Read Maltese Bible with DC – IL-BIBBJA IL-KOTBA MQADDSA ĠOŻWÈ 16 Bible Online

ĠOŻWÈ 16 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 16

¹Din hi x-xorti li messet lil Ġużeppi; il-limiti tiegħu jibdew mill-Ġordan, ħdejn Ġeriko, in-naħa tal-Lvant tal-ilma ta’ Ġeriko, jitilgħu minn Ġeriko għal fuq l-għoljiet fid-deżert lejn Betel,

²imbagħad jitilqu minn Betel lejn Luż, jgħaddu għat-truf tal-art tal-Arkin lejn Għatarot;

³minn hawn jinżlu lejn il-Punent lejn l-art tal-Ġafletin, sa truf Betħoron t’isfel sa Geżer u jaslu sal-baħar.

⁴Dan kien il-wirt li ħadu wlied Ġużeppi, Manassi u Efrajm.

⁵U l-limiti tal-art ta’ wlied Efrajm skont il-familji tagħhom kienu dawn: il-limiti ta’ sehemhom in-naħa tal-Lvant kienu minn Għatarot-addar sa Betħoron ta’ fuq,

⁶imbagħad joħorġu lejn il-baħar, b’Mikmetat fit-Tramuntana, u jibqgħu sejrin lejn il-Lvant lejn Tanat-silo, u jgħaddu madwarha lejn il-Lvant lejn Ġanuħa;

⁷jinżlu minn Ġanuħa lejn Għatarot u Nagħra, u jilħqu lil Ġeriko u jaslu sal-Ġordan.

⁸U minn Taffuħa jieħdu lejn il-Punent sa Wied Kana, u jispiċċaw f’xifer il-baħar. Dan hu sehem ulied Efrajm skont il-familji tagħhom.

⁹Kien hemm ukoll bliet magħżula għal ulied Efrajm f’nofs l-art ta’ wlied Manassi: l-ibliet kollha bl-irħula tagħhom.

¹⁰Ma rnexxilhomx ikeċċu l-Kangħanin li kienu jgħammru f’Geżer. Il-Kangħanin baqgħu jgħammru f’nofs Efrajm sal-lum, u jaħdmu bilfors għalihom.