindu l-Mulej qal dan il-kliem lil Mosè, meta Iżrael kien jiġġerra fid-deżert. Illum jien għandi ħamsa u tmenin sena.

¹¹Għadni llum qawwi bħal meta bagħatni Mosè. Bħalma kienet saħħti dakinhar, hekk għadha llum, sew biex noħroġ għall-ġlied sew biex nerġa’ lura.

¹²Mela agħtini issa din il-muntanja li minnha tkellem il-Mulej dakinhar; inti stess smajt dakinhar u taf li hemm jgħammru l-Għanakin fi bliet kbar u mdawra bis-swar. Għandu mnejn il-Mulej ikun miegħi u nkeċċihom bħalma wegħedni l-Mulej.”

¹³U Ġożwè bierku u ta Ħebron lil Kaleb bin Ġefunni biex tkun sehmu.

¹⁴Għalhekk Ħebron saret sehem Kaleb bin Ġefunni il-Kenażi sal-lum, għaliex baqa’ fidil lejn il-Mulej, Alla ta’ Iżrael.

¹⁵Ħebron qabel kien jisimha Kirjat-arba. Dan Arba kien il-kbir fost l-Għanakin. U l-art strieħet mill-gwerra.