Read Maltese Bible with DC – IL-BIBBJA IL-KOTBA MQADDSA ĠOŻWÈ 17 Bible Online

ĠOŻWÈ 17 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 17

¹Din hi x-xorti li messet lit-tribù ta’ Manassi, għax hu kien il-kbir ta’ Ġużeppi. Makir, il-kbir ta’ Manassi, missier Gilgħad, billi kien raġel gwerrier messu Gilgħad u Basan,

²u l-ulied l-oħra, ukoll ta’ Manassi, messhom skont il-familji tagħhom: ulied Abigħeżer, ulied Ħelek, ulied Asrijel, ulied Sikem, ulied Ħefer, ulied Semida. Dawn kienu l-ulied subien ta’ Manassi bin Ġużeppi skont il-familji tagħhom.

³Imma Selofħad bin Ħefer, bin Gilgħad, bin Makir, bin Manassi, ma kellux subien, imma bniet biss; u dawn il-bniet tiegħu kien jisimhom Maħla, Nogħa, Ħegla, Milka u Tirsa.

⁴Dawn ġew quddiem Elgħażar il-qassis, u quddiem Ġożwè, u quddiem il-kbarat, u qalulhom: “Il-Mulej ordna lil Mosè li jagħtina sehem f’nofs ħutna.” U tahom sehem f’nofs ħut missierhom skont ma kien ordna l-Mulej.

⁵U Manassi messu wkoll għaxar ishma barra mill-art ta’ Gilgħad u Basan, in-naħa l-oħra tal-Ġordan.

⁶Għax il-bniet ta’ Manassi messhom sehem f’nofs uliedu subien; art Gilgħad messet lill-ulied l-oħra ta’ Manassi.

⁷Il-limiti tal-art ta’ Manassi kienu jieħdu minn Aser sa Mikmetat fuq il-Lvant ta’ Sikem, imbagħad lejn il-lemin kienu jibqgħu sejrin lejn dawk li jgħammru Għajn-taffuħa.

⁸L-art ta’ Taffuħa kienet ta’ Manassi, imma Taffuħa stess, li kienet f’tarf l-art ta’ Manassi, kienet ta’ wlied Efrajm.

⁹Imbagħad il-limiti kienu jinżlu lejn wied Kana, ’l isfel mill-wied. Dawn l-ibliet kienu ta’ Efrajm f’nofs l-ibliet ta’ Manassi. Imbagħad il-limiti ta’ Manassi kienu jgħaddu mit-Tramuntana tal-wied u jispiċċaw f’xifer il-baħar.

¹⁰In-naħa t’isfel kienet ta’ Efrajm, u n-naħa ta’ fuq kienet ta’ Manassi, bil-baħar il-limitu tagħhom it-tnejn; min-naħa tat-Tramuntana kienu jilħqu sa Aser u mil-Lvant sa Issakar.

¹¹F’Issakar u f’Aser Manassi kellu dawn l-ibliet: Betsan u l-inħawi tagħha, Iblegħam u l-inħawi tagħha, in-nies li jgħammru f’Dor, l-inħawi tagħha, u n-nies li jgħammru f’Għajn-dor u l-inħawi tagħha; in-nies li jgħammru f’Tagħnak u l-inħawi tagħha, in-nies li jgħammru f’Megiddu u l-inħawi tagħha, tliet distretti.

¹²Ulied Manassi ma setgħux jirbħu dawn l-ibliet u l-Kangħanin riedu bilfors jibqgħu jgħammru f’din l-art.

¹³Meta mbagħad l-Iżraelin issaħħu ġagħluhom jaħdmulhom bil-forza; imma ma keċċewhomx.

¹⁴Ulied Ġużeppi kellmu lil Ġożwè, u qalulu: “Għaliex messitna x-xorti għal sehem wieħed biss u tajtna qasam wieħed? Jiena poplu kotran, għax s’issa berikni l-Mulej.”

¹⁵U Ġożwè wieġeb: “Jekk inti poplu kotran, itla’ lejn il-foresta u agħmel il-wisa’ għalik fl-art tal-Periżżin u r-Refajin jekk jidher li l-muntanji ta’ Efrajm huma dojoq għalik.”

¹⁶U wlied Ġużeppi qalulu: “Mhux biżżejjed għalina l-muntanji; il-Kangħanin li jgħammru fil-wita lkoll għandhom karrijiet tal-ħadid, dawk li jgħammru sew f’Betsan bl-irħula tagħha u sew fil-wied ta’ Ġeżragħel.”

¹⁷Ġożwè wieġeb lil dar Ġużeppi, lil Efrajm u lil Manassi: “Int poplu kotran u għandek saħħa kbira, m’għandhiex tmissek xorti waħda;

¹⁸il-muntanji jkunu tiegħek; hemm il-foresta, qaċċatha u l-wisa’ jkun għalik, għax inti tkeċċi l-Kangħanin, minkejja li għandhom il-karrijiet tal-ħadid u b’saħħithom.”